ەكولوگيا • 18 تامىز، 2021

الماتىدا 300 مىڭ ءتۇپ اعاش وتىرعىزىلادى

41 رەت كورسەتىلدى

الماتى اكىمى باقىتجان ساعىنتاەۆ الداعى كۇزگى اعاش وتىرعىزۋ ماۋسىمى تۋرالى ايتتى، دەپ حابارلايدى Egemen.kz قالا اكىمدىگىنە سىلتەمە جاساپ.

«الماتى» تا-نىڭ Akimat Live باعدارلاماسىنىڭ تىكەلەي ەفيرىندە قالا اكىمى قىركۇيەك ايىنىڭ سوڭىندا باستالادى دەپ جوسپارلانعان كۇزگى ەكپەلەردىڭ ەرەكشەلىكتەرى تۋرالى باياندادى. اعاش وتىرعىزۋ جۇمىستارى بىرنەشە كەزەڭدە وتەدى.

ماسەلەن، اعاشتاردى جاپپاي وتىرعىزۋ ەلدى مەكەندەردىڭ بويىنا، سونىڭ ىشىندە، نەگىزىنەن ناۋرىزباي مەن الاتاۋ اۋداندارىنداعى العاباس، شۇعىلا جانە تاعى باسقا تۇرعىن كەشەندەرىنىڭ اينالاسىنا وتىرعىزىلادى. سونىمەن قاتار، ماگيسترالدى كوشەلەردىڭ - رىسقۇلوۆ، اباي، ءال-فارابي داڭعىلدارىنىڭ، تيميريازەۆ كوشەسىنىڭ بويىنا وتىرعىزىلادى. كوشەت جوق جەرلەرگە جانە ماگيسترالدى كوشەدەردەگى ۇڭگىلەۋ جۇمىستارى اياقتالعان – اباي داڭعىلى مەن الاتاۋ كوشەلەرىنىڭ بويىنا دا اعاشتار وتىرعىزىلماق.

ءۇي جانىنداعى اۋلالاردى كوگالداندىرۋ ءۇشىن تۇرعىندارمەن ءداستۇرلى «جاسىل اۋلا» اكتسياسى وتكىزىلەدى. بارلىعى 300 مىڭ اعاش وتىرعىزۋ جوسپارلانۋدا.

كوكتەمدە الماتىدا 64،5 مىڭ اعاش وتىرعىزىلدى. بيىل تامىر جايۋى تومەن ءارى اۋرۋعا بەيىم بولۋىنا بايلانىستى قالادا جوكە اعاشى، ساناعاش، بوز ارشا وتىرعىزىلمايدى.

مەگاپوليس اكىمى «جاسىل الماتى» اكتسياسى اياسىندا سوسنوۆىي بوردا 5،5 مىڭ قاراعاي وتىرعىزىلعانىن ايتتى. «تابيعات» ەىۇ قورىنىڭ باستاماشىل توبى ساياباق اۋماعىنا 350 قاراعاي مەن 500 الما اعاشىن وتىرعىزدى. جاسىل جەلەكتى كۇتۋ ءۇشىن ۇڭعىما جاسالىپ، سۋارۋ جۇيەسى تارتىلدى. اعاشتاردىڭ 80%-ى اۆتوماتتى جۇيەنىڭ ارقاسىندا سۋارىلادى.

سوڭعى جاڭالىقتار

ۇقساس جاڭالىقتار