2016 جىلى فرانتسيادا ءوتەتىن ەۋروپا چەمپيوناتىنا ىرىكتەۋ الدىنداعى جەرەبەنىڭ سەبەتتەرى بەلگىلى بولدى. قازاقستان قۇراماسى ەڭ سوڭعى سەبەتتەن ورىن الدى. بۇل تۋرالى egemen.kz ءتىلشىسى حابارلادى.
سەبەتتەر التىعا بولىنگەن. وندا ەۋروپا ەلدەرىنەن تەك فرانتسيا عانا جوق. ويتكەنى, ول چەمپيوناتتى وتكىزەتىن ەل رەتىندە ىرىكتەۋ سىنىنا قاتىسپايدى. ونىڭ ەسەسىنە جاقىندا ءوزىنىڭ فۋتبول تاريحىندا العاشقى كەزدەسۋىن وتكىزگەن گيبرالتار قۇراماسى ىرىكتەۋ جارىستارىنا قاتىساتىن بولادى. جالپى, توپتارداعى قۇرامالار سانى 6 ەلگە تولىعىپ وتىر. وندا بارلىعى 54 ەلدىڭ ۇلتتىق قۇرامالارى قاتىساتىن ىرىكتەۋ سىنىندا ءار توپتىڭ ءبىرىنشى جانە ەكىنشى ورىن العنا كوماندالارى بىردەن ەۋروپا چەمپيوناتىنا جولداما الادى. سونىمەن بىرگە ءار توپتا ۇزدىك كورسەتكىشپەن ءۇشىنشى ورىندى العان قۇراما دا ەۋروپا چەمپيوناتىنا قاتىسادى. ال باسقا ءۇشىنشى ورىن يەلەنگەن سەگىز ەلدىڭ قكومانداسى ءتورت جولداماعا تالاسادى. تاعى ءبىر ايتاتىن نارسە, ارمەنيا مەن ازەربايجان, رەسەي مەن گرۋزيا, يسپانيا مەن گيبرالتاردىڭ ءبىر توپتا وينامايدى دەگەن شەشىم قابىلداندى. بۇل ەندى اتالعان ەلدەردىڭ قارىم-قاتىناستارىنا, ساياسي جاعدايىنا بايلانىستى جاسالعان شارا ەكەنىن بەلگىلى.
جەرەبە الدىنداعى سەبەتتەرگە بولىنگەن قۇرامالار تومەندەگىدەي:
ءبىرىنشى سەبەت: يسپانيا, گەرمانيا, نيدەرلاندى, يتاليا, انگليا, پورتۋگاليا, گرەكيا, رەسەي, بوسنيا جانە گەرتسەگوۆينا;
ەكىنشى سەبەت: ۋكراينا, حورۆاتيا, شۆەتسيا, دانيا, شۆەيتساريا, بەلگيا, چەحيا, ۆەنگريا, يرلانديا;
ءۇشىنشى سەبەت: سەربيا, تۇركيا, سلوۆەنيا, يزرايل, نورۆەگيا, سلوۆاكيا, رۋمىنيا, اۆستريا, پولشا;
ءتورتىنشى سەبەت: چەرنوگوريا, ارمەنيا, شوتلانديا, فينليانديا, لاتۆيا, ۋەلس, بولگاريا, ەستونيا, بەلارۋس;
بەسىنشى سەبەت: يسلانديا, سولتۇستىك يرلانديا, البانيا, ليتۆا, مولدوۆا, ماكەدونيا, ازەربايجان, گرۋزيا, كيپر;
التىنشى سەبەت: ليۋكسەمبۋرگ, قازاقستان, ليحتەنشتەين, فارەر ارالدارى, مالتا, اندوررا, سان-مارينو, گيبرالتار;
ەسكەرتۋ: بىر سەبەتتەگى قۇرامالار ءبىر توپقا تۇسپەيدى.
2016 جىلى فرانتسيادا وتەتىن ەۋروپا چەمپيوناتىنا 24 كوماندا قاتىسادى. ال جەرەبە تارتۋ ءراسىمى 23 اقپان كۇنى نيتستسا قالاسىندا وتەدى.
داستان كەنجالين.
دەرەككوز:http://www.uefa.com/
