26 تامىزدا تاڭەرتەڭ ەرتە ۇيدەن جۇمىسقا شىققان, بىراق ءىز-ءتۇسسىز جوعالعان قالا اكىمدىگى قىزمەتكەرى تۋرالى حابار قالا تۇرعىندارىن الاڭداتتى. ۇيالى تەلەفونى ءسوندىرۋلى بولعان انانى ۇيدە 8 جاستان 11 جاسقا دەيىنگى ءۇش بالا كۇتىپ وتىردى.
«كەشكە ورمان القابىن تەكسەرۋ كەزىندە, ايەلدىڭ جۇمىسقا باراتىن جولداردىڭ بىرىنەن الىس ەمەس جەردە ونىڭ ءمايىتى تابىلدى. مەديتسينالىق ساراپتاما قورىتىندىلارى بويىنشا ايەل دەنەسىندە تۇنشىعۋ جانە بىرنەشە پىشاق جاراقاتتارى تۇرىندەگى زورلىق-زومبىلىق بەلگىلەرى بار ەكەندىگى انىقتالدى. وقيعا ورنىنا وبلىس ورتالىعىنان پوليتسيا دەپارتامەنتىنىڭ, پروكۋراتۋرانىڭ باسشىلىعى, سونداي-اق كريمينالدىق پوليتسيا قىزمەتكەرلەرى دەرەۋ كەلدى», دەپ حابارلادى وبلىستىق پد.
بىرنەشە كۇننەن كەيىن كۇدىكتى انىقتالىپ, ۇستالدى. ول بۇرىن بىرنەشە رەت سوتتالعان 34 جاستاعى ەر ادام بولىپ شىقتى. ونىڭ بۇل قىلمىسقا بارۋ سەبەبى - ايەلدىڭ كۇمىس اشەكەيلەرى مەن سومكەسىن يەمدەنۋ بولدى.
«قازىر كۇدىكتى قاماۋعا الىنىپ, قىلمىسى قر قك 99 جانە 192-باپتارى بويىنشا سارالانادى. اتالعان باپتاردىڭ سانكتسيالارى 20 جىلعا دەيىن نەمەسە ءومىر بويى باس بوستاندىعىنان ايىرۋدى كوزدەيدى», دەدى شقو پد باستىعىنىڭ ورىنباسارى تالعات شاياحمەتوۆ.
اناسىز قالعان بۇلدىرشىندەر جاقىن تۋىستارىنىڭ قامقورشىلىعىنا ءوتتى. جەرگىلىكتى اتقارۋشى ورگاندار قاجەتتى جاردەم كورسەتۋدە.
