الماتى قالاسىندا جالعان اقشا جاساپ كەلگەن قىلمىستىق توپ قولعا ءتۇستى. بۇل تۋرالى «كتك» تەلەارناسى حابارلادى.
پاتەردى جالعا العان جىگىتتەر كومپيۋتەر مەن پرينتەردىڭ كومەگىمەن تەڭگەنى كوشىرىپ باسقان. كۇدىكتىلەردىڭ قولىنان شىققان 2000 جانە 5000 تەڭگەلىك بانكنوتتاردى بىلىكتى مامان بولماسا, تۇپنۇسقادان ايىرۋ قيىن. ازىرگە مۇنداي جالعان اقشالاردىڭ قانشاسى اينالىمعا ءتۇسىپ كەتكەنى بەلگىسىز بولىپ وتىر. ءتارتىپ ساقشىلارى قىلمىس ۇستىنەن تۇسكەندە ەكى كۇدىكتى جالعان 200 مىڭ تەڭگەنى دايىنداپ قويىپتى. قالعان كوشىرمەلەردى ديۆان استىنا جاسىرعان.
ەكى كۇدىكتى بۇعان دەيىن دە جالعان اقشا جاساعانى ءۇشىن سوتتالعان ەكەن. قازىر بۇل وقيعا بويىنشا قىلمىستىق ءىس قوزعالىپ, تەرگەۋ امالدارى جۇرگىزىلۋدە. وسىعان بايلانىستى ولاردىڭ قانشا جالعان اقشانى جاساعانى جانە تاراتقانى بەلگىلى بولادى.
ءامىرحان الماعانبەتوۆ.
دەرەككوز: «كتك» تەلەارناسى.
فوتو: «كتك» تەلەارناسى.
