قازاقستان پرەزيدەنتى نۇرسۇلتان نازارباەۆ داۆوستاعى دۇنيەجۇزىلىك ەكونوميكالىق فورۋم جۇمىسىنا قاتىسۋ قورىتىندىلارىنا ارنالعان بريفينگ وتكىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
قازاقستان پرەزيدەنتى نۇرسۇلتان نازارباەۆ داۆوستاعى دۇنيەجۇزىلىك ەكونوميكالىق فورۋم جۇمىسىنا قاتىسۋ قورىتىندىلارىنا ارنالعان بريفينگ وتكىزدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
مەملەكەت باسشىسى دۇنيەجۇزىلىك ەكونوميكالىق فورۋم الەمدىك ەكونوميكاداعى جاعدايلار مەن ونىڭ دامۋ پەرسپەكتيۆالارى تۋرالى پىكىر الماسۋ الاڭى بولىپ سانالاتىنىن اتاپ ءوتتى.
– داۆوس – تىعىز كەزدەسۋلەر ورنى, سەبەبى, فورۋمعا مەملەكەتتەر مەن ۇكىمەتتەر باسشىلارى, حالىقارالىق ۇيىمدار مەن ءىرى كومپانيالار جەتەكشىلەرى كوپ جينالادى. قازاقستان تاۋەلسىزدىك العاننان كەيىن مەن بۇل فورۋمعا ءجيى كەلىپ تۇردىم, ويتكەنى, ول كەزدە ءبىزدىڭ ەل تانىمال ەمەس ەدى. ساپارلاردىڭ ماقساتى جاس رەسپۋبليكا تۋرالى اڭگىمەلەپ, ينۆەستورلار نازارىن اۋدارۋ بولاتىن. ينۆەستورلار كەڭەسىن قۇرۋ باستاماسى دا ءدال وسىندا كوتەرىلگەنىن ەسكە سالا كەتەيىن. ال بۇگىن 2050 ستراتەگياسىنىڭ قابىلدانۋىنا جانە وندا الەمدەگى دامىعان 30 ەلدىڭ قاتارىنا كىرۋ ماقساتى قويىلعانىنا بايلانىستى وسى جونىندە فورۋمعا قاتىسۋشىلارعا اڭگىمەلەپ بەرۋ قاجەتتىگى تۋىپ وتىر, – دەدى قازاقستان پرەزيدەنتى.
نۇرسۇلتان نازارباەۆ فورۋم پرەزيدەنتى ك.شۆابپەن, سونداي-اق, وزگە مەملەكەتتەر مەن ۇكىمەتتەر باسشىلارىمەن وتكەن كەزدەسۋلەر تۋرالى حابارلادى.
– مەن قازاقستاندا جۇمىس ىستەپ جاتقان كومپانيالار باسشىلارىمەن دە كەزدەسۋلەر ءوتكىزىپ تۇرامىن. ءبىز ولاردىڭ ەلىمىزدەگى الداعى ۋاقىتتاعى قىزمەتىنىڭ پەرسپەكتيۆالارىن تالقىلايمىز. باستى ماسەلە سوندا – ءوندىرۋشى سالالاردا جۇمىس ىستەپ جاتقان ترانسۇلتتىق كومپانيالار ءوز كاسىپورىندارى ءۇشىن بىزدە سەرۆيستىك كومپانيالار قۇرۋعا تىرىسۋى كەرەك. بۇل جايت قازاقستاندى يندۋستريالاندىرۋ سەكتورىنا قاتىستى. مەنىمەن اڭگىمەلەسكەن كىسىلەر ەلىمىزدىڭ دامۋ بولاشاعى ءۇشىن ينفراقۇرىلىمدى دامىتۋعا – اۆتوجولدار مەن تەمىرجولدار, پورتتار, اەروپورتتار سالۋعا دەگەن ءبىزدىڭ ۇمتىلىسىمىزدىڭ ماڭىزدىلىعىن ايتادى. وتكىزىلگەن كەزدەسۋلەر بۇل ورايدا وتە ماڭىزدى بولدى, – دەدى مەملەكەت باسشىسى.
نۇرسۇلتان نازارباەۆ ءوزىنىڭ ەۋروپا قايتا قۇرۋ جانە دامۋ بانكىنىڭ باسشىسى س.چاكرابارتيمەن اڭگىمەلەسۋى جونىندە ايتىپ بەردى.
