«بەسىنشى قازىنا: ۇلتتىق بايلىعىمىزدىڭ, ءال-اۋقاتىمىز بەن الەۋەتىمىزدىڭ ءتۇپ نەگىزى – جالپىعا ورتاق ەڭبەك قوعامى. قازاقستان مەن قازاقستاندىقتاردىڭ قولىنداعى قازىرگى بارشا قازىناعا ءبىز تەر توگە ەڭبەك ەتۋدىڭ ارقاسىندا جەتتىك. ەڭبەك ءار ادامدى مەيىربان, ال ەلدى ۇلى ەتەدى. جالپىعا ورتاق ەڭبەك قوعامى – تاۋەلسىزدىكتى نىعايتۋ جولىنداعى كۇردەلى جۇمىس بارىسىندا تۋعان ءبىزدىڭ قازاقستاندىق يدەيامىز».
نۇرسۇلتان نازارباەۆ,
تاۋەلسىزدىك كۇنىنە ارنالعان سالتاناتتى جيىندا سويلەگەن سوزدەن.
ەل ەكونوميكاسىن وركەندەتۋ مەن دەموكراتيالىق مەملەكەت قۇرىلىمىن جەتىلدىرۋدىڭ ءتيىمدى جەتىستىگىنە قول جەتكىزۋدە بيزنەستىڭ الەۋمەتتىك جاۋاپكەرشىلىگىنىڭ ماڭىزى ارتا تۇسۋدە. تاۋەلسىزدىك العان كەزدەن بەرى بيزنەستىڭ كەڭ اۋقىمدا وركەندەۋى تەك وسى سالانىڭ عانا ەمەس, سونىمەن بىرگە, مەملەكەتتىك ساياساتتىڭ قالىپتاسۋىنا ىقپالىن تيگىزىپ كەلەدى.
«بەسىنشى قازىنا: ۇلتتىق بايلىعىمىزدىڭ, ءال-اۋقاتىمىز بەن الەۋەتىمىزدىڭ ءتۇپ نەگىزى – جالپىعا ورتاق ەڭبەك قوعامى. قازاقستان مەن قازاقستاندىقتاردىڭ قولىنداعى قازىرگى بارشا قازىناعا ءبىز تەر توگە ەڭبەك ەتۋدىڭ ارقاسىندا جەتتىك. ەڭبەك ءار ادامدى مەيىربان, ال ەلدى ۇلى ەتەدى. جالپىعا ورتاق ەڭبەك قوعامى – تاۋەلسىزدىكتى نىعايتۋ جولىنداعى كۇردەلى جۇمىس بارىسىندا تۋعان ءبىزدىڭ قازاقستاندىق يدەيامىز».
نۇرسۇلتان نازارباەۆ,
تاۋەلسىزدىك كۇنىنە ارنالعان سالتاناتتى جيىندا سويلەگەن سوزدەن.
ەل ەكونوميكاسىن وركەندەتۋ مەن دەموكراتيالىق مەملەكەت قۇرىلىمىن جەتىلدىرۋدىڭ ءتيىمدى جەتىستىگىنە قول جەتكىزۋدە بيزنەستىڭ الەۋمەتتىك جاۋاپكەرشىلىگىنىڭ ماڭىزى ارتا تۇسۋدە. تاۋەلسىزدىك العان كەزدەن بەرى بيزنەستىڭ كەڭ اۋقىمدا وركەندەۋى تەك وسى سالانىڭ عانا ەمەس, سونىمەن بىرگە, مەملەكەتتىك ساياساتتىڭ قالىپتاسۋىنا ىقپالىن تيگىزىپ كەلەدى.
