...جاۋ توقتاتۋدىڭ ورنىنا, جاۋ جوق جەردە جاۋ شاقىراتىن باتىرلار دا كوپ بولعان, داۋ توقتاتۋدىڭ ورنىنا داۋ شاقىراتىن دا بيلەر كوپ بولعان. اشەيىندە قۇلاق تىنىش وتىرعاندا ءوزى كيلىگەتىن بيلەر ەمەس, قۇلاقتان مازا كەتىپ, ارىڭ توگىلىپ بارا جاتقاندا ءسوز باستايتىن ءدىلمارلار كەرەك. ەڭ دۇرىسى ءسوزدى دە, قولدى دا باستاتپاۋعا تىرىساتىن, ەلدىڭ تىنىشتىعىن, اعايىننىڭ اماندىعىن ساقتايتىن ەلدارلار كەرەك.
...جاۋ توقتاتۋدىڭ ورنىنا, جاۋ جوق جەردە جاۋ شاقىراتىن باتىرلار دا كوپ بولعان, داۋ توقتاتۋدىڭ ورنىنا داۋ شاقىراتىن دا بيلەر كوپ بولعان. اشەيىندە قۇلاق تىنىش وتىرعاندا ءوزى كيلىگەتىن بيلەر ەمەس, قۇلاقتان مازا كەتىپ, ارىڭ توگىلىپ بارا جاتقاندا ءسوز باستايتىن ءدىلمارلار كەرەك. ەڭ دۇرىسى ءسوزدى دە, قولدى دا باستاتپاۋعا تىرىساتىن, ەلدىڭ تىنىشتىعىن, اعايىننىڭ اماندىعىن ساقتايتىن ەلدارلار كەرەك.
ەكى جولبارىستى سوڭىنا ەرتكەن, ءوزى ءۇشىنشى جولبارىس سياقتى بولىپ, ايبىنىن اسىرعان جاۋ تۇسىرەتىن باتىر جانىبەكتىڭ بۇگىنگى ۇرپاق ءۇشىن قادىرلى بولاتىندىعى, كىسىنىڭ تاعدىرىن ءبىر اۋىز سوزبەن شەشكەن بي جانىبەكتىڭ ءبىز ءۇشىن قادىرلى بولاتىندىعى, ەڭ الدىمەن, سول باتىرلىعىمەن, سول بيلىگىن ەلدارلىققا جۇمساعاندىعى – دەيدى جانىبەك تارحان جايلى «اسىل ءسوز» باسپاسىنان جارىق كورگەن «شاقشاق جانىبەك قوشقار ۇلى» دەگەن جاڭا كىتاپتا دەگدار ءابىش كەكىلباي ۇلى.
قازاقستان رەسپۋبليكاسى ءمادەنيەت جانە اقپارات مينيسترلىگى اقپارات جانە مۇراعات كوميتەتى «ادەبيەتتىڭ الەۋمەتتىك ماڭىزدى تۇرلەرىن باسىپ شىعارۋ باعدارلاماسى» بويىنشا «اقتابان شۇبىرىندى, القاكول سۇلاما» تۇسىندا قابىرعا قايىسىپ, تىلەرسەگى مايىسىپ, تەنتىرەگەن ەل جەرىنەن اۋىپ, قايىڭدى ساۋىپ, قينالعان تۇستا قول باستاعان باتىرلاردىڭ ءبىرى, ءسوز باستاعان شەشەننىڭ ءبىرى, قاھارماندىعى بۇقار, تاتىقارا جىراۋلاردىڭ توگىلگەن جىرلارىنا ارقاۋ بولعان شاقشاق جانىبەك باتىردىڭ 320 جىلدىعىنا ورايلاستىرىپ جەتپىسباي بەكبولات ۇلى قۇراستىرعان بۇل كىتاپتا باتىردىڭ ءومىرى, ونىڭ شىققان تەگى, جاساعان ەرلىك ىستەرى جايىندا مول ماعلۇمات بەرىلىپتى.
«ەل ۇستاساڭ كەك ۇستاما», «بيلىك ايتۋ وڭاي, ءبىلىپ ايتۋ قيىن», «ويلاسىپ كەسسەڭ قول اۋىرمايدى», «بايلىقتىڭ بايلامى – ءبىرلىك», «حاننىڭ قايىرىمى – شەكسىز, حالىقتىڭ قايراتى – شەكسىز», «تۋعان جەردىڭ تورعايى دا سۇيكىمدى» دەگەندەي كۇنى بۇگىنگە دەيىن شاقشاق جانىبەك ايتىپتى دەگەن قاناتتى سوزدەرىمەن, تولعاپ تا تۋرا ايتار كەسىكتى دە كەسىمدى ويىمەن, ەل تاعدىرىنا بويلاسا تەرەڭگە كەتەر شەشىمىمەن, ەل قورعاسا نايزاسىنىڭ قۋاتى قاقىراتىپ سوگەر قابىرعا, ايبىندى ەرلىك ىسىمەن حالقىنىڭ جادىندا جاتتالعان باتىر بابا ەسىمى جيناقتى پاراقتاي وتىرعاندا بۇرىنعىدان دا بيىكتەپ, ەڭسەلەنە تۇسەدى.
كىتاپتىڭ ءبىرىنشى بولىمىنە «شاقشاق جانىبەك جانە ونىڭ ۋاقىتى» دەگەن ومىرزاق جولىمبەتوۆتىڭ دەرەكتى حيكاياتى بەرىلسە, ەكىنشى بولىمىنەن يمانجان جىلقايدار ۇلى مەن سەرىكباي وسپان ۇلىنىڭ شاقشاق جانىبەك تۋرالى داستاندارى ورىن الىپتى. ال سوڭعى ءۇشىنشى بولىمدە عافۋ قايىربەكوۆ, سابىرجان شۇكىر ۇلى, بولاتبەك الدەن ۇلى, سۇلتانعالي وسپانوۆتىڭ باتىر جايىندا جازعان كوڭىلگە وي ءتۇيدىرىپ, سانانى سەلت ەتكىزىپ, جانىڭا ەرلىك پەن ەلدىكتى قادىرلەۋدىڭ قانشالىقتى ۇلگى بولاتىندىعىن كورسەتكەن ويلى ماقالالارى جيناقتالىپتى. سونىمەن قاتار, بۇل جيناقتا باتىرعا قاتىستى قۇندى مۇراعات دەرەكتەرىنە دە ورىن بەرىلگەن ەكەن. قاراپ وتىرىپ, ءبىر باتىر تۇلعاسىنىڭ بيىكتىگىن عانا باعالايتىن ەمەس, تۇتاستاي ءداۋىردىڭ, ساياساتتىڭ, تاريحتىڭ قالاي اينالعاندىعىن كورسەتەتىن قۇندى قۇجاتتاردىڭ كىتاپتىڭ مازمۇنى مەن ءمانىن دە اشا تۇسكەنىن اڭعاراسىڭ.
انار تولەۋحانقىزى,
«ەگەمەن قازاقستان».
