ەكونوميكا • 10 تامىز، 2021

ارزان ءھام قىمبات جانارماي

99 رەت كورسەتىلدى

بىزدە ءجيى قىمباتتايتىن، سونىسىمەن حالىقتى ارا-تۇرا ءبىر سىلكىنتىپ قوياتىن تاۋاردىڭ ءبىرى – بەنزين. سوڭعى ءبىر جىلدا جانارماي باعاسى 14 پايىزعا وسكەن. ءسويتىپ قىمباتسىناتىن بەنزينىمىز ەۋروپا ەلدەرىندەگى باعامەن سالىستىرعاندا الدەقايدا ارزان.

ارينە، كارى قۇرلىقتاعى بەنزين بىزدىكىنەن قىمبات ەكەن دەپ قۋانباسىمىز بەلگىلى. ءبىزدىڭ تەڭگەنىڭ قانشالىقتى قۇنسىز ءارى جالاقىنىڭ قانشالىقتى تومەن ەكەنىن ەسكەرگەندە، قۋانۋعا ەشبىر قۇلقىڭىز دا بولا قويماس.

Energyprom اگەنتتىگىنىڭ دەرەگىنە سۇيەنسەك، بيىل بەس ايدا قازاقستاندا اۆياتسيالىق وتىندى قوسا ەسەپتەگەندە، 1،9 ملن توننا بەنزين ءوندىرىلىپتى. پاۆلودار مۇناي حيميا زاۋىتى جۇكتەمەنى بىلتىرعىعا قاراعاندا 38،6 پايىزعا جوعارى ورىنداپ (5 ايدا – 678،5 مىڭ توننا)، ءوندىرىستىڭ وركەندەۋىنە ۇلكەن ۇلەس قوسقان. كەرىسىنشە، اتىراۋ مۇناي وڭدەۋ زاۋىتى 13 پايىز مينۋسقا كىرگەن. زاۋىتتىڭ بەس ايداعى ءوندىرىس كولەمى – 418،5 مىڭ توننا. شىمكەنتتە ورىن تەپكەن ەلدەگى ءۇشىنشى ءىرى زاۋىت – «پەتروقازاقستان» جشس-ءنىڭ وندىرىسىنە قاتىستى رەسمي دەرەك ۇسىنىلماعان. دەگەنمەن جوبالاپ ەسەپتەۋ بويىنشا شىمكەنت زاۋىتى جىل باستالعالى 749 مىڭ توننا بەنزين وندىرگەن. ال بۇل بىلتىرعى كورسەتكىشتەن 6 پايىزعا از.

بەنزينگە كەلگەندە يمپورتقا اسا تاۋەلدى ەمەسپىز. يمپورتتىڭ ۇلەسى 0،03 پايىز دەڭگەيىندە عانا ەكەن. ياعني ءوزىمىزدىڭ بەنزين ءوز نارىعىمىزدى تولىعىمەن جارىلقايدى. ونىمەن قويماي، ەكسپورتتايمىز دا. بيىل 100 مىڭ توننا بەنزين سىرتقا ساتىلعان. دەگەنمەن مۇنىڭ ءوزى – 2020-داعى مەجەدەن 32،4 پايىزعا از كورسەتكىش. Picodi.com دەرەگىنشە، بۇكىل ەۋروپا مەن تمد-نى شارلاپ شىقساڭىز دا قازاقستانداعىداي ارزان بەنزين تاپپايسىز. ەلدەگى بەنزيننىڭ ورتاشا باعاسى العاشقى جارتى جىلدىقتا 185،51 تەڭگە (0،44 دوللار) بولعان. ال ەڭ قىمبات بەنزين فينليانديادا ساتىلادى – 1،90 دوللار. ءبىزدىڭ ۆاليۋتامەن ەسەپتەگەندە – 806 تەڭگە.

