قاراعاندى وبلىسىنداعى وسىدان 4 جىل بۇرىن اشىلىپ, ۋاقىت وتە كەلە توقتاپ قالعان مەتاللۋرگيالىق كرەمني وندىرەتىن زاۋىت قايتا ىسكە قوسىلاتىن بولدى. بۇل تۋرالى «قازاقستان» تەلەارناسى حابارلادى.
بۇل ءوندىرىستى قالپىنا كەلتىرۋ ءۇشىن «قازاقستاننىڭ ينۆەستيتسيالىق قورى» مەن «تاۋ-كەن سامۇرىق» ۇلتتىق تاۋ-كەن كومپانياسى» اق اراسىندا كەلىسىم-شارت جاسالدى. سوڭعى اتالعان كومپانيا العاشقى كەزەڭدە 1,5 ملرد. تەڭگە بولەتىن بولدى. وسى قارجى زاۋىت ەڭبەككەرلەرىنىڭ جالاقى قارىزىن وتەۋگە جانە وندىرىستەگى م ۇلىكتى ساقتاپ قالۋعا جۇمسالاتىن بولادى.
«ارنايى بيزنەس-جوسپار قۇرامىز. سونىڭ نەگىزىندە كاسىپورىندى قالىپقا كەلتىرۋ, تەحنيكالىق اۋديت جۇرگىزۋ جۇمىستارىن جۇرگىزەمىز. سودان كەيىن جۇمىسشىلاردى جيناي باستايمىز. مۇنىڭ بارلىعىنا كەم دەگەندە 6 اي ۋاقىت كەتەدى», - دەيدى «تاۋ-كەن تەمىر» جشس ديرەكتورى ەربول يمانقۇلوۆ.
«سيليتسيۋم قازاقستان» زاۋىتى ەلىمىزدەگى «30 كورپوراتيۆتى كوشباسشى» باعدارلاماسىنا ەنگىزىلگەن بىرەگەي كاسىپورىن بولاتىن. الايدا, 2010 جىلى ىسكە قوسىلعانىمەن, ەكى جىلدان سوڭ جۇمىسىن توقتاتۋعا ءماجبۇر بولدى. سەبەبى, كومپانيا باسشىلىعى مەنەدجمەنتتى دۇرىس ۇيلەستىرە المادى. سونىمەن بىرگە, قازاقستان دامۋ بانكىنە قايتارىلماعان نەسيە تۇرىندەگى بەرەشەگى دە بار. زاۋىتتا جۇمىس ىستەگەن 400 ادامنىڭ تەك 35-ءى قالعان.
«قاراعاندىلىقتار - ناعىز ەڭبەك ادامى. قيىن جاعدايلارعا قاشان دا تۇسىنىستىكپەن قارايدى. كاسىپورىن جۇمىسىنىڭ تۇرالاپ قالعانىن جاسىرمايمىن. بىراق, حالىق سەندى, كۇتتى. ەشقايسىسى دالادا قالعان جوق, باسقا جەرلەرگە ەڭبەككە تارتتىق. ەندى كاسىپورىن جۇمىسى جولعا قويىلعان سوڭ بارلىعى قايتادان ءوز جۇمىستارىنا ورالادى», - دەدى وبلىس اكىمى باۋىرجان ابدىشەۆ.
زاۋىتتى ىسكە قوسۋ ءۇشىن جاڭا باسقارۋشى كومپانياعا 6 اي ۋاقىت بەرىلدى. كاسىپورىن جۇمىسى جاندانعان ساتتە, قوس پەشتەن ايىنا 50 مىڭ توننا كرەمني ءوندىرۋ مۇمكىن بولاتىنىنا ماماندار سەنىم ءبىلدىرىپ وتىر.
دانيار تۇيمەباي.
دەرەككوز: «قازاقستان» تەلەارناسى
فوتو: «قازاقستان» تەلەارناسى.
