ويپىرم-اي, وڭتۇستىكتە ورىن العان وسىناۋ ءبىر وقيعانى كورسەتپەگەن, جازباعان اقپارات قۇرالدارى قالمادى عوي دەيمىن. ەلدىڭ ءبارى جاڭا جىل مەرەكەسىن تويلاپ, ەرتەڭىنە ەندى ەستەرىن جيناپ جاتقان كەزدە بەلگىسىز كەلىنشەك شىمكەنتتىڭ شەتىندەگى قايتپاس ەلدى مەكەنىندەگى ءبىر ءۇيدىڭ اۋلاسىنا ءۇش بىردەي جاس بالاسىن تاستاپ كەتىپتى.
ويپىرم-اي, وڭتۇستىكتە ورىن العان وسىناۋ ءبىر وقيعانى كورسەتپەگەن, جازباعان اقپارات قۇرالدارى قالمادى عوي دەيمىن. ەلدىڭ ءبارى جاڭا جىل مەرەكەسىن تويلاپ, ەرتەڭىنە ەندى ەستەرىن جيناپ جاتقان كەزدە بەلگىسىز كەلىنشەك شىمكەنتتىڭ شەتىندەگى قايتپاس ەلدى مەكەنىندەگى ءبىر ءۇيدىڭ اۋلاسىنا ءۇش بىردەي جاس بالاسىن تاستاپ كەتىپتى.
نەبارى ءۇش جاستاعى ءبۇلدىرشىن قىز ەكى جاسار ءىنىسىن قاسىنا, سەگىز ايلىق ءسىڭلىسىن قولىنا الىپ, قاردىڭ ۇستىندە جىلاپ وتىر ەكەن. اياز سورىپ, بۇرسەڭ قاققان بالالاردى سول ءۇيدىڭ ايەلى تاۋىپ الىپ, ۇيىنە كىرگىزىپ, قۇقىق قورعاۋ ورگاندارىنا حابار بەرگەن. «بالا جالاڭاياق ەكەن. بۇتىنا «جىبەرىپ» قويىپتى, ونىسى قاتىپ قالعان. ۇلكەن سومكەنى اشسام, ىشىندە ءالدي جاتىر. ول دا جۇقا كيىنگەن» دەپ سۇحبات بەردى رەسپۋبليكالىق تەلەارنالارعا بالالاردى تاۋىپ العان ايەل. وسىناۋ ايانىشتى اقپارات, ارينە, ەلدى ءدۇر سىلكىندىرىپ, اشۋ-ىزاسىن تۋعىزدى. ءسۇپ-سۇيكىمدى ءۇش ءبۇلدىرشىندى تەلەديداردان كورگەندەردىڭ «قانداي عانا قاتىگەز انا وسىنداي بەيكۇنا بالالاردى كوشەگە قيىپ تاستاپ كەتتى ەكەن؟» دەپ جۇرەكتەرى قان جىلاعانى انىق. سونىمەن, پوليتسيا «كوكەك اناعا» ىزدەۋ جاريالادى.