بيزنەس قاۋىمداستىعىنىڭ وكىلدەرى مەملەكەتتىڭ الەۋمەتتىك ساياساتى مەن ۇلتتىق ەكونوميكانى جاڭعىرتۋدىڭ يننوۆاتسيالىق جوبالارىن ىسكە اسىرۋعا اتسالىسۋ ارقىلى تۇراقتى ەكونوميكالىق وسىمگە قول جەتكىزۋگە بولاتىنىن ۇعىندى. الەۋمەتتىك-ەڭبەك قاتىناسىنىڭ ءتيىمدى مودەلىنىڭ نەگىزى مەملەكەت, بيزنەس پەن قوعام اراسىنداعى ءوزارا سەرىكتەستىكتىڭ بەرىك ورنىعۋىمەن بايلانىستى ەكەنى داۋسىز.
كەز كەلگەن بيزنەس قۇرىلىمى الەۋمەتتىك جاۋاپكەرشىلىگىنىڭ باستى ستراتەگيالىق ماقساتى رەتىندە ۇزاق مەرزىمدىك باسەكەلەستىك باسىمدىعىنا جەتۋدى كوزدەپ, ءوز كومپانياسىنداعى قىزمەتكەرلەر مەن جەرگىلىكتى تۇرعىنداردىڭ ءومىر ساپاسىن جاقسارتۋ مەن دەڭگەيىن كوتەرۋدى ماقسات تۇتادى. ارينە, بيزنەستىڭ الەۋمەتتىك جاۋاپكەرشىلىگى تەك قورشاعان ورتانى قورعاۋ مەن ەكونوميكانى وركەندەتۋمەن, سونىمەن قاتار, الەۋمەتتىك سالاداعى جەتىستىكتەرگە قول جەتكىزۋمەن شەكتەلىپ قالماسا كەرەك. كورپوراتيۆتىك جاۋاپكەرشىلىكتىڭ قازاقستاندىق مودەلى ىسكەرلىك توپ وكىلدەرىنىڭ مەملەكەت پەن قوعامنىڭ قۇندىلىعى مەن تۇتاستىعى ءۇشىن ورتاق مۇددەنى كوزدەگەندە عانا ناتيجەسىن بەرەرى اقيقات.
تاۋەلسىز ەلىمىزدىڭ يگىلىگى جولىندا بيزنەستىڭ الەۋمەتتىك جاۋاپكەرشىلىگىن شىنايى سەزىنەتىن قازاقستاندىق كومپانيالاردىڭ ءبىرى – «كوسمي كازاحستان» جشس. بۇل كومپانيا قازاقستاننىڭ باتىس ايماعىندا سان الۋان قىزمەت كورسەتۋمەن تانىلىپ كەلەدى. ناقتىلاي ايتقاندا, مۇناي-گاز جانە ەنەرگەتيكا سەكتورىنا ەڭ وزىق نىساندار جەتكىزەدى. وسى سالاداعى جوبالاۋ جۇمىستارىن اتقارادى. تەحنيكالىق قىزمەت كورسەتۋدى دە باستى باعىتىنىڭ بىرىنە اينالدىرىپ وتىر. ەڭ باستىسى, «قاشاعان» كەنىشىنىڭ جوباسىن يگەرۋگە سەنىمدى ءارى بەلسەندى قاتىسۋشىلاردىڭ ءبىرى رەتىندە وزىندىك باعىتىن ايقىندادى. ءسويتىپ, تاۋەلسىز قازاقستاننىڭ مۇناي-گاز ونەركاسىبىنىڭ وركەن جايۋىنا لايىقتى ۇلەسىن قوسىپ كەلەدى.
