شتاب وتىرىسىندا قالا اكىمىنىڭ ورىنباسارى بەكتاس نۇريدينوۆ قالا اۋماعىندا كارانتين تالاپتارىنىڭ ساقتالۋ بارىسى, ىندەتتىڭ الدىن الۋ شارالارى تۋرالى اتقارىلىپ جاتقان جۇمىستار جايىنا توقتالدى.
بەكتاس بالعاباي ۇلىنىڭ بايانداۋىنشا قىزىلوردا وبلىسى قىزىل ايماققا ەنگەنىمەن قالادا سانيتارلىق تالاپتار مەن كارانتيندىك شەكتەۋلەردى ەسكەرمەيتىندەر قاتارى ازايماعان. جالپى بۇگىنگى كۇنگە دەيىن قالادا سانيتاريالىق-ەپيدەمياعا قارسى تالاپتاردىڭ ساقتالۋىن باقىلاۋ بويىنشا قۇرىلعان 16 مونيتورينگتىك توپ (اۋىلدىق وكرۋگتەردە – 9, قالادا - 7) جۇمىس جاساپ كەلەدى. اتالعان توپ جىل باسىنان بۇگىنگى كۇنگە دەيىن 5510 مارتە نىساندار ارالاپ, ونىڭ ىشىندە كارانتين تالاپتارىن بۇزعان 230 نىسانعا (ونىڭ 67-ءى توي) شارا قولدانۋ ءۇشىن قۇزىرلى ورگاندارعا حابارلامالار جولداندى. قازىرگى تاڭدا ونىڭ 118-نە شارا قابىلداندى.
قالا اكىمى, جەدەل شتاب توراعاسى ع.قازانتاەۆ موبيلدىك توپ مۇشەلەرىنە قالا اۋماعىنداعى قاۋىپسىزدىك شارالاردى ودان ءارى كۇشەيتۋدى تاپسىردى.
«الەمدە تاراپ جاتقان كوروناۆيرۋس ىندەتىنىڭ تارالۋىنا جول بەرمەۋدىڭ بىردەن ءبىر جولى – باس مەملەكەتتىك سانيتاريالىق دارىگەردىڭ قولدانىستاعى قاۋلىسىنا سايكەس كارانتين تالاپتارىن قاتاڭ ساقتاۋ. بۇگىندە اتالعان تالاپتاردىڭ ساقتالۋىن باقىلاۋ قىزىلوردا قالاسى اكىمدىگى جانىنان قۇرىلعان مونيتورينگتىك توپتار تاراپىنان قارقىندى جۇرگىزىلۋدە. دەگەنمەن دە, حالقىمىزدىڭ قاۋىپسىزدىگىن قامتاماسىز ەتۋ باعىتىندا قابىلدانعان شەكتەۋ شارالارىنا قاراماستان, تۇرعىندار كارانتين رەجيمىن ساقتاماي, اۋرۋدىڭ قاۋىپتىلىگىن ءالى سەزىنبەي ءجۇر دەۋگە بولادى. وعان دالەل, قالا اۋماعىنداعى تويحانالار مەن جەكە تۇرعىن ۇيلەردە وتكىزىلىپ جاتقان توي-تومالاقتار. قازىرگى تاڭدا كوروناۆيرۋس ينفەكتسياسىنىڭ تارالۋ كورسەتكىشى قالادا كۇنىنە 100-150 ادامدى قۇراپ وتىر. بۇل تەك اۋىرىپ اۋرۋحاناعا قارالعان ادامداردىڭ سانى. دارىگەرگە قارالماي ءۇي جاعدايىندا اۋىرىپ جاتقان ادامدار قانشاما؟ سوندىقتان, قالا اۋماعىندا قاۋىپسىزدىك شارالارىمەن قاتار, تۇسىندىرمە جۇمىستارىن كۇشەيتۋىمىز قاجەت. بۇل بارلىق جاۋاپتى تۇلعالارعا قاتىستى», دەدى شاھار باسشىسى.
