مەملەكەتتىڭ ۇستانعان باعىتى, دامۋ دەڭگەيى جانە بارار جولى – ءاربىر ازامات ءۇشىن ماڭىزدى. وسىنىڭ ءبارىن سارالاپ, سالماقتاپ بايانداپ بەرەتىن, جەتكەنىمىز بەن الداعى مىندەتتەردى ايقىندايتىن قۇجات – جولداۋ. مەملەكەت باسشىسى ن.نازارباەۆتىڭ بيىلعى جولداۋى دا ەل كۇتكەن جاڭالىقتاردى ايتىپ, حالىقتىڭ بولاشاققا دەگەن سەنىمىن نىعايتىپ, تاۋەلسىز قازاقستانىمىزدىڭ كەلەشەك كەلبەتىن تاني تۇسۋىمىزگە وڭ اسەرىن تيگىزدى.
مەملەكەتتىڭ ۇستانعان باعىتى, دامۋ دەڭگەيى جانە بارار جولى – ءاربىر ازامات ءۇشىن ماڭىزدى. وسىنىڭ ءبارىن سارالاپ, سالماقتاپ بايانداپ بەرەتىن, جەتكەنىمىز بەن الداعى مىندەتتەردى ايقىندايتىن قۇجات – جولداۋ. مەملەكەت باسشىسى ن.نازارباەۆتىڭ بيىلعى جولداۋى دا ەل كۇتكەن جاڭالىقتاردى ايتىپ, حالىقتىڭ بولاشاققا دەگەن سەنىمىن نىعايتىپ, تاۋەلسىز قازاقستانىمىزدىڭ كەلەشەك كەلبەتىن تاني تۇسۋىمىزگە وڭ اسەرىن تيگىزدى.
جولداۋدىڭ «ءبىر ماقسات, ءبىر مۇددە, ءبىر بولاشاق» اتالۋى دا كوپۇلتتى قازاقستان حالقىنىڭ ءوزارا بىرلىگىن, تاتۋلىعىن, بولاشاقتى بىرگە قۇرۋعا جۇمىلا اتسالىسۋىن مەڭزەپ تۇر. رۋعا, جۇزگە, جەرگە, ۇلتقا بولىنبەي, بارشامىزدى «قازاقستان» دەگەن ورتاق مۇددە بىرىكتىرۋى قاجەت ەكەندىگىن العا تارتادى. جولداۋدىڭ تىرەگى – بىرلىك بولسا, ودان ءارى وسىدان تۋىندايتىن نەگىزگى تاقىرىپتار, ياعني ەل بولىپ دامۋ جولىنداعى تاپسىرمالار ايتىلادى. ول تاپسىرمالار نەگىزگى 10 باعىتتا توپتاستىرىلعان. مۇنىڭ قاي-قايسىسىنىڭ دا ەل دامۋى ءۇشىن اسا ماڭىزدى, قاجەتتى ەكەندىگى بەلگىلى.
مىسال ءۇشىن گەولوگيا سالاسىن الايىق. مەن گەولوگ ەمەسپىن, ءتىپتى, ءوندىرىس سالاسىنىڭ دا مامانى ەمەسپىن. ايتسە دە, مۇنايلى ءوڭىردىڭ ازاماتى رەتىندە, ايماقتىڭ الەۋمەتتىك-ەكونوميكالىق الەۋەتى بىزگە جاقسى تانىس, باق بەتتەرىنەن ۇنەمى قاداعالاپ وتىرامىز. ماڭعىستاۋدا مۇناي مەن گاز ءوندىرۋ كولەمى ءتۇسىپ كەتتى. بۇل ەڭبەك كۇشىنىڭ ازدىعىنان نەمەسە تەحنولوگيالىق تۇرعىدان ەمەس, جەر قىرتىسىنداعى قازبا بايلىقتار كولەمىنىڭ تومەندەۋىنەن تۋعان جاعداي. سوندىقتان وزگە جەرلەرگە گەولوگيالىق بارلاۋ جاساپ, كەن بايلىقتارىن انىقتاپ, يگەرۋ قاجەت. بۇل باعىتتا جالپى قوزعالىس بار, ايتسە دە, جولداۋ وسى قوزعالىستى جانداندىرىپ, ناقتى جۇمىستار جۇرگىزۋگە سەرپىن بەرەدى دەپ كۇتەمىز. سونداي-اق, جولداۋداعى وسى جولدار وقۋ ورىندارىنان گەولوگ ماماندىعىن الىپ شىعىپ, قازىر جۇمىس تاپپاي جۇرگەن جاستارىمىزدىڭ ءۇمىتىن ۇرلەدى.
