بۇگىندە «استانا وپەرا» كامەرالىق زالى – كوپتەگەن مۋزىكانتتار ونەر كورسەتۋگە ۇمتىلاتىن ەلىمىزدىڭ بەدەلدى كونتسەرتتىك الاڭى. بۇل زال كلاسسيكالىق مۇرانى ساقتايتىن جانە جاڭارعان قازاقستاندىق قوعامنىڭ رۋحاني سۇرانىستارىن ىسكە اسىراتىن قازاق جانە الەمدىك مۋزىكا مادەنيەتى داستۇرلەرىنىڭ تاسىمالداۋشىسى بولىپ تابىلادى.
«بۇل ساحنادا قازاقستاننىڭ عانا ەمەس, بۇكىل الەمنىڭ اتاقتى ارتىستەرى ونەر كورسەتۋدە. كامەرالىق زالدىڭ كۇلاش بايسەيىتوۆا زالى دەپ اتالۋى ءبىز ءۇشىن ۇلكەن قۇرمەت. ول «كسرو حالىق ءارتىسى» جوعارى اتاعىنىڭ العاشقى يەگەرلەرىنىڭ ءبىرى. ءبىز ونىڭ تابيعي مۋزىكالىق تالانتىن جانە الەمدىك مادەنيەتتىڭ قازىناسىندا قالدىرعان بەينەلەردىڭ باي گالاكتيكاسىن ەسىمىزدە ساقتايمىز. ال ە.گ.برۋسيلوۆسكيدىڭ «قىز جىبەك» وپەراسىنداعى جىبەك پارتياسى انشىگە كلاسسيكالىق وپەرا ونەرىنىڭ بيىكتەرىنە كوتەرىلۋگە مۇمكىندىك بەردى», دەدى قازاقستاننىڭ ەڭبەك سىڭىرگەن قايراتكەرى, «استانا وپەرا» ديرەكتورى عالىم احمەدياروۆ.
وقيعا قارساڭىندا كۇلاش بايسەيىتوۆانىڭ قىزى قارلىعاش بايسەيىتوۆا ءوزىنىڭ بالالىق شاعى تۋرالى جىلى ەستەلىكتەرىمەن ءبولىستى. ول ەلوردانىڭ مادەني ءومىرى ءۇشىن «استانا وپەرا» كامەرالىق زالىنىڭ اتى اڭىزعا اينالعان تۇلعا كۇلاش بايسەيىتوۆانىڭ ەسىمىمەن اتالۋى ۇلكەن قۋانىش ەكەنىن اتاپ ءوتتى. قىزى اناسىنا العىس حاتتارىنىڭ بىرنەشە كوشىرمەسىن, سونداي-اق ۇلى ءانشىنىڭ جەكە مۇراعاتىنان الىنعان فوتوسۋرەتتى تەاتردىڭ ارت-گالەرەياسىنا تاپسىردى. 13 قىركۇيەكتە تەاتر فويەسىندە ايتۋلى وقيعاعا وراي كورمە وتەدى.
