ء«بىلىم بەرۋدىڭ ءداستۇرلى فورماتىنا ورالۋ تۋرالى شەشىم قابىلداندى. وسىعان وراي وقۋشىلار مەن پەداگوگتەردىڭ قاۋىپسىزدىگى مەن دەنساۋلىعىن ساقتاۋدى قامتاماسىز ەتۋ بويىنشا ۇيىمداستىرۋشىلىق ماسەلەلەردى بارىنشا تەزدەتىپ شەشۋ قاجەت», دەدى اسقار مامين.
ۇكىمەت باسشىسى وسىعان بايلانىستى ءبىلىم جانە عىلىم, دەنساۋلىق ساقتاۋ مينيسترلىكتەرىنە, وڭىرلەردىڭ اكىمدىكتەرىنە بىرقاتار تاپسىرما بەردى.
«جاڭا وقۋ جىلىندا مەكتەپكە دەيىنگى جانە ورتا ءبىلىم بەرۋ ۇيىمدارىندا, سونىمەن قاتار كوللەدجدەر مەن جوعارى وقۋ ورىندارىندا وقۋ شتاتتىق رەجيمدە قامتاماسىز ەتىلسىن. ءبىلىم مينيسترلىگى اكىمدىكتەرمەن بىرلەسىپ, ءاربىر مەكتەپكە ءداستۇرلى فورماتتا وقۋ بويىنشا ناقتى ۇسىنىمداردى جەتكىزسىن. وسى جىلعى 25 تامىزعا دەيىن مەديتسينالىق قارسى كورسەتىلىمدەرى بار ادامداردان باسقا, پەداگوگتار مەن تەحپەرسونالدى ۆاكتسينالاۋمەن 100 پايىز قامتاماسىز ەتسىن», دەدى اسقار مامين.
ۇكىمەت باسشىسى بارلىق ءبىلىم بەرۋ ۇيىمىن وقۋ جىلىن باستاۋعا 100 پايىز دايىن بولۋىن ەسكەرتتى.
«مەكتەپتەردە جوندەۋ جۇمىستارىن ۋاقىتىندا اياقتاۋ قاجەت. ماسەلەن, جوندەۋ جۇمىستارى اياقتالماعان مەكتەپتەردىڭ ەڭ كوبى الماتى وبلىسىندا – 9 مەكتەپ, ودان كەيىن قوستاناي وبلىسىندا – 6, باتىس قازاقستان وبلىسىندا – 5. اكىمدەرگە قويىلاتىن مىندەت – بارلىق ءبىلىم بەرۋ ۇيىمدارى وقۋ جىلىن باستاۋعا 100 پايىز دايىن بولۋى ءتيىس. بالالاردىڭ قاۋىپسىزدىگى, تاماقتاندىرۋ جانە مەكتەپكە جەتكىزۋ بويىنشا بارلىق ماسەلەلەر شەشىمىن تابۋى كەرەك», دەدى ا.مامين.
