پرەزيدەنت • 08 قىركۇيەك، 2021

مەملەكەت باسشىسى بىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

63 رەت كورسەتىلدى

اقوردادا ون مەملەكەتتىڭ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى، دەپ حابارلايدى Egemen.kz.

قاسىم-جومارت توقاەۆقا سەنىم گراموتالارىن ەستونيا رەسپۋبليكاسىنىڭ ەلشىسى تووماس تيرس، ازەربايجان ەلشىسى اگالار اتاموگلانوۆ، يسپانيا كورولدىگىنىڭ ەلشىسى حورحە ۋربيولا لوپەس دە مونتەنەگرو، ۇلىبريتانيا كورولدىگى مەن سولتۇستىك يرلانديا ەلشىسى كەترين دجەين ليچ، رۋمىنيا ەلشىسى مەدەلينا لۋپۋ، يتاليا رەسپۋبليكاسىنىڭ ەلشىسى ماركو البەرتي، گەرمانيا فەدەراتيۆتىك رەسپۋبليكاسىنىڭ ەلشىسى مونيكا يۆەرسون، بەلگيا كورولدىگىنىڭ ەلشىسى انري ۆانتيگەم، ەۋروپالىق وداق وكىلدىگىنىڭ باسشىسى، ەلشى كەستۋتيس يانكاۋسكاس، قىرعىز رەسپۋبليكاسىنىڭ ەلشىسى داستان ديۋشەكەەۆ تابىستادى.

1

پرەزيدەنت ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاي وتىرىپ، ولاردىڭ تاجىريبەسى مەن كاسىبي بىلىكتىلىگى دوستاس حالىقتاردىڭ ءارتۇرلى سالالار بويىنشا ىنتىماقتاستىق ورناتۋىنا ىقپال ەتەدى دەگەن سەنىمىن جەتكىزدى. 

قازاقستان پرەزيدەنتى ەلشىلەر الدىندا سويلەگەن سوزىندە ەلىمىزدىڭ تاۋەلسىزدىك جىلدارىنداعى جەتىستىكتەرىنە توقتالا كەتتى.

«بيىل ءبىز قازاقستان تاۋەلسىزدىگىنىڭ وتىز جىلدىعىن اتاپ وتەمىز. بۇل – ءبىز ءۇشىن ماڭىزدى كەزەڭ. وسى جىلدار ىشىندە ەلىمىز ىشكى تۇراقتىلىعىمەن، ەكونوميكالىق وسىمىمەن جانە سىرتقى ساياساتتاعى ورنىقتى ۇستانىمىمەن تانىلدى. بيىلعى جولداۋىمدا ەكونوميكالىق رەفورمالار تۋرالى جان-جاقتى ايتتىم. سونىمەن قاتار دەموكراتيالىق قۇندىلىقتاردى، ادام قۇقىقتارىن جانە زاڭ ۇستەمدىگىن ىلگەرىلەتۋگە باعىتتالعان «حالىق ۇنىنە قۇلاق اساتىن مەملەكەت» تۇجىرىمداماسى جۇزەگە اسىرىلىپ جاتىر»، دەدى قاسىم-جومارت توقاەۆ ءوز سوزىندە.

مەملەكەت باسشىسى ەلىمىزدىڭ پاندەميامەن كۇرەس كەزىندە حالىقارالىق سەرىكتەستەرىمەن ىنتىماقتاستىعىن اتاپ ءوتتى.