ءبارى كەيىن بەلگىلى بولدى عوي. باياعىدا اجەلەرىمىز بالانى ۇيىقتاتاردا «ءالدي, ءالدي, بالادان, تاۋىپ العان دالادان, دالادا بالا جاتا ما, ءتۇسىپ قاپتى شانادان...» دەپ الديلەۋشى ەدى. سول ايتپاقشى, بۇل بالالار ابايسىزدا شانادان ءتۇسىپ قالماعان ەكەن. ءۇش بىردەي بالاسىن قارعا وتىرعىزىپ كەتتى دەگەن انا دا تابىلدى. اقپاراتتىڭ قايدان شىققانىن قايدام, بىرەۋلەر ونى جەڭىل ءجۇرىستى ايەل ەكەن دەپ تە جاتتى. ونىڭ قانشالىقتى راس-وتىرىگىن ءبىر قۇداي بىلەر, بىراق ايەل ءوزىنىڭ قۇرىلىستا جۇمىس ىستەيتىنىن ايتتى. ەڭ قىزىعى, بالكىم, سۇمدىعى شىعار, ءۇش ءبۇلدىرشىندى تاۋىپ العان ايەل بالالارعا بوتەن بولمادى, تۋعان اجەسى بولىپ شىقتى. «1 قاڭتار كۇنى كەشكى ساعات بەستەردە ەنەم تەلەفون شالىپ, «بالالاردى ماعان ۇيگە اكەلىپ بەر», دەپ ايتتى. ۇشەۋىن كيىندىرىپ اپارىپ, ءوز قولىنا تاپسىرىپ كەتتىم. وسىنىڭ ءبارىن قايىنسىڭلىم كورىپ تۇردى. ءوز بالا-شاعامدى قالاي كوشەگە تاستايمىن؟» دەپ شىرىلدايدى ءۇش بالانىڭ اناسى. ونىڭ ايتۋىنشا, كۇيەۋى ەكەۋى ازاماتتىق نەكەدە بولعان. بىراق, سوڭعى جىلدارى بىرگە تۇرمايتىن كورىنەدى. سودان بولار, ەنەسى ەكەۋىنىڭ اراسى جاقسى ەمەس. مىنە, بار جاعداي وسى.
ارينە, ءومىر بولعان سوڭ, ەنە مەن كەلىننىڭ جاۋلىعى, ارازدىعى, دۇردارازدىعى تۋرالى تالاي اڭگىمەلەردى ەستىپ, كەيبىرىن كوزىمىز دە كورىپ ەدى. بىراق, «اپام دا اڭ-تاڭ, مەن دە اڭ-تاڭ» دەمەكشى, مىناداي سۇمدىق جاعداي ەلدى ايران-اسىر قىلىپ, جۇرەكتەرىن ۇستاتتى. بۇل جەردە ەنەنى دە, انانى دا اقتاۋعا بولمايدى. ەگەر وقيعا شىنىندا وسىلاي وربىگەن بولسا, تۋعان نەمەرەلەرىن تانىماي نەمەسە تانىعىسى كەلمەي, ەل-جۇرتقا «دالادان تاۋىپ الدىم» دەپ جاريا قىلعانداعى اجەنىڭ ماقساتى نە؟ مەيلى, كەلىنىمەن اراز ەكەن, بىراق, وسى داۋدى ءۇي ىشىندە-اق, اعايىن اراسىندا-اق شەشۋگە بولمادى ما؟ جالپى, بۇل وقيعادا كىمگە سەنۋگە بولادى؟ بالالاردىڭ اكەسى قايدا؟ ول نەگە ۇندەمەيدى؟ ەندى, مىنە, ەنە مەن كەلىننىڭ ارازدىعىنان بەيكۇنا ءۇش ءسابي جاپا شەگىپ وتىر. ءىس تولىق بىتكەنشە 3 جاسار كەرەمەت بەيىمدەۋ ورتالىعىندا, باۋىرلارى ميراس پەن كاۋسار قالالىق بالالار اۋرۋحاناسىندا قالاتىن بولدى. ويتكەنى, ءالى كۇنگە ءۇش بالانىڭ دا تۋ تۋرالى كۋالىكتەرى جوق. «ءوزىنىڭ اتا-انالىق مىندەتىن دۇرىس ورىنداماعانى ءۇشىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق كودەكسىنىڭ 111-بابى بويىنشا جاۋاپكەرشىلىككە تارتىلاتىن بولادى. بۇل باپتا ارنايى ايىپپۇل قارالعان. قازىر تەرگەۋ امالدارى جۇرگىزىلىپ جاتىر. اياقتالعان سوڭ بارلىعى تولىق بەلگىلى بولادى», – دەيدى ەڭبەكشى اۋداندىق پوليتسيا ءبولىمى باستىعىنىڭ ورىنباسارى الماس مىرزاحمەتوۆ.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
