• 29 قاڭتار, 2014

جاڭاقورعانداعى سەرىكتەستىك 343 مىڭ تەڭگەگە زالال كەلتىردى

230 رەت

كورسەتىلدى

1 مين

وقۋ ءۇشىن

Egemen Qazaqstan

29-01-14-karier-1

قىزىلوردا وبلىسى جاڭاقورعان اۋدانىندا «نۇر-قۇرىلىس لتد» دەپ اتالاتىن سەرىكتەستىك كارەردە زاڭسىز جۇمىس جاساعاننان مەملەكەتكە 343 420 تەڭگەنىڭ زالالىن كەلتىردى. بۇل تۋرالى اۋدان پروكۋرورىنىڭ كومەكشىسى رۋسلان ءپىرنازاردىڭ اقپارىنا سۇيەنگەن Egemen.kz ءتىلشىسى حابارلادى. «اۋداندىق پروكۋراتۋرا قىزمەتكەرلەرى اۋداندىق ىشكى ىستەر ءبولىمى جول پوليتسياسى بولىمشەسى مەن مەملەكەتتىك ەكولوگيالىق ينسپەكتورلارىمەن بىرلەسىپ, جەكە جانە زاڭدى تۇلعالاردىڭ جەر قويناۋىن پايدالانۋداعى ەكولوگيالىق زاڭدىلىقتاردى ساقتاۋلارى جايىنا رەيدتىك تەكسەرۋلەر جۇرگىزدى. ونىڭ بارىسىندا «نۇر-قۇرىلىس لتد» جاۋاپكەرشىلىگى شەكتەۋلى سەرىكتەستىگىنىڭ جاڭاقورعان كەنتى الشەكەي كوشەسىنىڭ باس جاعىندا ورنالاسقان زاڭسىز كارەردەن «Hitachi-330 Zaxis» ماركالى ەكسكوۆاتورى مەن «Howo» ماركالى ەكى كولىگى ارقىلى قۇمدى مالتا تاستاردى تاسىمالداۋمەن رۇقساتسىز اينالىسىپ كەلگەنىن انىقتادى», - دەدى پروكۋروردىڭ كومەكشىسى. «اتالمىش سەرىكتەستىكتىڭ وسى ارەكەتى ارقىلى تابيعاتقا كەلتىرگەن 343 420 تەڭگە زالالى مەملەكەت پايداسىنا ءوندىرىلدى», - دەلىنگەن حابارلامادا. «قورشاعان ورتانى قورعاۋ سالاسىنداعى زاڭنامالارىنىڭ دالمە-ءدال ءارى بىركەلكى قولدانىلۋىن قاداعالاۋ باعىتىندا جاڭاقورعان اۋداندىق پروكۋراتۋراسى قىزمەتكەرلەرى 2013 جىلى بىرقاتار مىندەتتەردى اتقاردى. وتكەن جىلدىڭ ىشىندە بۇل باعىتتا 6 تەكسەرۋ جۇرگىزىلىپ, 75 زاڭ بۇزۋشىلىق انىقتالدى. ناتيجەسىندە بۇلاردىڭ 56-سى جويىلىپ, ەنگىزىلگەن 8 ۇسىنىستىڭ قارالۋ قورىتىندىسىمەن 47 تۇلعانىڭ اكىمشىلىك جاۋاپكەرشىلىگى شەشىلدى. مەملەكەتكە كەلتىرىلگەن 353 806 تەڭگە زالال ءوندىرىلدى», - دەدى ءسوزدىڭ تۇيىنىندە قۇقىق قورعاۋ ورگانىنىڭ وكىلى. قۇرىش نۇرىمبەت. دەرەككوز: قىزىلوردا وبلىسى جاڭاقورعان اۋداندىق پروكۋراتۋراسى.