«كوسمي كازاحستان» جشس قازاقستاننىڭ ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا 2011 جىلى مەحانيكالىق بۇيىمدار شىعارۋ زاۋىتىنىڭ قۇرىلىسىنا قوماقتى ينۆەستيتسيا سالدى. وڭدەۋ ونەركاسىبىندەگى وتاندىق تاۋارلار ءوندىرىسىن قولداۋ ماقساتىندا يننوۆاتسيالىق تەحنولوگيالاردى كەڭىنەن قولدانۋعا ۇمتىلىس تانىتتى. گەرمانيا, اقش, شۆەتسيا, كورەيا سەكىلدى وركەندى دامىعان ەلدەردەگى ۇزدىك وندىرۋشىلەردىڭ ەڭ وزىق ۇلگىدەگى قوندىرعىلارىن اكەلىپ, وتاندىق مۇناي-گاز ونەركاسىبىندەگى ماڭىزدى جوبالاردى ينۆەستيتسيالاۋدى قولعا الۋدا. ماسەلەن, 2012 جىلدان بەرى باتىس قازاقستانداعى كەن ورىندارىندا وندىرىلەتىن مۇناي كولەمىن ارتتىرۋ ماقساتىندا كەن قاباتتارىنىڭ قىسىمىن جوعارىلاتۋ (Enhanced Oil Recovery) جوباسىمەن جۇمىس جاسايدى. وسى ماقساتتا وندىرىسكە يننوۆاتسيالىق تەحنولوگيالاردى قولدانۋ ارقىلى تاجىريبەلىك-ونەركاسىپتىك زەرتتەۋلەر جۇرگىزىلدى. بۇل زەرتتەۋلەر ۇڭعىمالاردىڭ سۋلانۋىن ازايتۋ جانە زابوي ماڭىن تازالاۋ ماقساتىن كوزدەدى. سونىڭ ناتيجەسىندە ۇڭعىمالاردىڭ دەبيتى 40 پايىزعا ۇلعايدى. وسىلايشا, «كوسمي كازاحستان» جەرگىلىكتى ءوندىرىستىڭ جوعارى تەحنولوگيالارمەن وركەندەۋ كوكجيەگىن كەڭەيتۋگە بارىنشا ۇلەس قوسۋدى كوزدەپتى. دەمەك, مۇنى ۇلتتىق ەكونوميكانىڭ قارقىنمەن وركەن جايۋىنا قوسىلعان لايىقتى ۇلەس دەسەك, ارتىق ايتقاندىق بولا قويماس.
بۇگىنگى تاڭدا قازاقستاندىق وڭدەۋ ونەركاسىبىنىڭ ىشكى نارىقتى باسەكەگە قابىلەتتى ونىممەن قامتۋداعى الەۋەتى مولايدى دەۋگە بولادى. الايدا, ءونىم ءوندىرۋ كولەمى, وتاندىق تاۋار مەن قىزمەت كورسەتۋدىڭ ۇلەسى يمپورتپەن سالىستىرا قاراعاندا, سونشالىقتى مول ەمەس. مىنە, وسى سەبەپتەن, «كوسمي كازاحستان» جشس قازاقستاندىق ۇلەستى دامىتۋ ءۇشىن وتاندىق تاۋارلار مەن قىزمەت كورسەتۋ, سونىمەن بىرگە, ەڭبەك رەسۋرسى كولەمىن ارتتىرۋعا ۇدايى باسىم باعىت بەرەدى. كومپانيا باسشىلىعى 2008 جىلى العاشقىلاردىڭ قاتارىندا ماڭعىستاۋ وبلىسىنداعى تۇپقاراعان اۋدانىنىڭ اكىمدىگىمەن ءوزارا ىنتىماقتاستىق تۋرالى مەموراندۋمعا قول قويدى. مۇنداعى ماقسات – جەرگىلىكتى تۇرعىنداردى جۇمىسقا كوپتەپ تارتۋ, ولاردىڭ ەڭبەك قۇقىعىن قورعاۋدى قامتاماسىز ەتۋ. سول 2008 جىلدان بەرى اتالعان كومپانيا جاڭادان 500-دەن اسا جۇمىس ورنىن اشتى. ال 200-دەن استام جۇمىسشى حالىقارالىق ستاندارتتار بويىنشا كاسىپتىك وقىتۋ كۋرستارىنان ءوتىپ, كاسىبي بىلىكتىلىگىن جەتىلدىردى.
