«ساراپشىلار ستاتيستيكالىق دەرەكتەر مەن مودەلدەۋ نەگىزىندە 2030 جىلعا قاراي جۇمىس كۇشىنىڭ سانى 9,7 ميلليون ادامعا جەتەدى, 2040 جىلى بۇل كورسەتكىش 10,7 ميلليوندى قۇرايدى, ال 2050 جىلعا قاراي جۇمىس كۇشى 11,4 ميلليونعا دەيىن وسەدى دەپ ەسەپتەيدى», دەپ جازادى قر ەحاقم ءباسپاسوز قىزمەتى.
بولجامنىڭ نەگىزگى ستسەناريى بويىنشا 2030 جىلعا قاراي ەل حالقى شامامەن 20,7 ميلليون ادامدى قۇرايدى, 2040 جىلعا قاراي بۇل كورسەتكىش 22,9 ميلليون ادامعا دەيىن, ال 2050 جىلعا قاراي 25,5 ميلليون ادامعا دەيىن وسەدى دەپ كۇتىلۋدە.
«بولجامعا سايكەس, 2030 جىلعا قاراي تۋدىڭ جوعارى دەڭگەيى مەن حالىقتىڭ قارتايۋىنا بايلانىستى جۇمىس كۇشىنىڭ حالىققا پايىزدىق قاتىناسى 46,7%-عا دەيىن تومەندەيدى. بۇل ەكونوميكالىق بەلسەندى حالىققا جۇكتەمە ارتادى دەگەندى بىلدىرەدى», دەيدى مدم بولجامداۋ دەپارتامەنتىنىڭ ديرەكتورى دميتري شۋمەكوۆ.
تۇرعىندار سانىنىڭ ەڭ كوپ ءوسۋى رەسپۋبليكالىق ماڭىزى بار قالالاردا كۇتىلەدى: نۇر-سۇلتان - 2,7 ەسە (1,9 ميلليونعا), الماتى - 1,8 ەسە (1,6 ميلليونعا) جانە شىمكەنت - 2,4 ەسە (1,5 ميلليونعا).
بۇدان باسقا, ماڭعىستاۋ وبلىسىنىڭ حالقى ەكى ەسەگە (1,4 ميلليون ادامعا دەيىن), 500 مىڭعا - تۇركىستان (2,5 ميلليونعا دەيىن), 700 مىڭعا - الماتى (2,8 ميلليونعا دەيىن) وسەدى.
اعىمداعى تۋ, ءولىم-ءجىتىم جانە كوشى-قون كوەففيتسيەنتتەرى كەزىندە شىعىس قازاقستان, قاراعاندى, قوستاناي, سولتۇستىك قازاقستان, پاۆلودار جانە اقمولا وبلىستارىندا حالىق سانىنىڭ بىرتىندەپ تومەندەۋى بايقالاتىن بولادى. الايدا, ەگەر كورسەتىلگەن وڭىرلەردە تۋدىڭ جيىنتىق كوەففيتسيەنتى ۋاقىت وتە كەلە ايتارلىقتاي وسسە جانە ەميگراتسيا تومەندەسە, اتالعان وڭىرلەردىڭ حالىق سانى تۇراقتانۋى مۇمكىن.
جالپى, 2050 جىلعا دەيىنگى ۇزاق مەرزىمدى دەموگرافيالىق بولجام مىناداي باعىتتار بويىنشا جاسالدى: حالىقتىڭ جالپى سانى, حالىقتىڭ جاس قۇرامى, 2050 جىلعا قاراي ستسەناريلەر بويىنشا جاس قۇرامىنداعى ايىرماشىلىقتار, وڭىرلىك سايكەسسىزدىكتەر, وڭىرلەر بويىنشا حالىق سانى, دەموگرافيالىق ديناميكا, جۇمىس كۇشىنىڭ سانى, جۇمىس كۇشىنىڭ قۇرىلىمى مەن ورتاشا جاسى, ونىڭ وڭىرلىك سايكەسسىزدىكتەرى, وڭىرلەر بويىنشا ءبولۋ.
بۇدان باسقا, بۇدان ءارى 2021 جىلعى دەموگرافيالىق كورسەتكىشتەردىڭ ناقتى وزگەرىستەرى نەگىزىندە (حالىق ساناعىن ەسكەرە وتىرىپ) وسى بولجامعا تۇزەتۋ جۇرگىزۋ جوسپارلانۋدا.
«بولجام ءتورت قۇرامداس بولىكتىڭ نەگىزىندە قۇرىلعان: حالىقتىڭ باستاپقى ناقتى سانى, تۋ, ءولىم-ءجىتىم جانە حالىقتىڭ كوشى-قون قوزعالىسى», دەپ ءتۇسىندىردى دميتري شۋمەكوۆ.
