سولتۇستىك قازاقستان وبلىسىنىڭ پەتروپاۆل قالاسىنداعى پروكۋراتۋرا قىزمەتكەرلەرى مەن سوت ورىنداۋشىلارى جول ساقشىلارىمەن بىرلەسىپ, موينىندا بەرەشەگى بار جۇرگىزۋشىلەردى تارتىپكە شاقىرۋعا كىرىستى. بۇل تۋرالى «حابار» تەلەارناسى حابارلادى.
قالا كوشەلەرىنە شىققان قۇقىق قورعاۋ قىزمەتكەرلەرى كولىكتەردى جاپپاي توقتاتىپ, تەكسەرۋ جۇرگىزدى. شارانىڭ العاشقى ساعاتىندا قارىزدان جالتارىپ جۇرگەن 13 ادام انىقتالىپ, ولارعا ەسكەرتۋ جاسالدى. ال تولەۋ مەرزىمى ۇزارتىلعان بورىشكەرلەردىڭ كولىگى ايىپپۇل تۇراعىنا قامالادى. قۇزىرلى ورگان قىزمەتكەرلەرىنىڭ ايتۋىنشا, ءبىر عانا پەتروپاۆل قالاسىندا 28 مىڭ حاتتاما وتەلمەگەن. ول بويىنشا جول ەرەجەسىن بۇزعاندار مەملەكەتكە 100 ملن. تەڭگە قارىز كورىنەدى.
«بورىشكەرلەردىڭ دەنى ايىپپۇلدارىن وتەۋگە اسىقپايدى نەمەسە ول تۋرالى مۇلدەم بىلمەيدى. ماسەلەن, جىلدامدىقتى اسىرىپ, بەينە باقىلاۋعا ءتۇسىپ قالعان جۇرگىزۋشىلەردىڭ حاتتامالارى مەكەن-جاي بويىنشا جەتپەي جاتادى», - دەيدى پەتروپاۆل قالالىق پروكۋرورىنىڭ كومەكشىسى ادىلەت باشىكوۆ.
باقىتبەك كەنەش ۇلى.
دەرەككوز: «حابار» تەلەارناسى
فوتو: News. nur.kz.
