تاسكەسكەندە – مادەنيەت ءۇيى, ايتبايدا – مەكتەپ, بەستەرەكتە – امبۋلاتوريا اشىلدى
ءۇرجار – بۇرىنعى ءۇش اۋداننان قۇرالعان ۇلكەن اۋدان. تارباعاتاي جوتالارىنان الاكولگە, قاراقولدان باقتى كەدەنىنە دەيىن سوزىلىپ جاتقان سۋلى-نۋلى, قۇيقالى ءوڭىر. وبلىس ورتالىعى مەن ءىرى قالالاردان شالعاي جاتقان شەكارالىق اۋدان سوڭعى ۋاقىتتا سونى وزگەرىستەرگە تولى. جۋىردا اۋدان اكىمى سەرىك ءزاينۋلديننىڭ از ۋاقىتتىڭ ىشىندە تىندىرىمدى جۇمىستار اتقارعانىنا كۋا بولدىق.
تاسكەسكەندە – مادەنيەت ءۇيى, ايتبايدا – مەكتەپ, بەستەرەكتە – امبۋلاتوريا اشىلدى
ءۇرجار – بۇرىنعى ءۇش اۋداننان قۇرالعان ۇلكەن اۋدان. تارباعاتاي جوتالارىنان الاكولگە, قاراقولدان باقتى كەدەنىنە دەيىن سوزىلىپ جاتقان سۋلى-نۋلى, قۇيقالى ءوڭىر. وبلىس ورتالىعى مەن ءىرى قالالاردان شالعاي جاتقان شەكارالىق اۋدان سوڭعى ۋاقىتتا سونى وزگەرىستەرگە تولى. جۋىردا اۋدان اكىمى سەرىك ءزاينۋلديننىڭ از ۋاقىتتىڭ ىشىندە تىندىرىمدى جۇمىستار اتقارعانىنا كۋا بولدىق.
ايتالىق, ءۇرجار اۋدانىندا ءبىر كۇننىڭ ىشىندە بىرقاتار الەۋمەتتىك ماڭىزى بار نىساندار پايدالانۋعا بەرىلدى. ونىڭ قاتارىندا تاسكەسكەن اۋىلىنداعى مادەنيەت ءۇيى, ايتباي اۋىلىنداعى ورتا مەكتەپ جانە بەستەرەك اۋىلىنداعى دارىگەرلىك امبۋلاتوريا بار.
الدىمەن تاسكەسكەن اۋىلىنداعى كۇردەلى جوندەۋدەن وتكەن مادەنيەت ءۇيىنىڭ اشىلۋى ءوتتى. ون جەتى جىل جوندەۋ كورمەي, ىسكە العىسىز بولعان عيماراتقا جەرگىلىكتى بيۋدجەتتەن 91 ملن. تەڭگەدەن استام قارجى ءبولىنگەن ەكەن. «تەرمە وست» جشس جۇرگىزگەن قۇرىلىس جۇمىستارى وتكەن جىلدىڭ قاراشا ايىندا اياقتالىپتى.
بۇل عيماراتتىڭ ىشىندە حالىققا قىزمەت كورسەتۋ ورتالىعى, ارداگەرلەر القاسى, اۋىل كىتاپحاناسى, ءماجىلىس زالى جانە ت.ب. الەۋمەتتىك-مادەني ورىندار ورنالاسقان. ماسەلەن, حقكو فيليالى ارقىلى تۇرعىندار ورتالىققا بارماي-اق قۇجاتتى ءبىر كۇننىڭ ىشىندە رەسىمدەپ الا الادى.
مادەنيەت ءۇيىنىڭ سىڭعىرلاعان جاڭا ءماجىلىس زالىندا قوڭىرشاۋلى اۋىلدىق وكرۋگى اكىمى ا.ءجۇنىسوۆتىڭ حالىقپەن ەسەپتىك كەزدەسۋى ءوتتى. اتالعان كەزدەسۋگە وبلىس اكىمى بەردىبەك ساپارباەۆ تا قاتىستى.
بۇل كۇنى 130 ورىندىق ورتا مەكتەپتىڭ اشىلۋ سالتاناتىنا قاتىسقان ايتباي اۋىلىنىڭ تۇرعىندارى دا قۋانىشقا بولەندى. جاڭا مەكتەپ زامان تالابىنا ساي جاراقتاندىرىلعان.
– بۇرىن وقۋشىلار كىشكەنە عيماراتتا ەكى كەزەك بويىنشا وقيتىن. وندا سپورت زالى مەن اسحانا جوق بولاتىن. جاڭا مەكتەپتە مۇنىڭ بارلىعى بار. سونىمەن بىرگە, شاعىن ورتالىق تا وسىندا ورنالاسقان. بۇل – اتا-انالار ءۇشىن وتە ءتيىمدى. وقۋشىلار ءبىر اۋىسىمدا وقيدى, – دەدى اۋداندىق وقۋ ءبولىمى كاسىپوداعىنىڭ جەتەكشىسى جانبولات جىڭعىلباەۆ.
مەكتەپتە وقۋشىلاردىڭ بىلىگىن جەتىلدىرۋگە قاجەتتى جاعداي جاسالعان. تىگىن, اعاش جانە تەمىر شەبەرحانالارى, ءماجىلىس زالى, كىتاپحانا بار. سونىمەن بىرگە, 90 وقۋشىعا تەگىن ىستىق اس بەرۋگە ارنالعان اسحانا ۇيىمداستىرىلعان.
بەستەرەك اۋىلىندا «شاروردا» جشس سالعان دارىگەرلىك امبۋلاتوريا قۇرىلىسىنا 150 ملن. تەڭگە جۇمسالعان.
– «سالاماتتى قازاقستان» باعدارلاماسى بويىنشا, حالىق دەنساۋلىعىن جاقسارتۋ ءۇشىن ماتەريالدىق-تەحنيكالىق بازانى نىعايتۋ قاجەت. وسىعان وراي, وبلىس اۋماعىندا 29 دارىگەرلىك امبۋلاتوريا سالۋدى جوسپارلاعانبىز. وتكەن جىلى 11 امبۋلاتوريا سالىندى. ونىڭ ءىشىندە 4 امبۋلاتوريا ءۇرجار اۋدانىنا تيەسىلى. مۇنىڭ بارلىعى ەلباسى نۇرسۇلتان نازارباەۆتىڭ تىكەلەي قولداۋى ارقىلى جۇزەگە اسىپ جاتىر, – دەدى ءوڭىر باسشىسى.
2200 تۇرعىنى بار بەستەرەك اۋىلىنىڭ حالقى دارىگەرلىك امبۋلاتوريا اشىلعانىنا وتە قۋانىشتى. ساتىبالدى بىسماقوۆ, تۇرسىنحان قايسارقىزى, جۇمابيكە قايىروۆا سىندى اۋىل قاريالارى دەر كەزىندە پايدالانۋعا بەرىلگەن امبۋلاتوريانىڭ, اسىرەسە, جاس بالالار مەن زەينەتكەرلەر ءۇشىن قاجەت ەكەنىن جەتكىزىپ, ريزاشىلىقتارىن ءبىلدىردى.
«ديپلوممەن – اۋىلعا!» باعدارلاماسى بويىنشا اۋىلعا كەلگەن مارينا سەرگيەنكو اتالعان مەكەمەگە جەتەكشىلىك ەتەدى. امبۋلاتوريا دارىگەرى جاس مامان رەتىندە باسپانامەن دە قامتىلعان.
ديدار نۇرلان ۇلى.
شىعىس قازاقستان وبلىسى,
ءۇرجار اۋدانى.
