پرەزيدەنت بۇل رەتتە, ۇستازداردىڭ كۋرستان ءوتۋ ءۇشىن ءوز قالتاسىنان اقشا تولەۋىنە جول بەرىلمەۋ كەرەكتىگىن دە اتاپ ءوتتى.
«سونىمەن بىرگە, حالىقارالىق ءبىلىم وليمپياداسىنان جۇلدەلى ورالعان وقۋشىلاردىڭ ۇستازدارىن دا مورالدىق جانە ماتەريالدىق تۇرعىدان ىنتالاندىرعان ءجون. تۇرمىسى تومەن وتباسىندا ءوسىپ جاتقان بالالارعا ورتا ءبىلىم بەرۋدىڭ جالپىعا مىندەتتى ستاندارتى اياسىندا قولداۋ كورسەتۋ ايرىقشا ماڭىزدى. ماتەريالدىق قولداۋ كورسەتۋ شارالارىن «تسيفرلى ۇستاز» ءبىلىم بەرۋ جوباسىمەن تولىقتىرعان ءجون. ءبىلىم بەرۋ جۇيەسىنە جىگەرلى ءارى بىلىكتى ماماندار قاجەت», دەدى مەملەكەت باسشىسى.