«قازىرگى ۋاقىتتا ادامزات Covid-19 پاندەمياسىنان مەديتسينالىق، الەۋمەتتىك جانە ەكونوميكالىق داعدارىستان زارداپ شەگۋدە. بۇل حالىقارالىق جۇيەنىڭ عالامدىق توتەنشە جاعدايلارعا قانشالىقتى دايىن ەمەس ەكەنىن كورسەتتى. پاندەميامەن كۇرەستە قازاقستان ءوزىنىڭ جاھاندىق سەرىكتەستەرىمەن ىنتىماقتاستىقتىڭ ارقاسىندا رەسەيدەن، قىتايدان جانە اقش-تان ۆاكتسينالار جەتكىزۋدى قامتاماسىز ەتىپ كەلەدى. ەلىمىز ءتيىمدى، ەڭ باستىسى، قاۋىپسىز ۆاكتسينا جاساپ شىعاردى. دۇنيەجۇزىلىك دەنساۋلىق ساقتاۋ ۇيىمىنىڭ سەرتيفيكاتىن العاننان كەيىن ءبىز ولاردى شەتەلدەرگە جەتكىزە الامىز. پاندەميا، جاپپاي قىرىپ-جويۋ قارۋىنىڭ تارالۋى جانە كليماتتىڭ وزگەرۋى سياقتى عالامدىق قاۋىپ-قاتەرلەرمەن كۇرەستە كۇش بىرىكتىرگەنىمىز ابزال. يادرولىق قارۋدان ازات الەم قۇرۋ قازاقستاننىڭ سىرتقى ساياساتىنىڭ باسىم باعىتى بولىپ قالا بەرەتىنىن اتاپ وتكىم كەلەدى. مەن بىلتىر بۇۇ قاۋىپسىزدىك كەڭەسىنىڭ اياسىندا بيولوگيالىق قاۋىپسىزدىك جونىندەگى حالىقارالىق اگەنتتىكتى قۇرۋدى ۇسىنىپ، جاھاندىق كۇن ءتارتىبىنىڭ تاعى ءبىر ولشەمىن ۇسىندىم»، دەدى پرەزيدەنت.

2

سالتاناتتى ءىس-شارا بارىسىندا قاسىم-جومارت توقاەۆ اۋعانستانداعى احۋالعا بايلانىستى قابىلدانعان شەشىمدەر مەن اتقارىلىپ جاتقان جۇمىستار تۋرالى ءسوز قوزعادى.

«اۋعانستانداعى شيەلەنىسكەن ماسەلەلەردى رەتتەۋ ءۇشىن قازاقستان شەتەلدىك سەرىكتەستەرىمەن تىزە قوسىپ جۇمىس ىستەپ كەلەدى. ءبىز، ەڭ الدىمەن، سول جەردەگى وتانداستارىمىزدى ۇيىمداسقان تۇردە ەۆاكۋاتسيالاۋدى قامتاماسىز ەتتىك. ەندى،ء بىز اۋعانستانداعى قازاق دياسپوراسىنىڭ مۇشەلەرىن، ياعني قانداستارىمىزدى ەلگە قايتارۋ ماسەلەسىن قاراستىرىپ جاتىرمىز. گۋمانيتارلىق ۇستانىمدارعا سايكەس اۋعانستاندىق 57 ستۋدەنتتىڭ ءبىلىم بەرۋ ۆيزالارىن ۇزارتتىق. سونىمەن قاتار بورتىندا شەتەل ازاماتتارى بار ۇشاقتارعا جانارماي قۇيۋ ءۇشىن ترانزيتتىك اۋە دالىزدەرى مەن قونۋ الاڭدارىن ۇسىندىق. بۇۇ-نىڭ اۋعانستان جونىندەگى اگەنتتىكتەرىنىڭ قاشىقتاعى ۋاقىتشا كەڭسەسى الماتى قالاسىنا ورنالاستىرىلدى»، دەدى مەملەكەت باسشىسى.

ول، سونداي-اق، ەستونيا رەسپۋبليكاسىنىڭ ەلشىسى تووماس تيرسكە ەكى مەملەكەت اراسىنداعى ديپلوماتيالىق قارىم-قاتىناستاردى جوعارى باعالايتىنىن جەتكىزدى.

