قازبا جۇمىستارى 106-شى اقمولا كاۆالەريالىق ديۆيزياسىنىڭ جاۋىنگەرلەرى سوعىسقان اۋماقتا جۇرگىزىلۋدە. ەكى اپتا بويى قازاقستاندىق ارنايى جاساق ۋكرايندىق ارىپتەستەرىمەن بىرگە ساربازداردىڭ سۇيەكتەرىن ىزدەۋمەن اينالىستى. ىزدەۋشىلەر 116 دەنەنىڭ سۇيەگىن تاپتى.
«مەموريالدىق ايماق» بىرلەستىگىنىڭ جەتەكشىسى مايدان قۇسايىنوۆ قازبا جۇمىستارى جۇرگىزىلىپ جاتقان جەردە باسقا دا قالدىقتار بولۋى مۇمكىن دەپ ەسەپتەيدى.
«مۇندا ءبىز تەك شەتىنە جەتتىك. ال يادروسىنا ءالى جەتكەن جوقپىز. تەرەڭدە ونداعان مىڭ قالدىقتار بولۋى مۇمكىن. وندا ساربازداردىڭ ەسىمدەرى مەن جەكە زاتتارى انىقتالادى. الداعى ۋاقىتتا وسى جەردە مەموريالدىق ايماق قۇرعىمىز كەلەدى», دەدى قۇسايىنوۆ.
بۇل ەكسپەديتسيا ۋكراينادا وتكىزىلىپ جاتقان قازاقستاننىڭ تاريحي-مۇراعاتتىق جوباسىنىڭ العاشقى كەزەڭى بولىپ ەسەپتەلەدى.
«حابار 24» مالىمەتى بويىنشا, ۋكراينالىق ىزدەۋشىلەر بۇل ايماقتا بەس جىلدان بەرى قازبا جۇمىستارىن جۇرگىزىپ كەلەدى. وسى ۋاقىت ىشىندە ولار 500 ساربازدىڭ سۇيەگىن تاپتى.
