ءىرى عىلىمي شارانى نۇرسۇلتان نازارباەۆ قورى جانىنداعى عىلىمي كەڭەس ۇيىمداستىرۋدا.
سونىمەن بىرگە قازاقستان رەسپۋبليكاسى ۇلتتىق عىلىم اكادەمياسى مەن قر ءبىلىم جانە عىلىم مينيسترلىگى قازاقستان تاۋەلسىزدىگىنىڭ 30 جىلدىعىنا ارنالعان فورۋمدى وتكىزۋگە قولداۋ كورسەتەدى.
«تاۋەلسىز قازاقستاننىڭ زياتكەرلىك الەۋەتى: قالىپتاسۋى مەن دامۋىنا 30 جىل» I حالىقارالىق جاس عالىمدار فورۋمىنا 14 ەلدەن 200-گە جۋىق سپيكەر مەن بايانداما جاساۋشىلار قاتىسادى. ولار: قازاقستان, بەلارۋس, ۇلىبريتانيا, گەرمانيا, كانادا, قىتاي, لاتۆيا, پورتۋگاليا, رەسەي, اقش, تاجىكستان, تۇركيا, ۋكراينا, فرانتسيا ەلدەرىنەن كەلەدى.
عىلىمي فورۋمنىڭ ماقساتى – عالىمداردى, ساياساتكەرلەردى, ءوندىرىس جەتەكشىلەرىن, ازاماتتىق قوعام مەن باق وكىلدەرىن جيناپ, ۇلتتىق عىلىمدى دامىتۋدىڭ وزەكتى ماسەلەلەرىن تالقىلاۋ.
فورۋمنىڭ باعدارلامالىق ءىس-شارالارى بارىسىندا قازاقستاننىڭ تاۋەلسىزدىك جىلدارىنداعى جەتىستىكتەرىنە تالداۋ جاسالادى. فورۋمنىڭ نەگىزگى قاتىسۋشىلارى – جاس عالىمدار. ولار عىلىمي جوبالار كورمەسىندە ءوز يدەيالارىن ۇسىنادى.
سونىمەن قاتار «جاسىل الەم» جانە «تۇلعا مەن قوعام» عىلىمي سەسسيالارىندا سالانى دامىتۋعا ارنالعان باستامالار مەن ۇسىنىستارىن ايتادى دەپ كۇتىلۋدە.