«قازاقستان مەن ەستونيانى ورتاق تاريحي بەلەستەرى بىرىكتىرسە، قازىر ساياسي جانە ەكونوميكالىق مۇددەلەر بايلانىستىرىپ كەلەدى. ءسىزدىڭ ەلىڭىز – قازاقستاننىڭ ەۋروپالىق وداق پەن بالتىق وڭىرىندەگى ماڭىزدى سەرىكتەسى. ءبىز جاسىل ەكونوميكا، كولىك جانە لوگيستيكا، تسيفرلاندىرۋ، ءبىلىم بەرۋ جانە تۋريزم سالالارىنداعى جاڭا مۇمكىندىكتەردى پايدالانامىز دەپ ۇمىتتەنەمىن»، دەدى قاسىم-جومارت توقاەۆ.

3

مەملەكەت باسشىسى اگالار اتاموگلانوۆقا ازەربايجان قازاقستاننىڭ ەۋرازيالىق كەڭىستىكتەگى جانە كاسپي وڭىرىندەگى نەگىزگى سەرىكتەستەرىنىڭ ءبىرى ەكەنىن ايتتى.

ء«بىزدىڭ كوپجاقتى ىنتىماقتاستىعىمىزدىڭ بارلىق سالاسىنا تىڭ سەرپىن بەرۋ وزەكتى ماسەلە»، دەدى پرەزيدەنت.

4

حورحە ۋربيولاعا قاراتا ايتقان سوزىندە مەملەكەت باسشىسى يسپانيانى ەكىجاقتى جانە كوپجاقتى دەڭگەيدەگى سەنىمدى ساياسي سەرىكتەس رەتىندە جوعارى باعالايتىنىن جەتكىزدى.

«وڭدەۋ جانە تاۋ-كەن ونەركاسىبى، ينفراقۇرىلىم، بالامالى ەنەرگيا كوزدەرى، تاماق ءوندىرىسى، دەنساۋلىق ساقتاۋ، ءبىلىم بەرۋ جانە تۋريزم سياقتى سالالاردى وركەندەتۋ ءۇشىن ءتيىمدى مۇمكىندىكتەر اشىلۋى ىقتيمال»، دەدى پرەزيدەنت.

5

مەملەكەت باسشىسى ۇلىبريتانيا كورولدىگى مەن سولتۇستىك يرلانديا ەلشىسى كەترين دجەين ليچكە قازاقستان ەكونوميكاسىنداعى بەسىنشى ءىرى ينۆەستور سانالاتىن بىرىككەن كورولدىكپەن اراداعى ستراتەگيالىق ىنتىماقتاستىقتى جوعارى باعالايتىنىن اتاپ ءوتتى.

«قازاقستان مەن ۇلىبريتانيا اراسىندا جاقىن ارادا قول قويىلاتىن جاسىل ەكونوميكا سالاسىنداعى بىرلەسكەن ساياسي دەكلاراتسيا مەن ىنتىماقتاستىقتىڭ جول كارتاسى ءبىزدىڭ سەرىكتەستىگىمىزگە تىڭ سەرپىن بەرەدى»، دەپ اتاپ ءوتتى قاسىم-جومارت توقاەۆ.

پرەزيدەنت ەلشى مەدەلينا لۋپۋعا ارناعان سوزىندە رۋمىنيا مەن قازاقستاننىڭ ەكى ۇلكەن نارىقتىڭ ورتاسىندا ورنالاسقانىن نازارعا الدى.

ء«بىر جاعىنان قىتاي، رەسەي، ورتالىق ازيا جانە كاسپي ايماعىن، ەكىنشى جاعىنان ەۋروپالىق وداق پەن قارا تەڭىز ايماعىن قامتيدى. بۇل ءبىزدىڭ كاسىپورىندارىمىزعا مۇناي-گاز ونەركاسىبىنەن بولەك باسقا دا ءتۇرلى سالالاردا ىنتىماقتاستىقتى ارتتىرۋعا جول اشادى»، دەدى مەملەكەت باسشىسى.

