ەلباسى قابىلدادى

مەملەكەت باسشىسى نۇرسۇلتان نازارباەۆ قازاقستان رەسپۋبليكاسىنىڭ تابيعي مونوپوليالاردى رەتتەۋ اگەنتتىگىنىڭ توراعاسى نۇرلان الدابەرگەنوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. ن.الدابەرگەنوۆ پرەزيدەنتتى ەلەكتر ستانسالارى مەن وڭىرلىك ەلەكتر جەلىلىك كومپانيالارعا ولاردىڭ ءوندىرىستى جاڭعىرتۋ تۋرالى ينۆەستيتسيالىق مىندەتتەمەلەرىن ورىنداۋلارى بويىنشا جۇرگىزىلگەن تەكسەرىستىڭ قورىتىندىلارى تۋرالى حاباردار ەتتى. “AES” كومپانياسىنا قاراستى ءشۇلبى جانە وسكەمەن گەس-تەرىنىڭ مىندەتتەمەلەرى ورىندالماعانى, سونداي-اق قۇنى 1,5 ميلليارد تەڭگەنى قۇرايتىن بىرقاتار وزگە ەلەكتر ستانسالاردىڭ ينۆەستيتسيالىق مىندەتتەمەلەرى ورىندالماعانى انىقتالدى. اڭگىمەلەسۋ بارىسىندا سونداي-اق, ەنەرگيامەن قامتۋ ماسەلەسى تالقىلاندى. اگەنتتىك تاراپىنان ەلەكتر ەنەرگياسىنا ارنالعان ديففەرەنتسيالدى تاريفتەر ەنگىزىلگەن. بۇل زاڭدى تۇلعالاردىڭ ەنەرگيانى تۇتىنۋ كولەمىنە تىكەلەي بايلانىستى بولماق. قازىرگى ۋاقىتتا  تاريفتەردىڭ ەكى دەڭگەيلى جۇيەسى جۇمىس ىستەۋدە, تاياۋ ەكى-ءۇش جىلدا ءۇش دەڭگەيلى جۇيەنى ەنگىزۋ جوسپارلانىپ وتىر. – پرەزيدەنت ديففەرەنتسيالدى تاريفتەردى قولدانۋدى دامىتۋ, سونىڭ ىشىندە تۇرعىنداردىڭ سۋدى تۇتىنۋداعى ۇنەمشىلدىگىن ىنتالاندىرۋ ءۇشىن ونى سۋمەن قامتۋعا ەنگىزۋ تۋرالى ناقتى تاپسىرما بەردى, – دەدى ن.الدابەرگەنوۆ. *  *  * مەملەكەت باسشىسى نۇرسۇلتان نازارباەۆ “سىر­بار” سىرتقى بارلاۋ قىزمەتىنىڭ ديرەكتورى امانجول جانقۇليەۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. ا.جانقۇليەۆ ۆەدومستۆونىڭ ودان ءارى قالىپتاسۋىنا باعىتتالعان ۇيىمداستىرۋ ماسەلەلەرىنىڭ شەشىمى تۋرالى باياندادى. كەزدەسۋ بارىسىندا سونداي-اق ۇلى وتان سوعىسىنداعى جەڭىستىڭ 65 جىلدىعىن مەرەكەلەۋدىڭ اياسىندا سىرتقى بارلاۋ ارداگەرلەرىنە قۇرمەت كورسەتۋدى ۇيىمداستىرۋ ءىس-شارالارى تۋرالى اڭگىمە بولدى.