«كوسمي كازاحستان» جشس-ءنىڭ ءوڭىردەگى قىزمەتىن جەتىلدىرە تۇسۋىنە ىقىلاس مۇقامبەتقالي ۇلى قاليەۆتىڭ ايرىقشا ۇلەس قوسقانىن ايتقان ءلازىم. اقش-تىڭ بەدەلدى وقۋ ورنىنىڭ ءبىرى – گارۆاردتاعى جوعارى بيزنەس مەكتەبىندە (Harvard Business School ) بيزنەستى ءساتتى جۇرگىزۋدىڭ, ونى ءتيىمدى باسقارۋدىڭ قىر-سىرىن جەتىك مەڭگەرگەن ىسكەر جىگىت 2008 جىلدان بەرى اتالعان كومپانيانىڭ باقىلاۋ كەڭەسىنىڭ توراعاسى قىزمەتىن اتقارادى. اكە قانىمەن, انا سۇتىمەن دارىعان انا تىلىنە دە, شەتەلدىڭ بىرنەشە تىلىنە دە جەتىك, جۇرەگى وتان دەپ سوعاتىن قازاقتىڭ ىسكەر جىگىتىنىڭ كومپانيانى ءتيىمدى باسقارۋداعى جانە جۇمىستى وڭتايلى جۇرگىزۋدەگى تولىمدى تاجىريبەسىنىڭ ارقاسىندا ISO 9001:2008, ISO 14001:2004, BS OHSAS 18001:2007 سەكىلدى حالىقارالىق سەرتيفيكاتتاردى يەلەندى. ۇنەمى ىسكەرلىگىن ىزدەنۋمەن شىڭدايتىن ىسكەر جىگىت بىرنەشە الەۋمەتتىك باعدارلامالار توبىن دا ءساتتى ىسكە اسىرا باستادى. بۇعان مىسال رەتىندە الدىمەن, كومپانيادا جۇمىسشىلار ءۇشىن سان الۋان الەۋمەتتىك جەڭىلدىكتەر بارىن العا تارتا الامىز. اتاپ ايتقاندا, تۇراقتى جۇمىسقا قابىلدانعان جۇمىسشىلار تەگىن تاماقتانادى, جۇمىس ورنىنا جانە ۇيىنە دەيىن اۆتوكولىكپەن جەتكىزىلەدى. جالاقى تۇراقتى تولەنەدى. ءومىر بولعان سوڭ, كەزدەسىپ جاتاتىن ءارتۇرلى قيىندىقتارعا وراي الەۋمەتتىك قولداۋ دا ۇدايى كورسەتىلەدى. ءار وتباسىندا بولىپ جاتاتىن قۋانىشتى ساتتەردە دە سولاي. مەديتسينالىق قىزمەت كورسەتۋ, سپورتتىق-ساۋىقتىرۋ باعىتىنداعى شارالاردى وتكىزۋ, جۇمىسشىلار بالالارىنىڭ جازعى لاگەرلەردە دەمالىسىن ۇيىمداستىرۋ, مىنە, وسىنىڭ ءبارىنىڭ شىعىنى كومپانيا ەسەبىنەن وتەلەدى. كومپانيا جۇمىسشىلاردىڭ جوعارى وقۋ ورنىن بىتىرگەن بالالارىن جۇمىسقا ورنالاستىرۋ ارقىلى ۇرپاقتار ساباقتاستىعىن جالعاستىرۋدى ءوز مىندەتىنە الىپتى.