6

مەملەكەت باسشىسى يتاليا رەسپۋبليكاسىنىڭ ەلشىسى ماركو البەرتيگە قازاقستاننىڭ ەۋروپالىق وداقتاعى سەنىمدى سەرىكتەسى يتاليامەن اراداعى قارىم-قاتىناستاردى ودان ءارى نىعايتۋعا نيەتتى ەكەنىن جەتكىزدى.

«ريم – قازاقستاننىڭ ءىرى ساۋدا سەرىكتەستەرىنىڭ ءبىرى. ءبىز يتاليامەن وڭدەۋ ونەركاسىبى، كولىك جانە لوگيستيكا، اۋىل شارۋاشىلىعى، ەنەرگەتيكا، جاڭارتىلاتىن ەنەرگيا كوزدەرى، جاڭا تەحنولوگيالار سالالارىنداعى جان-جاقتى ىنتىماقتاستىعىمىزدى كەڭەيتۋگە مۇددەلىمىز»، دەدى قاسىم-جومارت توقاەۆ.

7

قازاقستان پرەزيدەنتى گەرمانيا فەدەراتيۆتىك رەسپۋبليكاسىنىڭ ەلشىسى مونيكا يۆەرسونعا ەكى مەملەكەت ءوزارا تۇسىنىستىك پەن ورتاق باسىمدىقتارعا نەگىزدەلگەن بەرىك قاتىناستار ورناتقانىن ايتتى.

«بەرلينگە ساپارىمنان كەيىنگى سوڭعى ەكى جىلدا قازاقستان-گەرمانيا قارىم-قاتىناسى ورنىقتى دامىپ كەلەدى. كەشە عانا مەن سولتۇستىك قازاقستاندا CLAAS كومپانياسى ينۆەستيتسيا سالعان كاسىپورىنعا باردىم. بۇل جوبا – ءبىزدىڭ ەكىجاقتى ىنتىماقتاستىعىمىزدىڭ قارقىن العانىنىڭ تاعى ءبىر دالەلى. مەن اتاپ وتكەن CLAAS Group كاسىپورنىمەن، سونىمەن بىرگە Siemens، Linde، BASF، Svevind Energy، Knauf، Martin Bauer، Baumann، Goldbeck Solar جانە باسقا دا كومپانيالارمەن بىرلەسكەن جاڭا جوبالار – ءبىزدىڭ ورتاق جەتىستىكتەرىمىز. قازاقستان تەحنولوگيا، ءبىلىم بەرۋ جانە الەۋمەتتىك ينتەگراتسيا سالاسى بويىنشا جەتەكشى ەكونوميكالىق دەرجاۆا سانالاتىن گەرمانيامەن ىنتىماقتاستىقتى ودان ءارى نىعايتۋعا مۇددەلى»، دەدى پرەزيدەنت.

قاسىم-جومارت توقاەۆ بەلگيا كورولدىگىنىڭ ەلشىسى انري ۆانتيگەمگە ەكى مەملەكەتتىڭ ورناتقان بەرىك قارىم-قاتىناستارىن جوعارى باعالايتىنىن ايتتى.

«ەكى ەل اراسىندا ەنەرگەتيكا، جاڭارتىلاتىن ەنەرگيا، اۋىل شارۋاشىلىعى جانە حيميا سالالارىن قوسا العاندا، ءارتۇرلى سالالاردا ەكونوميكالىق بايلانىستار جولعا قويىلعان. بريۋسسەلگە جوسپارلانعان ساپارىم ءبىزدىڭ قارىم-قاتىناسىمىزدا پايدالانىلماعان ۇلكەن الەۋەتتى اشۋعا كومەكتەسەدى دەپ سەنەمىن»، دەدى ول.

