12 تامىزدا تاراز قالاسى پوليتسيا باسقارماسىنىڭ جەدەل باسقارۋ ورتالىعى كەزەكشى ءبولىمىنىڭ «102» نومىرىنە بەلگىسىز ادامنان شوستاكوۆيچ كوشەسىندە ورنالاسقان «پرەستيج» كولىك جۋ ورنىنا جارىلعىش زات قويىلعانى تۋرالى حابارلاما كەلىپ ءتۇستى.
اتالعان مەكەنجايعا جەدەل جەتكەن پوليتسيا قىزمەتكەرلەرى شۇعىل كولىك جۋ ورنىنا جاقىن ورنالاسقان ۇيدەگى 12 تۇرعىندى ەۆاكۋاتسيالادى. بارلىق اۋماق تولىق تەكسەرىلدى, الايدا جارىلعىش زات تابىلعان جوق.
اتالعان دەرەككە قاتىستى قر قك 273-بابى (تەرروريزم اكتىسى تۋرالى كورىنەۋ جالعان حابارلاۋ) بويىنشا سوتقا دەيىنگى تەرگەۋ امالدارى باستالدى.
جەدەل-ىزدەستىرۋ شارالارى بارىسىندا پوليتسيا قىزمەتكەرلەرى جالعان اقپارات بەرىپ, تەلەفون سوقتى دەگەن كۇدىكپەن وبلىس ورتالىعىنىڭ 25 جاستاعى تۇرعىنىن انىقتادى. زاتتاي دالەل – ۇيالى تەلەفون تاركىلەندى.
قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنىڭ تالاپتارىنا سايكەس سوتقا دەيىنگى تەرگەپ-تەكسەرۋدىڭ قالعان دەرەكتەرى تەرگەۋ مۇددەسىندە جاريالاۋعا جاتپايدى.
پوليتسيا دەپارتامەنتى دايىندالىپ جاتقان تەرروريزم اكتىسى تۋرالى كورىنەۋ جالعان حابارلاما جىبەرگەنى ءۇشىن بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا, نە سول مولشەردە تۇزەۋ جۇمىستارىنا, نە بەس جىلعا دەيىنگى مەرزىمگە باس بوستاندىعىن شەكتەۋگە نەمەسە باس بوستاندىعىنان ايىرۋعا جازا قاراستىرىلاتىنىن ەسكەرتەدى.
