«پرەزيدەنت جانىنداعى جاستار كادر رەزەۆرىنىڭ ۇلتتىق كوميسسياسى ەكىنشى كەزەڭدى وتكىزۋ, رەزەرۆتەردى ىرىكتەۋ مەن ونىڭ جوسپارىن بەكىتتى. رەزەرۆتەردى ىرىكتەۋ الداعى 1 قىركۇيەكتە باستالادى. سونىڭ ناتيجەسىندە مەملەكەتتىك سەكتور ءۇشىن 50 جاس رەزەرۆ تاڭداپ الىنادى», دەدى قر مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا وكق-دە ونلاين وتكەن ءباسپاسوز ءماسليحاتىندا.
سونداي-اق, اگەنتتتىك باسشىسى كانديداتتارعا قويىلاتىن نەگىزگى تالاپتارمەن تانىستىردى.
«كانديداتتارعا قويىلاتىن نەگىزگى تالاپتار سول بۇرىنعىسىنشا, قازاقستان رەسپۋبليكاسىنىڭ ازاماتى بولۋى ءتيىس, جاسى 35-تەن اسپاۋى كەرەك, جوعارى ءبىلىمى بار جانە ەڭبەك ءوتىلى 5 جىلدان كەم بولماۋى قاجەت. وسى جولعى جاستار رەزەۆتەرىنەن ءبىلىم مەن داعدىدان بولەك, قوعامداعى ماسەلەلەردەن حاباردار بولىپ, ونى شەشۋگە قىزىعۋشىلىق تانىتۋى جوعارى باعالانادى. سونىمەن قاتار ارنايى تاپسىرمالار بەرىلىپ, كانديداتتاردىڭ ءبىلىم-بىلىگى جاڭاشا باعالانادى. ىرىكتەۋ كەزەڭىنە مەملەكەت باسشىسى بۇعان دەيىن ساياسي, مەملەكەتتىك قىزمەت, اكىمشىلىك كورپۋس قىزمەتىنە تاعايىنداعان قىزمەتشىلەر قاتىسا المايدى. پرەزيدەنتتىك جاستار كادر رەزەۆرىندە بۇرىن بولعان ازاماتتاردىڭ قاتىسۋىنا بولمايدى», دەيدى ول.
ونىڭ ايتۋىنشا, ىرىكتەۋدەن وتكەندەر پرەزيدەنتتىك جاستار كادر رەزەرۆىندە 3 جىلعا دەيىن بولا الادى.
«ىرىكتەۋدەن وتكەن ماماندار مەملەكەتتىك قىزمەتكە زاڭ اياسىندا سايلانىپ, تاعايىندالاتىن بولادى. ەگەر كەز كەلگەن مەملەكەتتىك قىزمەتكە جاستار كادر رەزەرۆىندە جوق ماماننىڭ كانديتاتۋراسى كەلىپ تۇرسا, ول قىزمەتكە جاستار كادر رەزەرۆىندەگى ماماندى تاعايىنداۋ مىندەتتى ەمەس», دەدى ا. جايىلعانوۆا.
