قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆ وسىلاي دەپ دابىل قاعۋدا. ونىڭ ايتۋىنشا, مەملەكەتتىك ورگاندار تاراپىنان پرەزيدەنت جارلىعىنان الىپ تاستاۋعا جاتاتىن ەرەكشەلىكتەر تىزبەسىن كەڭەيتۋ ارەكەتتەرى توقتار ەمەس. ول مەملەكەتتىك ورگانداردىڭ مۇنداي ۇسىنىسى اقىلعا سىيمايتىنىن جانە مەملەكەت باسشىسىنىڭ تاپسىرماسىنا قايشى كەلەتىنىن العا تارتۋدا.
– اتاپ ايتقاندا, ىلگەرىدە قارجى مينيسترلىگى سالىقتىق تەكسەرۋلەرگە قاتىستى باستاما جاسادى. بۇل كاسىپكەرلىك سۋبەكتىلەرىنە تۇسەتىن جۇكتەمەنىڭ ايتارلىقتاي ارتۋىنا الىپ كەلۋى مۇمكىن. وسى ورايدا سالىق ورگاندارى ءۇشىن ونسىز دا ءبىرشاما ەرەكشەلىكتەر قاراستىرىلعان بولاتىن.
2 قىركۇيەكتە قارجى ءمينيسترى ەرۇلان جاماۋباەۆ كاسسا ءتارتىبىنىڭ تومەندەۋىنە جانە مەملەكەتتىك بيۋدجەت كىرىستەرىنىڭ ۇلعايۋىن قامتاماسىز ەتۋ قاجەتتىلىگىنە سىلتەمە جاساي وتىرىپ, ءموراتوريدى جويۋ تۋرالى ۇسىنىس ايتتى, – دەيدى ر.ءجۇرسىنوۆ.
كاسىپكەرلەردىڭ قۇقىقتارىن قورعاۋ جونىندەگى ۋاكىل توتەنشە جاعداي رەجىمىنىڭ جاريالانۋىنا جانە كوروناۆيرۋس ينفەكتسياسىنىڭ تارالۋىنا بايلانىستى كارانتيندىك شارالار ەنگىزىلگەندىكتەن, كوپتەگەن كاسىپكەرلەر جۇمىسىن توقتاتۋعا ءماجبۇر بولعانىن جەتكىزدى.
– ولاردىڭ قىزمەتى ۋاقىت بويىنشا دا, كەلۋشىلەر سانى بويىنشا دا شەكتەۋلى بولدى. سونىمەن قاتار ولار كارانتيندىك شارالاردى ساقتاۋ ءۇشىن دە قوسىمشا شىعىن شىعاردى. كاسىپكەرلەردىڭ ءبىر بولىگى ءالى كۇنگە دەيىن ءوز جۇمىسىن قايتا باستاي الماي وتىر. ال تابىستىڭ تومەندەۋى حالىقتىڭ ساتىپ الۋ قابىلەتىنىڭ تومەندەۋىمەن بايلانىستى. كاسىپكەرلەر تابىسىن جاسىرىپ وتىرعان جوق. كىرىستىڭ تومەندەۋىنە وسىنداي جاعدايلار سەبەپ بولىپ وتىر. مەملەكەتتىك بيۋدجەتكە تۇسەتىن كىرىستەر ءتۇسىمىنىڭ قىسقارۋىن پاندەميا كەزىندە كاسىپكەرلەردىڭ كاسسالىق ءتارتىبىنىڭ تومەندىگىمەن بايلانىستىرۋ دۇرىس ەمەس, – دەيدى ر.ءجۇرسىنوۆ.
ۋاكىلدىڭ پىكىرىنشە, شاعىن بيزنەس تاراپىنان مەملەكەتتىك بيۋدجەتتى تولىقتىرۋ ماسەلەسى ءتىپتى كوڭىلگە قونبايدى.
– شاعىن بيزنەس ونسىز دا «شىقپا جانىم, شىقپا» دەپ وتىرعان جوق پا؟! رەسمي ستاتيستيكا بويىنشا, ەلىمىزدە 1,3 ملن-نان استام شاعىن جانە ورتا بيزنەس سۋبەكتىسى جۇمىس ىستەيدى. ولاردىڭ 99,8 پايىزىن شاعىن كاسىپكەرلىك سۋبەكتىلەرى قۇرايدى. مۇنداي سۋبەكتىلەردە از عانا ادام جۇمىس اتقاراتىنىن ەسكەرەر بولساق, كەز كەلگەن ايىپپۇل سانكتسيالارى ولار ءۇشىن ۇلكەن اۋىرتپالىق تۋدىرارى ءسوزسىز. سونداي-اق بۇل قىزمەتكەرلەردىڭ قىسقارۋىنا, جالاقىنىڭ تومەندەۋىنە اكەلۋى مۇمكىن. اينالىپ كەلگەندە «كولەڭكەلى ەكونوميكانىڭ» ارتۋىنا جول بەرەمىز. قازىرگى جاعدايدا الەۋمەتتىك شيەلەنىستى كۇشەيتەتىن جانە شاعىن كاسىپكەرلىك سەكتورلارىنىڭ جابىلۋىنا قاۋىپ توندىرەتىن قادامدارعا جول بەرۋگە بولمايدى, – دەپ ناقتىلادى كاسىپكەرلەردىڭ قۇقىقتارىن قورعاۋ جونىندەگى ۋاكىل.
ر.ءجۇرسىنوۆ موراتوري بيزنەس پەن ەكونوميكانى قولداۋ شاراسى رەتىندە قابىلدانعانىن العا تارتتى. ال جاڭا ەرەكشەلىكتەر كاسىپكەرلەر ءۇشىن ءبىرشاما اۋىرتپالىق تۋدىرادى.
– موراتوري جونىندەگى جارلىقتىڭ قولدانىلۋ كەزەڭىندە مەملەكەتتىك ورگاندارعا ءموراتوريدى جويۋ نەمەسە باقىلاۋ جۇزەگە اسىرىلاتىن بەلگىلى ءبىر سالالاردى جارلىق قولدانىسىنان شىعارۋ تۋرالى ۇسىنىستارعا باستاماشىلىق ەتۋ پراكتيكاسىن توقتاتۋدى تاپسىرعان دۇرىس. وسىعان وراي مەن پرەمەر-مينيسترگە ۇسىنىس ەنگىزدىم, – دەپ جازدى ر.ءجۇرسىنوۆ Facebook-تەگى جەكە پاراقشاسىنا.
