بۇل تۋرالى يۋنيسەف-ءتىڭ ءباسپاسوز قىزمەتى مالىمدەدى.
بۇۇ بالالار قورى (يۋنيسەف) سانيتارلىق-ەپيدەميولوگيالىق باقىلاۋ كوميتەتىمەن, قازاقستان رەسپۋبليكاسى دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ ۇلتتىق ورتالىعىمەن (قر دسم قدسۇو), اقش حالىقارالىق دامۋ اگەنتتىگىنىڭ (USAID) قارجىلىق قولداۋىمەن بالالاردىڭ جوسپارلى ۆاكتسيناتسياسى تۋرالى رەسمي اقپارات پەن مەديتسينالىق زەرتتەۋلەردىڭ ناتيجەلەرى جيناقتالعان سايت ازىرلەدى.
بىرنەشە اي بويى MedSupport دارىگەرلەرى مەن عالىمدار توبى يۋنيسەف-پەن بىرلەسىپ قاجەتتى دەرەكتەردى ىرىكتەپ, اتا-انالار مەن قازاقستانداعى يممۋنداۋ تاقىرىبىنا قىزىعۋشىلىق تانىتاتىن ادامدار ءۇشىن EGU.kz سايتىنىڭ قۇرىلىمى, ينتەرفەيسى جانە كونتەنتىن بارىنشا قولايلى ەتۋ بويىنشا جۇمىس جۇرگىزدى.
اقپاراتتىق رەسۋرستا ۇلتتىق ۆاكتسيناتسيا كۇنتىزبەسىنە ەنگىزىلگەن ءاربىر ۆاكتسينانىڭ تولىق سيپاتتاماسى بار.
سايتقا كىرگەن كەز-كەلگەن ادام ۆاكتسينا قورعايتىن ينفەكتسيالارمەن تانىسىپ, قارسى كورسەتىلىمدەر مەن ىقتيمال جاناما اسەرلەر تۋرالى وقي الادى.
سايتتىڭ ىسكە قوسىلۋىمەن ءاربىر قازاقستاندىق اتا-انا اۋتيزم جانە قپق ۆاكتسيناسى تۋرالى ءميفتىڭ قالاي پايدا بولعانى, نەلىكتەن بالالار ەكپەلەرىندە سىناپ جوق ەكەندىگى, سونداي-اق ينەكتسيا ورنىن سۋلاۋعا بولاتىنى الدە بولمايتىنى جايلى بىلەتىن بولادى.
سونداي-اق ۆاكتسيناتسيا تۋرالى ميفتەردىڭ تولىق ءتىزىمى مەن ولاردى اشكەرلەيتىن سەنىمدى اقپاراتتار تۋرالى بىلەدى.
«ۆاكتسيناتسيا ماسەلەلەرى كوپشىلىك پەن بۇقارالىق اقپارات قۇرالدارىن ءجيى الاڭداتادى. EGU.kz سايتىنىڭ نەگىزگى مىندەتى – ۆاكتسينالار تۋرالى تولىق جانە سەنىمدى اقپارات بەرۋ جانە رەسپۋبليكادا ۆاكتسيناتسيالاۋ جۇمىستارىن ۇيىمداستىرۋ. بۇل پلاتفورما ۆاكتسيناتسيا سالاسىنداعى تاجىريبەلى ماماندار جانە عالىمدار مەن حالىقتىڭ اراسىنداعى اشىق جانە شىنايى ديالوگىنا ارنالعان, ديالوگتىڭ ارقاسىندا اركىم ءوز سۇراقتارىنا كاسىبي جانە عىلىمي نەگىزدەلگەن جاۋاپتار الا الادى», دەدى ايجان سەرىكبايقىزى ەسماعامبەتوۆا, قازاقستان رەسپۋبليكاسى دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق باقىلاۋ كوميتەتىنىڭ ءتورايىمى.
سايت قازاق جانە ورىس تىلدەرىندە قولجەتىمدى. كورۋ قابىلەتى بۇزىلعان ادامدارعا ارنالعان نۇسقا دا بار.
«ۆاكتسيناتسيا – اتا-انالار ءۇشىن بالالارىن جۇقپالى اۋرۋلاردىڭ اۋىر زارداپتارىنان قورعاۋدىڭ جالعىز, ەڭ ءتيىمدى جانە بالاماسى جوق ءادىس. Egu.kz سايتىندا ءسىز ۆاكتسيناتسيا تۋرالى دۇرىس, دالەلدى جانە نەگىزدەلگەن اقپاراتتى الا الاسىز», دەدى قازاقستان رەسپۋبليكاسى دەنساۋلىق ساقتاۋ مينيسترلىگى ۇلتتىق قوعامدىق دەنساۋلىق ساقتاۋ ورتالىعى باسقارما توراعاسىنىڭ ورىنباسارى ايناگۇل قۋاتباەۆا.
