بالانىڭ 7 جاسىندا قارىنشاارالىق قالقان اقاۋلارى انىقتالىپ, ونىڭ تريكۋسپيدالىق قاقپاقشاسىن تۇزەتكەن, بىراق بۇل وتا ءجيى كەزدەسەتىن اسقىنۋلارعا الىپ كەلدى.
«جۇرەكتە مۇنداي توسقاۋىل تۇرعاندا جۇرەكشەلەر مەن قارىنشالار اراسىندا بايلانىس بولمايدى. بۇل جۇرەكشەلەر مەن قارىنشالاردىڭ بولەك سوعۋىنا الىپ كەلەدى, ايتسە دە جۇرەك سينحروندى تۇردە جۇمىس ىستەۋى ءتيىس. بۇنداي جاعداي ادام ءۇشىن وتە قاۋىپتى جانە دەرەۋ ەمدەۋدى قاجەت ەتەدى. سولاي جاسالدى دا: وتادان كەيىن ناۋقاسقا ەلەكترودتارى بار ادەتتەگى كارديوستيمۋلياتور (ەكس) قويىلدى», دەيدى جۇرەك ورتالىعىنىڭ ماماندارى.
الايدا, وسى ۋاقىت ىشىندە بالا ءوستى, ياعني يمپلانتاتسيالانعان كارديوستيمۋلياتور مولشەرى ەندى سايكەس كەلمەيدى: ەلەكترود سوزىلا باستايدى.
«رەنتگەن سۋرەتتە ول دوعا ءتارىزدى كورىنەدى, بىراق قالىپتى جاعدايدا ەلەكترود تولقىندى بولۋى كەرەك», دەپ تۇسىندىرەدى ماماندار.
ەلەكترودتىڭ جارىلۋ قاۋپى ارتادى, سودان كەيىن جۇرەك جۇمىسىنا قايتا توسقاۋىل بولادى.
ء«بىز ەسكى كارديوستيمۋلياتورلىق جۇيەنى الىپ تاستاۋ كەرەك دەپ شەشتىك, سەبەبى ول ناۋقاسقا ەندى جارامايدى. وسىدان كەيىن جاڭا Micra AV ەلەكترودسىز كارديوستيمۋلياتورىن سالدىق. ناۋقاستىڭ جاعدايى ايتارلىقتاي جاقساردى, ال جۇرەكشەلەر مەن قارىنشالار اراسىنداعى سينحرونيزاتسيا 80 پايىزعا جەتتى», دەيدى جۇرەك ورتالىعىنىڭ ينتەرۆەنتسيالىق اريتمولوگيا ءبولىمىنىڭ مەڭگەرۋشىسى ايان ءابدىراحمانوۆ.
Micra AV – قوس كامەرالى ستيمۋلياتسيا قىزمەتىن اتقاراتىن, بار بولعانى تابلەتكانىڭ ولشەمىندەي عانا, الەمدەگى ەڭ كىشكەنتاي ەلەكترودتى كارديوستيمۋلياتور. ول تەك وڭ قارىنشاعا – جۇرەكتىڭ ءبىر كامەراسىنا ورناتىلادى. بىراق ول جۇرەكشەنىڭ جيىرىلۋىن تانۋىنا قاراي ەكى كامەرالى سەكىلدى جۇمىس ىستەيدى.
