«ەلىمىزدە ۆاكتسينا قورى جەتكىلىكتى. ازاماتتاردىڭ تاڭداۋ مۇمكىندىگى بار. كوپتەگەن مەملەكەتتەردىڭ بۇعان قولى جەتپەي وتىر. ەلىمىزدە جاپپاي ەكپە ءجۇرىپ جاتقانىمەن, قوعامدا بۇعان قارسى ادامدار ءالى دە كوپ. ولار وزدەرى باس تارتىپ قانا قويماي, حالىقتى كەرى ۇگىتتەۋدە. سونىڭ كەسىرىنەن قانشاما جۇرتتى اداستىرۋدا. مۇنداي ادامدار ءوزىنىڭ عانا ەمەس, وزگەنىڭ ءومىرى ءۇشىن دە جاۋاپ بەرەتىنىن تۇسىنۋگە ءتيىس. سوندىقتان ەكپە الۋعا قارسى ۇگىتتەپ جۇرگەندەردىڭ جەتەگىندە كەتپەگەن ءجون.
ادامزات كوپتەگەن ىندەتتى باستان وتكەرگەن. ۆاكتسينا پايدا بولعاننان كەيىن عانا قاۋىپتى ىندەتتەرگە توسقاۋىل قويىلعانىن ۇمىتپاۋىمىز كەرەك. الداعى ۋاقىتتا الەمدە كوروناۆيرۋستىڭ جاڭا شتاممدارى شىعۋى مۇمكىن. ساراپشىلار باسقا دا ىندەتتەر پايدا بولاتىنىن ايتۋدا. ءبىز ونىڭ قاشان بولاتىنىن كۇتىپ قارا وتىرا المايمىز. وسىنداي جاعدايدا ءومىر ءسۇرىپ, ءارى قاراي دامۋعا بەيىمدەلۋىمىز كەرەك. قازىر ەرتەرەك ۆاكتسينانى ساتىپ الۋ وتە ماڭىزدى.
سونىمەن بىرگە بۇكىل دەنساۋلىق ساقتاۋ سالاسىن تۇراقتى ەكپە الۋ جۇيەسىنە دايىنداعان ءجون.
ەلىمىزدىڭ بيولوگيالىق قاۋىپسىزدىگىن بولجاۋمەن اينالىساتىن ۇلتتىق جۇيە قۇرىلۋعا ءتيىس. بۇل شارا ءتيىستى زاڭ جوباسىندا قاراستىرىلعان. پارلامەنتكە وسى زاڭ جوباسىن قازىرگى سەسسيانىڭ سوڭىنا دەيىن قابىلداۋدى سۇرايمىن.
مەديتسينالىق ساراپتاما جاسايتىن كوپتەگەن زەرتحانامىز حالىقارالىق ستاندارتقا ساي ەمەس, «دەنى ساۋ ۇلت» جوباسى بويىنشا كەمىندە 12 زەرتحانانى جوعارى تەحنولوگيالىق قۇرالدارمەن جابدىقتاۋ قاجەت. سونىڭ ارقاسىندا زەرتحانالارىمىز 90 پايىزعا دەيىن حالىقارالىق تالاپقا ساي جۇمىس ىستەيتىن بولادى», دەدى پرەزيدەنت.
