بۇل تۋرالى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ جوبالىق كەڭسە جەتەكشىسى سابىر قاسىموۆ نۇر-سۇلتان قالاسىنداعى توپتىق سەميناردا ءمالىم ەتتى.
«ساياسي قۋعىن-سۇرگىن قۇرباندارىن, كوتەرىلىسكە قاتىسۋشىلاردى, ونىڭ ىشىندە ەشبىر تەرگەۋسىز, سوتسىز اتىلعانداردى تولىق اقتاۋ ماسەلەسى تىڭ ءارى كۇردەلى جۇمىس دەۋگە بولادى. بۇعان دەيىن كوتەرىلىسكە قاتىسقانى ءۇشىن ۇستىنەن پروتسەسسۋالدىق قۇجاتتار راسىمدەلگەندەردىڭ باسىم بولىگى اقتالدى. ولار نەگىزىنەن 58-باپ بويىنشا سوتتالعان. قالعان ساناتتار بويىنشا زاڭدىق تۇرعىدا پىسىقتاپ, ساياسي اقتاۋ كەرەك», دەگەن جوبالىق كەڭسە جەتەكشىسى ءاربىر كوتەرىلىستىڭ تۋىنداۋ سەبەبىنە ءمان بەرۋ كەرەكتىگىن ەسكەرتتى.
«كوتەرىلىستەردىڭ نەدەن تۋىنداعانىن ايقىنداۋ وزەكتى ماسەلە بولىپ تۇر. ادامدار سول كەزدەگى بيلىكتىڭ حالىققا قارسى تەررورى مەن وزبىرلىعىن, تولاسسىز ساياسي ناۋقانداردىڭ زاردابىن باسىنان وتكىزىپ, قارسى جاپپاي نارازىلىقتار جانە كوتەرىلىستەرگە شىقتى. ولار وزدەرىنىڭ تابيعي الەۋمەتتىك مۇددەسىن قورعادى. جاقىنداپ كەلە جاتقان تراگەدياعا جول بەرمەۋگە تىرىستى», دەدى زاڭگەر ساراپشى.
سونداي-اق ول اتالمىش كەزەڭدەگى كوتەرىلىستەرگە قاتىسۋشىلاردى ساياسي تۇرعىدان اقتاۋدىڭ قۇقىقتىق نەگىزىن قالىپتاستىرۋ بويىنشا قانداي جۇمىستار جاسالعانىنا توقتالدى.
«ارحيۆتەردە ساقتالعان قۇجاتتار, سوۆەت عالىمدارى تاراپىنان جاسالعان باعالاۋلار ادەتتە بۇل كوتەرىلىستىڭ ءبارىن بارىنشا جاعىمسىز جاعىنان سيپاتتاعان. ولار نەگىزىنەن «بانديتتىك», «كونترەرۆوليۋتسيالىق», «ۇلتشىل» كوتەرىلىستەر دەپ كورسەتىلگەن. قازىرگى زەرتتەۋشىلەردىڭ مىندەتى – سولارعا شىنايى, بولشەۆيكتىك, ستاليندىك تاپشىل دوگماتتاردىڭ پايىمىنان ازات باعا بەرۋ. ءبىز حالىقارالىق قۇندىلىقتار مەن ستاندارتتاردى نەگىزگە الامىز.
جوبالىق كەڭسە تەرمينولوگيالىق سوزدىك جاسايدى. ونى جاساۋدا زەرتتەۋشىلەردىڭ, وڭىرلىك كوميسسيالاردىڭ, جۇمىس توپتارىنىڭ پىكىر-ۇستانىمدارى ەسكەرىلەدى. سىزدەرگە نەگىزگى تەرميندەردىڭ جاڭا تۇسىندىرمەسىن حالىقارالىق ستاندارتتار مەن زاماناۋي ادىستەمەلەرگە سايكەس تەرميندەر سوزدىگىن ۇسىنىپ, كەستە تۇرىندە انىقتاماسىن بەرۋ كەرەك», دەدى سابىر قاسىموۆ.
