پاۆلودار وبلىستىق پوليتسيا دەپارتامەنتىنىڭ مالىمەتىنشە, كۇدىكتى پوليتسەيلەردىڭ كەزەكتى رەيدى كەزىندە قولعا تۇسكەن.
تاڭعى ساعات 08.45 شاماسىندا جاڭا قالا اۋىلىنىڭ ماڭىندا, «ومبى-مايقاپشاعاي» اۆتوجولىنىڭ 358 شاقىرىمىندا روتا ينسپەكتورى اباي تىنىباەۆ «گاز 3110»اۆتوكولىگىن توقتاتقان.
قۇجاتتاردى تەكسەرۋ كەزىندە 52 جاستاعى جۇرگىزۋشى ءوزىن ءبىرتۇرلى ۇستاعان. تەكسەرۋ بارىسىندا اۆتوكولىك سالونىندا جۇرگىزۋشى ورىندىعىنىڭ استىنان «توز» مىلتىعى مەن 16 كاليبرلى 17 پاترون تابىلدى. بۇل زاتتاردىڭ ءتيىستى قۇجاتتارى بولماعان. مىلتىقتى قانداي ماقساتپەن الىپ جۇرگەنىن جانە ونىڭ قايدان شىققانىن جۇرگىزۋشى تۇسىندىرە المادى.
دەرەكتەر بازاسىندا مىلتىق باسقا ادامعا تيەسىلى ەكەنى انىقتالدى. مىلتىق پەن پاتروندار تاركىلەنىپ, جۇرگىزۋشىگە قاتىستى قر اقبتك-ءنىڭ 484-بابى 1-بولىگى بويىنشا اكىمشىلىك ءىس قوزعالدى.
«تەك ءبىر تاۋلىك ىشىندە 143 اكىمشىلىك قۇقىق بۇزۋشىلىق انىقتالدى. ونىڭ ىشىندە 45 جۇرگىزۋشى جىلدامدىقتى شەكتەن تىس اسىرسا, 19 جۇرگىزۋشى تەحنيكالىق اقاۋلى جاعدايدا كولىك قۇرالىن باسقارعان. ال 3 جۇرگىزۋشى كولىكتى ماس كۇيىندە ايداعان. مىسالى, ساعات 03.10 – دا «پاۆلودار-شارباقتى» اۆتوجولىنىڭ 8 كم-دە جۇرگىزۋشىسى ماس كۇيىندە بولعان «اۋدي 80» اۆتوكولىگى توقتاتىلدى.
وعان قاتىستى قر اقبك 608 بابى بويىنشا اكىمشىلىك ءىس قوزعالدى, ماتەريال سوتقا جولداندى, اۆتوكولىك ايىپ تۇراعىنا قامالدى», دەپ حابارلادى پاۆلودار وبلىسى پوليتسيا دەپارتامەنتىنىڭ پاترۋلدىك پوليتسيا روتاسى كومانديرىنىڭ مىندەتىن اتقارۋشى ادىلەت مەرعازين.
ايتا كەتۋ كەرەك, اعىمداعى جىلدىڭ باسىنان بەرى وڭىردە قارۋ مەن ونىڭ پاتروندارىن ساتىپ الۋ, بەرۋ, ەسەپكە الۋ, ساقتاۋ, پايدالانۋ, تاسىمالداۋ ءتارتىبىن بۇزعانى ءۇشىن 480 ازاماتتى جاۋاپكەرشىلىككە تارتىلدى.