مەملەكەت باسشىسى ەۋروپالىق وداق وكىلدىگىنىڭ باسشىسى، ەلشى كەستۋتيس يانكاۋسكاسقا بريۋسسەلگە جاسايتىن ساپارى ەۋروپالىق وداقتى دا قامتيتىنىن جەتكىزدى.

«مەن پرەزيدەنت چارلز ميشەلگە سەرىكتەستىكتىڭ جاڭا جوسپارىن جاساۋ ءۇشىن جەكە كەزدەسۋگە دايىن بولعانى ءۇشىن العىس ايتامىن. ەۋروپالىق وداقتىڭ ورتالىق ازيا مەملەكەتتەرىمەن اراداعى كەڭەيتىلگەن ارىپتەستىك پەن ىنتىماقتاستىق تۋرالى العاش رەت قول قويىلعان كەلىسىمنىڭ كۇشىنە ەنۋى ءبىزدىڭ قارىم-قاتىناستارىمىزدى جاڭا دەڭگەيگە شىعاردى»، دەدى قاسىم-جومارت توقاەۆ.

8

ەلشى داستان ديۋشەكەەۆكە قازاقستاننىڭ قىرعىز رەسپۋبليكاسىمەن ستراتەگيالىق سەرىكتەستىككە ەرەكشە نازار اۋداراتىنى تۋرالى ايتىلدى.

«بيىلعى ناۋرىز ايىندا پرەزيدەنت سادىر جاپاروۆتىڭ قازاقستانعا جاساعان مەملەكەتتىك ساپارىنىڭ قورىتىندىسى ءوزارا ءىس-قيمىلدى كەڭەيتۋدىڭ باستى باعدارى بولدى. قارىم-قاتىناستارىمىزدى ودان ءارى تەرەڭدەتۋ ماقساتىندا مەن قىرعىز ارىپتەسىمنىڭ 2022 جىلدىڭ باسىندا بىشكەككە ساپارمەن كەلۋگە شاقىرۋىن ريزاشىلىقپەن قابىلدادىم»، دەدى پرەزيدەنت.

قىزمەتكە كىرىسكەن ەلشىلەر پرەزيدەنتكە ءوز ەلدەرى مەن قازاقستان اراسىنداعى ىنتىماقتاستىقتى ودان ءارى نىعايتۋعا بار كۇش-جىگەرىن جۇمسايتىندارىن جەتكىزدى.

9

سوڭعى جاڭالىقتار

«قىزىل» ايماقتىڭ قاتارى سيرەمەي تۇر

كوروناۆيرۋس • بۇگىن، 09:45

2236 ادام كوروناۆيرۋستان جازىلدى

كوروناۆيرۋس • بۇگىن، 09:30

سىيلىق يەلەرى جاريا ەتىلدى

فۋتبول • بۇگىن، 08:58

راحمانبەردىنىڭ قۇستارى

ايماقتار • بۇگىن، 08:51

قازاق بيىنە قۇمارتقان قىز

ونەر • بۇگىن، 08:40

ىرىكتەۋ جارىستارى اياقتالدى

قىسقى سپورت • بۇگىن، 08:37

وڭىردە باعا بايلاۋعا كونبەي تۇر

ايماقتار • بۇگىن، 08:33

كۇردەلى جوندەۋدى قاجەت ەتەدى

ايماقتار • بۇگىن، 08:30

وسىمدىك مايىن وندىرە المايمىز با؟

قازاقستان • بۇگىن، 08:22

ەكى اۋىلعا گاز جەتتى

ايماقتار • بۇگىن، 08:20

سوت سەگىز مىڭنان استام ءىس قاراعان

قازاقستان • بۇگىن، 08:04

«وميكرون» ءورشىپ بارادى

كوروناۆيرۋس • بۇگىن، 08:00

ەسىمنەن كەتپەس ەكى ەتيۋد

رۋحانيات • كەشە

بەسىنشى ەلەمەنت

ونەر • كەشە

ۇقساس جاڭالىقتار