رەسمي رەسۋرستا ۆاكتسيناتسيا كۇنتىزبەسى, ۆاكتسيناتسيا ورتالىقتارى, ۆاكتسينالار مەن اۋرۋلار, ميفتەر, سۇراقتار مەن جاۋاپتار سياقتى ايدارلار بار. EGU.kz سايتىندا اتا-انالار ۆاكتسينالاردىڭ تۇرلەرى تۋرالى اقپاراتقا قول جەتكىزىپ, ولاردىڭ قاۋىپسىزدىگىن تەكسەرۋدىڭ بارلىق كەزەڭدەرى تۋرالى بىلەدى جانە ولاردى مازالايتىن سۇراقتارعا جاۋاپ الا الادى.
سايت سونىمەن قاتار ۆاكتسيناتسيا تاريحىنا قىسقاشا شولۋ جاسايدى جانە ۆاكتسينامەن باسقارىلاتىن بىرقاتار جۇقپالى اۋرۋلاردى جەڭۋ جولىنداعى ادامزاتتىڭ العاشقى قادامدارىن سيپاتتايدى.
الداعى ۋاقىتتا ول بالالاردى جوسپارلى ۆاكتسيناتسيالاۋ تۋرالى وزەكتى ستاتيستيكالىق دەرەكتەرمەن تولىقتىرىلاتىن بولادى.
«ۆاكتسينالاردى ويلاپ شىعارۋ – مەديتسينانىڭ ەڭ ۇلكەن جەتىستىگى. ءوزىڭىزدى جانە بالاڭىزدى دەنساۋلىققا قايتىمسىز زيان كەلتىرەتىن, كەيدە ولىممەن اياقتالاتىن قورقىنىشتى اۋرۋلاردان قورعاۋدىڭ ەڭ ءتيىمدى جانە كەيدە جالعىز جولى بولىپ تابىلادى. 21 عاسىردا كەيبىر اتا-انالار بالالارىن ۆاكتسيناتسيالاۋدىڭ تيىمدىلىگى مەن قاجەتتىلىگىنە قاتىستى ءالى دە كۇماندانۋدا. دۇرىس جانە اقپاراتتاندىرىلعان تاڭداۋ جاساۋعا كومەكتەسۋ ءۇشىن يۋنيسەف ءوزىنىڭ سەرىكتەستەرىمەن بىرگە بۇرىن قازاقستاندا بولماعان بىرەگەي سايت ازىرلەدى. ۇلتتىق ۆاكتسيناتسيا كۇنتىزبەسىنە كىرەتىن ۆاكتسينالار تۋرالى بارلىق اقپاراتتى تابۋ وڭاي جانە جەڭىل بولاتىن الاڭ. بۇل سايت اتا-انالار ءۇشىن ءوز بالاسىن ۆاكتسيناتسيالاۋ تۋرالى ماڭىزدى شەشىم قابىلداۋدا پايدالى قۇرال بولادى دەپ سەنەمىن», دەپ بەلگىلەپ ءوتتى قازاقستانداعى يۋنيسەف وكىلى ارتۋر ۆان ديزەن.
سايت تۇرعىلىقتى جەرگە ەڭ جاقىن ۆاكتسيناتسيا ورتالىعىن تابۋعا مۇمكىندىك بەرەتىن ىڭعايلى كارتامەن جابدىقتالعان. بالاڭىزعا جوسپارلى ەگۋدى ۇمىتىپ كەتپەۋ ءۇشىن اتا-انالار ەلەكتروندى كۇنتىزبەگە ۆاكتسينانى ۋاقىتىندا قويۋ قاجەتتىلىگى تۋرالى ەسكەرتۋ فۋنكتسياسىن قولدانا الادى.
ء«بىز وسى جوبانىڭ ءبىر بولىگى بولعانىمىزعا قۋانىشتىمىز. EGU.KZ سايتى قازاقستاندىق سابيلەردىڭ قاۋىپسىز جانە سالاۋاتتى بالالىق شاعى ءۇشىن اتا-انالاردىڭ تاپتىرماس كومەكشىسى بولادى!», دەپ ءتۇسىندىردى Medsupport كومانداسى.
سايت يۋنيسەف قازاقستان مەن قازاقستان رەسپۋبليكاسى دەنساۋلىق ساقتاۋ مينيسترلىگىنىڭ يممۋنداۋ جۇيەسىن كۇشەيتۋ جونىندەگى بىرلەسكەن باعدارلاماسى شەڭبەرىندە ازىرلەنگەن.
«يممۋنداۋ ءومىردى عانا قۇتقارىپ قويمايدى, سونداي-اق بالالارعا, ايەلدەرگە جانە وتباسىلارعا وركەندەۋگە مۇمكىندىك بەرەدى. بۇل ماڭىزدى ۆەب-سايتتا بەرىلگەن اقپارات ادامدارعا ۆاكتسينا ارقىلى الدىن الاتىن اۋرۋلاردىڭ قاۋپىنەن قورعانۋعا كومەكتەسەدى. ناتيجەسىندە بالالار مەكتەپتە بولىپ, اتا-انالار ءوز وتباسىنا قامقورلىق جاساپ, قولداۋ كورسەتۋ ارقىلى ءوز قوعامداستىعى مەن ەلىنىڭ ەكونوميكالىق وسۋىنە ىقپال ەتە الادى», USAID/ورتالىق ازيا ميسسياسى ديرەكتورىنىڭ مىندەتىن اتقارۋشى, پيتەر يانگ.