بيزنەس وكىلدەرى الەۋمەتتىك جاۋاپكەرشىلىكتى ءدال وسىلاي سەزىنە الار بولسا, ەڭبەك داۋلارىنا جول بەرىلمەيتىنى «كوسمي كازاحستان» جشس-ءنىڭ مىسالىنان ايقىن اڭعارىلادى. ولاي دەيتىنىمىز, بۇل كومپانيادا بىردە-ءبىر رەت ەڭبەك داۋى ورىن العان ەمەس. كەرىسىنشە, كومپانيا مەن جۇمىسشىلار وكىلدەرى ۇجىمدىق شارتتىڭ جوباسىن بىرلەسە دايىنداپ, وعان 2009 جىلدىڭ ناۋرىزىندا قول قويىلىپتى. الەۋمەتتىك جاۋاپكەرشىلىك ماسەلەسىندە ۇنەمى جۇمىسشىلارىنىڭ بىردە-ءبىر ۇسىنىسىن نازاردان تىس قالدىرمايتىن «كوسمي كازاحستان» جشس 2012 جىلعى «پارىز» رەسپۋبليكالىق كونكۋرسىنىڭ ءىرى كاسىپكەرلىك سالاسىنداعى «ۇزدىك ۇجىمدىق شارت» نوميناتسياسى بويىنشا التىن جۇلدەگەرى اتاندى.
– بىزگە بۇل ماراپات ۇلكەن جاۋاپكەرشىلىك جۇكتەدى. ويتكەنى, ەلباسى نۇرسۇلتان نازارباەۆتىڭ جالپىعا ورتاق ەڭبەك قوعامىنىڭ ماڭىزى تۋرالى «قازاقستانعا ەكونوميكالىق تابىستار مەن قوعامدىق يگىلىكتەردى قامتاماسىز ەتۋ اراسىندا ءتيىمدى تەپە-تەڭدىك تابۋىنىڭ ومىرلىك ماڭىزى بار. مەن الەۋمەتتىك-ەكونوميكالىق جاڭعىرتۋدىڭ شەشۋشى مىندەتتەرىن ناق وسىدان كورەمىن» دەگەنىن باستى قاعيدا رەتىندە ۇستانامىز. ءبىزدىڭ كومپانيانىڭ باستى بايلىعى – جۇمىسشىلارىمىز عوي, – دەيدى ەلباسىنىڭ قولىنان «پارىز» كونكۋرسىنىڭ التىن جۇلدەسىن العان «كوسمي كازاحستان» جشس باقىلاۋشىلار كەڭەسىنىڭ توراعاسى ىقىلاس قاليەۆ. – ءبىز جۇمىسشىلارىمىزدىڭ ءوز جۇمىسىن جاۋاپكەرشىلىكپەن اتقارۋىنىڭ ارقاسىندا ەكونوميكالىق وسىمگە, تۇراقتى تابىسقا قول جەتكىزىپ كەلەمىز. سوندىقتان, جۇمىسشىلارىمىزدىڭ ۇسىنىستارى نەگىزىندە ولارعا جۇمىس ورنىندا قولايلى جاعداي تۋعىزۋدى باستى مىندەتىمىز دەپ بىلەمىز. بىزدە جۇمىس جاساۋشىلاردىڭ الەۋمەتتىك جاعدايىن جاقسارتۋ جونىندەگى جوبالارىمىز ولاردىڭ تاراپىنان جاۋاپكەرشىلىكتى, جۇمىس ونىمدىلىگىن ارتتىرۋىنا وڭ ىقپالىن تيگىزىپ وتىر.