ال اۋىل شارۋاشىلىعى – حالقىمىزدىڭ ەتەنە سالاسى, كۇنكورىس وزەگى. عىلىم مەن تەحنيكا دامي تۇسكەنمەن, اۋىل شارۋاشىلىعى ءوز ماڭىزىن جويمايدى. بىراق, بۇل سالانىڭ دا تولىققاندى دەڭگەيدە ءتورت اياعىن تەڭ باسىپ كەتە الماي كەلە جاتقانى جاسىرىن ەمەس. مۇنداي تۇستاردى ءبىز شيگە شانشىپ سىناي, كىنالاپ-كۇستانالاي جونەلمەي, تاۋەلسىزدىگىن العانىنا نەبارى 23 جىلعا قادام باسقان ەلىمىزدىڭ ءالى دە بولسا ۇلگەرە الماي جاتقان تۇستارى دەپ تۇسىنگەنىمىز ابزال. قاي نارسەنىڭ دە ۋاقىتى كەلەدى. بيىلعى جولداۋدا اۋىل شارۋاشىلىعى سالاسىندا اگرارلىق عىلىمدى دامىتۋ ارقىلى ەلىمىزدى ەكسپورتتاۋشى ەلگە اينالدىرۋ تاپسىرماسىنىڭ بەرىلۋى سالانىڭ بۇدان ارعى دامۋىنا قولداۋ بولماق.
«مەملەكەتىمىزدىڭ تىرەگى – باقىتتى جاندار» دەگەندەي, جولداۋداعى مەملەكەتتىك جانە ازاماتتىق, الەۋمەتتىك قىزمەتكەرلەر جالاقىسىنىڭ, ستۋدەنتتەر شاكىرتاقىسىنىڭ ءوسۋى حالىق اراسىنا تەز تاراپ, كوڭىلدەردى قۋانىشقا بولەدى.
ماڭعىستاۋ ونەر كوللەدجى – ەلىمىز تاۋەلسىزدىك العان سوڭ كوپ ۇزاماي قۇرىلعان, وتانىمىزدىڭ ونەرلى ۇل-قىزدارىن باۋلۋعا قاناتقاقتى تالاپتانعان جاس ءبىلىم وردالارىنىڭ ءبىرى. كوللەدجدىڭ تۇلەكتەرى قازىر وبلىسىمىزدىڭ ءبىلىم بەرۋ ورىندارىندا, مادەنيەت مەكەمەلەرىندە ەڭبەك ەتىپ ءجۇر, ءتىپتى, ولاردى ماڭعىستاۋدىڭ بارلىق اۋىلدارىنان كەزدەستىرۋگە بولادى. بۇدان ايتارىم, كوللەدج ەلىمىزدىڭ ءبىلىم بەرۋ سالاسىنا ءان مەن كۇيدەن, بەينەلەۋ ونەرىنەن ساباق بەرەتىن مۇعالىمدەر دايىنداسا, مادەنيەت سالاسىن اسپاپشىلار, ت.ب. ماماندىق يەلەرىمەن تولىقتىرۋدا. «قازاقستان جولى – 2050: ءبىر ماقسات, ءبىر مۇددە, ءبىر بولاشاق» جولداۋىندا وسى ەكى سالا مەملەكەت باسشىسى ن.نازارباەۆ نازارىنان تىس قالعان جوق. وزگە ەلدەرمەن ۇزەڭگى قاعىستىرا الاتىن ماماندار دايىنداۋ ءۇشىن باسەكەگە قابىلەتتى ۇلتتىق ءبىلىم بەرۋ جۇيەسىن قالىپتاستىرۋ جانە مادەنيەتكە قاتىستى ساياساتتىڭ تۇجىرىمداماسىن جاساۋ تاپسىرىلدى. بۇل تاپسىرمالار قوس سالانى جاڭارۋ, جاڭعىرۋ جولىنا تۇسىرەدى دەپ ويلايمىز.
ەندى قۇزىرلى ورىندار تاراپىنان ىسكەرلىك, تياناقتىلىق, جاۋاپكەرشىلىك بولۋى قاجەت, ال بارشا وتانداستارىمىز جولداۋعا ءوزارا تاتۋلىق, بىرلىكتى بەرىك ۇستانۋ جاعىنان ۇلەس قوسا الادى.
امانبەك سۇندەتوۆ,
ماڭعىستاۋ ونەر
كوللەدجىنىڭ ديرەكتورى.
اقتاۋ.
