بيىلعى جولداۋدا ەلباسى مەملەكەت الدىنا ۇلكەن, اۋقىمدى ماقسات-مىندەتتەر قويدى. بۇل جولعى جولداۋدىڭ ءبىر قۇندىلىعى مىنادا: وندا قازاقستاننىڭ ۇلتتىق «ءماڭگىلىك ەل» يدەياسى تۋرالى ايتىلىپ, وعان ايرىقشا ءمان بەرىلدى.
بيىلعى جولداۋدا ەلباسى مەملەكەت الدىنا ۇلكەن, اۋقىمدى ماقسات-مىندەتتەر قويدى. بۇل جولعى جولداۋدىڭ ءبىر قۇندىلىعى مىنادا: وندا قازاقستاننىڭ ۇلتتىق «ءماڭگىلىك ەل» يدەياسى تۋرالى ايتىلىپ, وعان ايرىقشا ءمان بەرىلدى.
«ءماڭگىلىك ەل» دەگەنىمىز – قازاقستان ۇلتىنىڭ, قازاقستان تاۋەلسىزدىگى مەن مەملەكەتىنىڭ ماڭگىلىك بولۋى. بۇگىنگى كۇنگە دەيىن «ءبىزدىڭ ۇلتتىق يدەيامىز نە؟» دەگەن ساۋالدىڭ قوعامدى تولعاندىرعانى انىق. سەبەبى, مۇنداي يدەيا تالاي عاسىرلاردان بەرى ءوز قۇندىلىعىن جوعالتقان ەمەس. بۇل رەتتە, جولداۋدىڭ وزەگىندە ۇلتتىق «ماڭگىلىك ەل» يدەياسى جاتقانى ءبىزدى ايرىقشا قۋانتتى.
سونداي-اق, مەملەكەتتى العا جىلجىتاتىن تەتىكتەر – ءبىلىم, عىلىم, دەنساۋلىق ساقتاۋ, مادەنيەت سالالارىن دامىتۋ ماسەلەلەرىنە دە جولداۋدا ايرىقشا ءمان بەرىلگەن. ماسەلەن, مادەنيەت سالاسى تۋرالى ايتقاندا, مەملەكەت باسشىسى مادەنيەتتىڭ الەمدىك ستاندارتقا ساي كەلۋ قاجەتتىگىن اتاپ ءوتتى. ول ءۇشىن مادەنيەتتىڭ ءوز دامۋ باعدارلاماسى, ءوز دامۋ كلاستەرلەرى قۇرىلۋى ءتيىس. بۇلاردىڭ بارلىعى ەلباسى ايتقانداي, مادەنيەت سالاسىنىڭ بارلىق تەتىكتەرىن دۇنيەجۇزىلىك وزىق ستاندارتتارعا سايكەستەندىرۋىمىز ءۇشىن قاجەت.
ءبىز الەم ەلدەرىن كوپ ارالايمىز. شەتەلدىك ساپارلار كەزىندە الەمدىك, دۇنيەجۇزىلىك وزىق ستاندارتتاردى كورەمىز. ارينە, ءبىز سونداي كەزدە الەمدىك دەڭگەيدەگى وزىق ستاندارتتاردىڭ ءوز وتانىمىزدا, قازاقستاندا بولعانىن قالايتىنىمىز انىق. ءبىز بولاشاقتا وسى باعىتتا ەڭبەك ەتەتىن بولامىز. ماسەلەن, ءبىزدىڭ الداعى ۋاقىتتىڭ ەنشىسىندەگى ءبىر ارمانىمىز – ۇلتتىق سيمفونيالىق وركەستر قۇرۋ. ءبىز وسىنداي جوبالاردى جۇزەگە اسىرۋ ارقىلى ۇلتتىق مادەنيەتىمىزدى بار الەمگە تانىتقىمىز كەلەدى. بۇگىندە بىزدە مۇنداي جوبالاردى جۇزەگە اسىراتىن تالانتتى, دارىندى, بىلىكتى جاستار جەتەرلىك.
ايمان مۇساقوجاەۆا,
قازاقستاننىڭ حالىق ءارتىسى,
قازاق ۇلتتىق ونەر
ۋنيۆەرسيتەتىنىڭ رەكتورى.