– ەقدب قازاقستانعا 6,5 ميلليارد دوللار سالدى. كەزدەسۋدە مەن شاعىن جانە ورتا بيزنەستى قولداۋعا كوبىرەك كوڭىل ءبولۋدى ءوتىندىم. بانك قازىردىڭ وزىندە 162 ميلليون دوللارلىق جوبالاردى قارجىلاندىردى, بيىل بيزنەستى نەسيەلەۋگە 77 ميلليون دوللار ءبولىندى, – دەدى قازاقستان پرەزيدەنتى.
بۇعان قوسا, قازاقستان پرەزيدەنتى كەزدەسۋلەر تاقىرىبىنىڭ ءبىرى الداعى ەكسپو-2017 كورمەسىن وتكىزۋگە ينۆەستيتسيالار تارتۋ تۋرالى بولعانىن اتاپ ءوتتى.
مەملەكەت باسشىسى بۇرىنعى سەرىكتەستەرمەن كەزدەسىپ, جاڭا ادامدارمەن تانىسۋ ءۇشىن فورۋمنىڭ جاقسى مۇمكىندىك ەكەنىن اتاپ ءوتتى.
– وزگە ەلدەردىڭ باسشىلارى ءبىزدىڭ ءوڭىردىڭ احۋالى مەن دامۋ پەرسپەكتيۆالارىنا قاتىستى مەنىڭ پىكىرىمدى بىلگىسى كەلەدى. يراننىڭ يادرولىق باعدارلاماسى, اۋعانستان مەن سيرياداعى احۋالدى رەتتەۋ ماسەلەلەرى, ۋكرايناداعى وقيعالار بارشانى قىزىقتىرادى. وسىلايشا, ءوزارا پىكىر الماسۋلار ناتيجەسىندە پايدالى ۇسىنىستار مەن شەشىمدەر تۋادى. فورۋم باسقارۋشى ورگان بولىپ سانالمايدى, ول تەك ءتۇرلى قيىن جاعدايلاردان شىعۋدىڭ ىقتيمال جولدارىن ۇسىنادى, – دەدى نۇرسۇلتان نازارباەۆ.
بۇدان بولەك, قازاقستان پرەزيدەنتى فورۋمدا بىرقاتار قاۋىپتى سىن-قاتەرلەر مەن بولاشاق داعدارىستار انىقتالعانىن حابارلادى.
– وسىعان بايلانىستى, داعدارىستىڭ ارتتا قالعانى تۋرالى بالەندەي توقمەيىلسۋ جوق. قيىندىقتار ءالى الدا. ەۋروپالىق وداقتاعى باستى قيىندىق, اسىرەسە, جاستار اراسىنداعى جۇمىسسىزدىق, سونداي-اق, ەۋرو ۆاليۋتاسىنا قاتىستى سەنىمسىز كوزقاراس. جىلدىڭ ورتاسىنا قاراي بەلگىلەنگەن ەۋروپارلامەنت سايلاۋى وتە ماڭىزدى بولماق. ەۋروپا مەن اقش-تىڭ ەكونوميكاسى باياۋ دا بولسا كوتەرىلىپ كەلەدى, بۇل – جاقسى جاڭالىق. وعان قوسا, قىتاي ەكونوميكاسىنىڭ تومەندەۋى بايقالۋدا, بۇل ءوز كەزەگىندە الاڭداۋشىلىق تۋدىراتىن نىشان بولىپ وتىر. ءبىز ءۇشىن رەسەي ەكونوميكاسىنىڭ جاعدايى دا ماڭىزدى. ءبىزدى وسى ماسەلەلەردىڭ ءبارى مازالايدى, ويتكەنى, ءبىز الەمدىك قوعامداستىقتىڭ ءبىر بولىگىمىز. الەمدە بولعان نارسەنىڭ ءبارى بىزگە دە اسەر ەتەدى. ءبىزدىڭ مىندەتىمىز – سونى دەر كەزىندە اڭداپ, ىقتيمال قيىن احۋالداردان امان شىعۋدىڭ ءتيىستى شارالارىن قابىلداۋ, – دەدى نۇرسۇلتان نازارباەۆ.