بىراق بەنزين يندەكسى بويىنشا، ياعني جالاقىڭىزعا ساتىپ الا الاتىن بەنزين كولەمى بويىنشا قازاقستان بىرنەشە ەلگە جول بەرەدى. ورتا ەسەپپەن ءار قازاقستاندىق ورتاشا ايلىق جالاقىعا (سالىقتى ەسەپتەمەگەندە) 1 015 ليتر جانارماي ساتىپ الادى. رەيتينگتىڭ كوش باسىندا گەرمانيا (1 786 ليتر)، ودان كەيىن شۆەتسيا (1 771 ليتر) مەن فينليانديا (1 589 ليتر) ەلدەرى تۇر. كورشىلەس ەلدەرگە كوز جۇگىرتەر بولساق، ورتاشا جالاقىعا رەسەي – 938، بەلارۋس – 637، ازەربايجان – 561، مولدوۆا – 358، قىرعىزستان – 355، وزبەكستان – 317، ارمەنيا – 309، تاجىكستان ازاماتتارى 167 ليتر ساتىپ الادى ەكەن.

ماقتانۋعا تاتىرلىق مۇنداي كورسەت­كىش­تەر كوپ بولعانىمەن، ەلدەگى بەنزين باعاسىنىڭ قىمباتتاۋى قالتاعا سالماق ءتۇسىرىپ جاتقانىن جاسىرىپ جابا المايمىز. وڭىرلىك ءبولىنىس بويىنشا اسىرەسە، باتىس قازاقستان وبلىسىندا (+17،2 پا­يىز)، تۇركىستان وبلىسىندا (+17 پايىز) جانە شىمكەنت قالاسىندا (+16،5 پايىز) باعا قاتتى وسكەن. بۇل رەتتە اي-98 – 12،7، اي-92 – 13،6، اي-95/96 14،4 پايىزعا قىمباتتاپتى.

«بايديلدينوۆ. نەفت» اۆتورلىق جو­باسىنىڭ جۇرگىزۋشىسى ولجاس ءباي­دىل­دينوۆتىڭ ايتۋىنشا، بيىل كوپ­شى­لىك كوپ تۇتىناتىن اي-92 بەنزينىنىڭ باعاسى 190 تەڭگەدەن اسپايدى.

– اي-92 شامامەن ليترىنە 180 تەڭگە ماڭايىندا توقتايدى. الداعى جاعدايعا قاتىستى قانداي دا ءبىر بولجام ايتۋ قيىن. 2025 جىلعا تامان ەاەو اياسىندا ءبىزدىڭ ەل دە مۇناي، گاز جانە باسقا دا مۇناي ونىمدەرىنە قاتىستى تەڭ تابىستاعى باعاعا اۋىسادى. بۇل دەگەنىڭىز ءونىم باعاسىنىڭ الەمدىك نارىقتاعى ەكسپورتتىق باعا ەسەبىنەن (تاسىمالداۋ، كەدەندىك باج سالىعىن ەسەپتەمەگەندە) قالىپتاساتىنىن بىلدىرەدى. دەمەك ءبىز الەمدىك باعاعا ۇمتىلا باستايمىز. ال ەاەو قاتارىنان شىعايىق دەيتىن بولساق، وندا دسۇ الدىندا دا وسىعان ۇقساس مىندەتتەمەمىز بار ەكەنىن ۇمىتپاۋىمىز كەرەك. باعانى نارىق ءوزى بەلگىلەۋى كەرەك. بەنزين باعاسى تەك يمپورتتاۋشى عانا ەمەس، ەكسپورتتاۋشى ەلدەردە دە ءوسىپ جاتىر، – دەيدى ساراپشى.

سوڭعى جاڭالىقتار

ۇلى دالا مۇرالارى

ەلوردا • كەشە

ەكى جۇلدە – «ەگەمەندىكتەردە»

ەگەمەن قازاقستان • كەشە

تبيليسيدە توپ جاردى

سپورت • كەشە

كاردينگ شابۋىلى

قوعام • كەشە

ۇقساس جاڭالىقتار