قاراعاندى حايۋاناتتار باعىنىڭ اينالاسىندا تاعى دا جانجال شىقتى. بۇل جولى كەلۋشىلەر ءمۇيىزى كەسىلىپ, قانسىراعان بۇعىلاردىڭ سۋرەتى مەن ۆيدەوسىن جاريالادى. ول الەۋمەتتىك جەلىلەردە تارالىپ, رەزونانس تۋدىردى.
جەلى قولدانۋشىلارىنىڭ پىكىرى ەكىگە بولىنگەن. ءبىرى جانۋارلار جاعدايىنا الاڭدايتىنىن ايتىپ اشۋلانسا, ال بىرەۋلەرى حايۋاناتتار باعىنىڭ اكىمشىلىگىن قولداعان.
«جانۋارلار لاس جەردە قانسىراپ جاتىر. ولار ينفەكتسيا جۇقتىرماس ءۇشىن ءمۇيىزىن تاڭۋدى دا ويلاماعان. وسىنى ىستەگەندەردى اۋرۋحانادا وسىلاي ەمدەسە عوي. حايۋاناتتار باعى ەمەس, جانۋارلاردى ازاپتايتىن ورىن عوي مىنا جەر», دەپ جازدى جەلى قولدانۋشىلارى.
«نەگە سونشا ساۋاتسىزسىڭدار؟ جانۋارلار ناركوزدان كەيىن السىرەپ جاتقانىن قاراپايىم كوزبەن كورۋگە بولادى. مۇيىزدەرى ءبىر-بىرىنە زاقىم كەلتىرمەس ءۇشىن كەسىلەدى, ويتكەنى قازىر ولاردا رۋتينگ ماۋسىمى باستالدى. سوندىقتان ءبارىن قاۋىپسىزدىك ءۇشىن جاسايدى. پىكىر جازار الدىندا نەگە بۇلاي جاساعاندارىن وقىساڭدارشى», دەپ جازادى باسقا جەلى قولدانۋشىسى.
قاراعاندىداعى حايۋاناتتار باعى ءمان-جايدى ءتۇسىندىرىپ, پىكىر ءبىلدىردى. ساياباقتىڭ زووتەحنيگى بۇعىنىڭ ءمۇيىزىن كەسۋ پروتسەدۋراسى جىل سايىن كۇزدە جانۋارلاردىڭ قاۋىپسىزدىگى ءۇشىن جاسالاتىنىن ايتتى.
«كۇزدە بۇعىلار اگرەسسيۆتى بولا باستايدى. كوبىنەسە بۇنداي جاعدايدا ۇرعاشى بۇعىلار زارداپ شەگەدى. جانۋارلار ءبىر-ءبىرىن جارىپ جىبەرگەن كەزدەر دە بولعان. سوندىقتان مۇنداي جاعدايلار قايتالانباس ءۇشىن جىل سايىن مۇيىزدەرىن كەسۋگە ءماجبۇرمىز. بۇل جولى حايۋاناتتار باعىنا كەلۋشىلەر تۇسىرگەن ءۇش بۇعىنىڭ ءمۇيىزى كەسىلگەن. سۋرەت جانە ۆيدەو تۇسىرگەن كەزدە جانۋارلار ءالى دە اۋىرسىنۋدى باساتىن دارىلەر اسەرىندە بولعان. سوندىقتان ولار وتە ءالسىز بولىپ كورىنەدى. قازىر ولاردىڭ جاعدايى قالىپتى. ولاردىڭ ءمۇيىزى قانمەن قورەكتەنەدى, ال كەسكەننەن كەيىن تابيعي تۇردە اعىپ كەتەدى», دەدى حايۋاناتتار باعىنىڭ قىزمەتكەرى.