«كوسمي كازاحستان» جشس-ءنىڭ بيزنەستىڭ الەۋمەتتىك جاۋاپكەرشىلىگى تۇرعىسىندا جان-جاقتى ويلاستىرىلعان وزىندىك ساياساتى كادرلار قىزىعۋشىلىعىن وياتقانىنا مىنا ءبىر دەرەك دالەل بولاتىنداي. بۇل كومپانياعا جۇمىسقا ورنالاسۋعا وتاندىق وقۋ ورىندارىن بىتىرۋشىلەرمەن بىرگە, حالىقارالىق «بولاشاق» باعدارلاماسىمەن شەتەلدىڭ ەڭ ۇزدىك, ەڭ بەدەلدى وقۋ ورىندارىندا ءبىلىم العان تۇلەكتەر دە كوپتەپ ىنتا تانىتىپ وتىر. قازىر مۇندا «بولاشاقتىڭ» گرانتىمەن شەتەلدەن ءبىلىم جەتىلدىرگەن جيىرمادان استام جاس مامان جۇمىس جاسايدى. دەمەك, «بولاشاقتىقتاردىڭ» جۇمىسقا ورنالاسۋىنىڭ وزىنەن بۇل كومپانيانىڭ جاس ماماندارعا سەنىمدى جۇمىس بەرۋشى ەكەنىن, سونداي-اق, كەلەشەگى كەمەلدەنە تۇسكەنىن انىق بايقاتادى.
دەگەنمەن, كومپانيانىڭ الەۋمەتتىك جاۋاپكەرشىلىگى تەك ءوز قىزمەتكەرلەرىنە عانا الەۋمەتتىك قولداۋ بىلدىرۋمەن شەكتەلمەيدى. «كوسمي كازاحستان» جشس-ءنىڭ ۇستانعان باعىتتارىنىڭ ءبىرى – ءوڭىر تۇرعىندارىنىڭ تۇرمىسىن جاقسارتۋعا قايىرىمدىلىق تانىتۋ, وعان قوسا الەۋمەتتىك سالاعا ينۆەستيتسيا قۇيۋ. ماسەلەن, اقتاۋ قالاسىنداعى وبلىستىق وتباسىلىق ۇلگىدەگى بالالار اۋىلىنا بىرنەشە ۆەلوسيپەد, ادىستەمەلىك ادەبيەتتەر مەن كورنەكى قۇرالدار ساتىپ الىنۋىنا دەمەۋشىلىك جاسالدى. كومپانيانىڭ قارجىلاي قولداۋىمەن كومپيۋتەرلىك سىنىبى تولىقتاي جابدىقتالىپ, اعىلشىن ءتىلى مۇعالىمىنىڭ شتاتىن اشىپ بەردى. ال اۋداندىق اكىمدىكتىڭ سۇراۋىمەن تۇرمىسى تومەن وتباسىلارىنىڭ بالالارى مەكتەپ كيىمدەرىمەن قامتىلدى. بۇعان قوسا, اتىراۋداعى «شاڭىراق» وتباسىلىق ۇلگىدەگى بالالار اۋىلىنىڭ تاربيەلەنۋشىلەرى ءۇشىن كەڭسە جانە مەكتەپ قۇرالدارى, ماۋسىمدىق كيىمدەر سىيعا تارتىلدى. جىل سايىن سوعىس جانە تىل ارداگەرلەرىن, زەينەتكەرلەردى گازەت-جۋرنالدارعا جازدىرىپ بەرەدى.
كومپانيانىڭ باقىلاۋ كەڭەسىنىڭ توراعاسى ىقىلاس قاليەۆتىڭ پىكىرىنشە, كورشى وتىرعان قوس وبلىستىڭ قامكوڭىل جاندارىنا كورسەتىلگەن قولداۋ الداعى كەزەڭدە دە جالعاسىن تابادى. قاراپايىم ەڭبەك ادامىنىڭ قادىرىن بىلەتىن كومپانيا باسشىلىعى الەۋمەتتىك سەرىكتەستىكتى ودان ءارى جەتىلدىرۋ كوزدەلىپ وتىر. بۇل رەتتە جۇمىس بەرۋشى مەن جۇمىسشى اراسىنداعى ارىپتەستىك قارىم-قاتىناستى رەتتەۋدىڭ ءتيىمدى ادىستەرى تاجىريبەگە ەنگىزىلمەك. ارينە, الەۋمەتتىك جاۋاپكەرشىلىكتىڭ ماڭىزىن ارتتىرا تