شىنىن ايتۋ كەرەك, شاڭى شىعىپ جاتقان شايان اۋىلىنىڭ شەتىنەن سالىنىپ جاتقان وسىناۋ الىپ عيماراتتى العاش كورگەنىمىزدە «ايدالادا اپپاق بولىپ تۇرعان بۇل نە قىلعان وتاۋ؟» دەپ اڭ-تاڭ بولعانىمىز راس. اۋدان باسشىلارىنىڭ اۋزىنان «بۇل كوللەدجدىڭ عيماراتى عوي» دەگەندى ەستىگەندە, «ويپىرماي, بار-جوعى ەلۋ مىڭنىڭ ۇستىندە حالقى بار بايدىبەك اۋدانىنان بۇل وقۋ ورنىن تولتىراتىن وقۋشى تابىلا ما؟» دەگەن سۇراقتىڭ دا كوكەيدە تۇرىپ العانىن جاسىرۋعا بولماس.
شىنىن ايتۋ كەرەك, شاڭى شىعىپ جاتقان شايان اۋىلىنىڭ شەتىنەن سالىنىپ جاتقان وسىناۋ الىپ عيماراتتى العاش كورگەنىمىزدە «ايدالادا اپپاق بولىپ تۇرعان بۇل نە قىلعان وتاۋ؟» دەپ اڭ-تاڭ بولعانىمىز راس.اۋدان باسشىلارىنىڭ اۋزىنان «بۇل كوللەدجدىڭ عيماراتى عوي» دەگەندى ەستىگەندە, «ويپىرماي, بار-جوعى ەلۋ مىڭنىڭ ۇستىندە حالقى بار بايدىبەك اۋدانىنان بۇل وقۋ ورنىن تولتىراتىن وقۋشى تابىلا ما؟» دەگەن سۇراقتىڭ دا كوكەيدە تۇرىپ العانىن جاسىرۋعا بولماس. جاقىندا وسى عيماراتتىڭ اشىلۋ ءراسىمى ءوتتى. مىنە, سول سالتاناتتى جيىندا جوعارىداعى ويىمىزدىڭ مۇلدەم قاتە ەكەنىن, شاياننىڭ شەتىنەن ورىن تەپكەن بۇل اق شاڭقان عيماراتتىڭ بولاشاعى زور ەكەنىنە كوز جەتكىزگەندەي بولدىق.
اۋىل شەتىندە تۇرعان وسىناۋ الىپ عيماراتتى كوللەدج ەمەس, جوعارى وقۋ ورنىنىڭ ءبىرى مە دەپ قالاتىنىڭ انىق. بۇل ءبىلىم ورداسى 360 وقۋشىعا ارنالعان. 180 ورىندى جاتاقحاناسى تۋرا جانىندا تۇر. 2009 جىلى باستالعان نىسان قۇرىلىسىنا رەسپۋبليكالىق بيۋدجەتتەن 2 ملرد. 454 ملن. تەڭگە ءبولىنىپ, «شىمكەنتگاز» جشس وسى جۇمىستىڭ ءبارىن ابىرويمەن اتقارىپ شىعىپتى. ەندى «وسىنشاما وقۋشىنى قايدان تابادى؟» دەگەن سۇراققا كەلسەك, كوللەدج ءبىر بايدىبەك اۋدانى ەمەس, ءبىر كۇرەجولدىڭ بويىندا قاتار جاتقان بىرنەشە اۋداننىڭ جاستارىنا ءبىلىم بەرەدى ەكەن. ياعني ايماقتىق مارتەبەگە يە بۇل وقۋ ورداسىندا تۇركىستان قالاسى مەن وتىرار, سوزاق, ورداباسى اۋداندارىنان كەلگەن جاستار قالاعان كاسىبي ماماندىقتارى بويىنشا ءدارىس الادى. فەرمەر ماماندىعىنىڭ قىر-سىرىن, ودان بولەك تىگىنشى, تراكتورشى-ماشينيست, ەلەكترومونتەر ماماندىقتارىن يگەرەدى.
ارينە, جاستارعا كاسىبي ماماندىق بەرەتىن بۇل كوللەدج اياق استىنان پايدا بولعان جوق. كوللەدج ديرەكتورى لەسبەك الياسقاروۆتىڭ ايتۋىنا قاراعاندا, اتالمىش وقۋ ورنى 1958 جىلى بۇرىنعى العاباس اۋدانى, جامبىل ەلدى مەكەنىندەگى جۇزىمدىك ماشينا-تراكتور ستانساسىنىڭ بازاسىندا قۇرىلعان. ارنايى عيماراتى بولماعان سوڭ, ءار جىلدارى قىزىلجار, جامبىل, شايان ەلدى مەكەندەرىندەگى ەسكى عيماراتتاردى پانالاپ ءجۇرىپتى. ياعني كوللەدجدىڭ عيماراتى جاڭا بولعانىمەن, تاريحى تەرەڭدە جاتىر. سودان بولار بۇل جاڭا وقۋ ورنىندا ءارتۇرلى ماماندىق بويىنشا بارلىعى 338 جاس ءبىلىم الۋدا ەكەن. جاڭا كوللەدجدەگى 15 وقۋ كابينەتى تولىق جابدىقتالعان. ونىڭ ىشىندە 6 ارنايى تەحنولوگيا, 6 لينگافون جانە 3 ينفورماتيكا كابينەتى بار. بۇدان بولەك حيميا, بيولوگيا, فيزيكا پاندەرىنە ارنالعان كابينەتتەر, ادىستەمەلىك كومەك كورسەتۋ جانە ۇستازدار بولمەسى مەن زەرتحانالار قىزمەتكە ورايلاستىرا سالىنعان. وزىق ساۋلەت ۇلگىسىندەگى عيماراتتا دارىگەرلىك كومەك جانە جۋىنۋ بولمەلەرى, 8 وقۋ شەبەرحاناسى, 90 ورىندى اسحانا, 44 ورىندى كىتاپحانا, 156 ورىندى ءماجىلىس زالى جانە سپورت كەشەنى ورنالاسقان.
قوستۇرانىڭ قويناۋىندا جاتقان وسىناۋ سايىن دالادا ەكى كۇننىڭ بىرىندە ارىستاندى قاراباستىڭ جەلى ارقىراپ تۇراتىن بولعان سوڭ عوي, داۋىلى قاتتى اۋىلدى «شاڭ باسقان شايان» دەپ ايتىپ جاتقانىمىز. ايتپەسە, سوڭعى جىلدارى بايدىبەك اۋدانىنىڭ ورتالىعى شاياننىڭ اجەپتاۋىر شىرايى كىرىپ قالدى. كوشەلەرى كەڭەيىپ, ءساندى ۇيلەرى كوبەيىپ, ساياباقتار سالىندى. ەندى مىنە, جاستارعا ماماندىق بەرەتىن وسى كوللەدج شاياننىڭ جارقىن ءومىرىنىڭ تاعى ءبىر جاڭا پاراعىن اشىپ جىبەرگەندەي. ەڭ باستىسى, اۋىل جاستارى ءبىر كاسىپكە ماماندانىپ, جاستايىنان ەڭبەككە ءپىسىپ وسەتىن بولدى.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
سۋرەتتى تۇسىرگەن قايسار شەرىم.
