بۇگىن وبلىس اكىمى گۇلشارا ابدىقالىقوۆا توكيو وليمپياداسىنا قاتىسقان قىزىلوردالىق سپورتشىلار قامشىبەك قوڭقاباەۆ, داۋلەت نيازبەكوۆ پەن ءمولدىر جاڭبىربايمەن كەزدەستى.
ايماق باسشىسى قولا جۇلدەگەر قامشىبەك قوڭقاباەۆتى جانە ءدۇبىرلى دودادا ەل نامىسىن ابىرويمەن قورعاعان داۋلەت نيازبەكوۆ پەن ءمولدىر جاڭبىربايعا العىسىن ءبىلدىرىپ, سپورتشىلاردىڭ جەڭىسى ەل تاۋەلسىزدىگىنە ۇلكەن تارتۋ بولعانىن اتاپ ءوتتى.
«ەكى اپتا بويى وزدەرىڭە جانكۇيەر بولدىق. قامشىبەكتىڭ التىنعا بەرگىسىز قولا جۇلدەسى ەلدىڭ كوڭىلىن كوتەردى. تالاي ءبۇلدىرشىننىڭ قيالىنا قانات ءبىتىردى. ەل پرەزيدەنتىنەن مەملەكەتتىك تۋدى الۋ - ۇلكەن مارتەبە, زور سەنىم! بۇل مىندەتتى جەرلەسىمىز قامشىبەك قوڭقاباەۆ ابىرويمەن اقتاپ, بايراعىمىزدى وليمپيادا تورىندە جەلبىرەتتى», دەدى وبلىس اكىمى قۇتتىقتاۋ سوزىندە.
كەزدەسۋدە وبلىس اكىمى ەل نامىسىن ابىرويمەن قورعاپ شىققان بوكسشىعا «Toyota Camry 75» اۆتوكولىگىنىڭ كىلتىن تابىس ەتتى.
ال وليمپيادا ويىندارىنىڭ قاتىسۋشىلارى داۋلەت نيازبەكوۆ, ءمولدىر جاڭبىرباي جانە قامشىبەك قوڭقاباەۆتىڭ باپكەرى سەيىتجان توكەنوۆ 1 ميلليون تەڭگەنىڭ سەرتيفيكاتتارىمەن ماراپاتتالدى.
ەل مارتەبەسىن كوتەرگەن سپورتشىلارعا «Dalatex» جشس-ءنىڭ باسشىسى دىلمۇحامەد ابيزوۆ, «نۇرلەن» جشس-ءنىڭ باسشىسى قايرات بورانباەۆ, «مەليوراتور» جشس-ءنىڭ باسشىسى بەردىبەك مىحانوۆ جانە «ستاندارت ويل كزو» جشس-ءنىڭ باسشىسى ءادىل بيجانوۆ دەمەۋشىلىك كورسەتتى.
سونداي-اق, سالتاناتتى جيىندا aۋىر اتلەتيكادان 4 دۇركىن الەم چەمپيونى, قر ەڭبەك سىڭىرگەن سپورت شەبەرى يليا يلين قامشىبەكتى جەڭىسىمەن قۇتتىقتاپ, ءمولدىر مەن داۋلەتكە الداعى سايىستاردا ساتتىلىك تىلەدى.
