بوستونداعى مارافون كەزىندە جارىلىس ۇيىمداستىردى دەپ ايىپتالىپ وتىرعان دجوحار تسارناەۆتىڭ دوستارىنا قاتىستى سوت ءىسى 2014 جىلعى 23 ماۋسىمعا بەلگىلەندى. بۇل تۋرالى يتار-تاسس حابارلادى.
اقش بيلىگى قازاقستان ستۋدەنتتەرى ازامات تاجاياقوۆ پەن دياس قادىرباەۆقا ايعاقتاردى جويۋعا ارەكەتتەنىپ, تەرگەۋ امالدارىنا بوگەت جاسادى دەگەن ايىپ تاقتى. تەرگەۋ دەرەكتەرىنە قاراعاندا, تەراكتتان ءۇش كۇن وتكەننەن كەيىن ولار تسارناەۆتىڭ نوۋتبۋگى مەن پەراتەحنيكالارى بار سومكەنى لاقتىرىپ جىبەرگەن. بولجام بويىنشا, ولار جاڭالىقتاردان تسارناەۆتىڭ سۋرەتىن كورىپ, ونىڭ تەراكتقا قاتىسى بار ەكەنىن تۇسىنگەن سوڭ قولدارىنداعى ايعاقتاردان قۇتىلۋعا كىرىسكەن. كەيىننەن ول سومكە قوقىس جاشىگىنەن تابىلدى.
تاجاياقوۆ پەن قادىرباەۆقا 25 جىلعا دەيىن باس بوستاندىعىنان ايىرىلۋ قاۋىپى ءتونىپ تۇر. ولار ايعاقتاردى جويۋعا ارەكەتتەنگەن دەگەن ايىپتى مويىنداۋدان باس تارتتى.
تسارناەۆتىڭ تاعى ءبىر دوسى, روبەل فيلليپوسقا فبر تەرگەۋشىلەرىنە جالعان مالىمەت بەردى دەگەن ايىپ تاعىلدى. ول دا ءوز كىناسىن مويىنداۋدان باس تارتۋدا.
تاجاياقوۆ, قادىرباەۆ پەن فيلليپوستىڭ سوتى ءبىر-ەكى اپتاعا سوزىلادى دەپ كۇتىلۋدە. بۇلاردىڭ بارلىعى تسارناەۆپەن دارتمۋت قالاسىنداعى ماسساچۋسەتس ۋنيۆەرسيتەتىندە وقىپ ءجۇرىپ تانىسقان. اقش بيلىگى ستۋدەنتتەردى جوسپارلانعان تەراكت جونىندە بىلمەگەن جانە ونى دايىنداۋعا قاتىسپاعان دەپ ەسەپتەيدى.
ايدار ورىسباەۆ.
دەرەككوز: Itar-tass.com
فوتو: Vestikavkaza.ru
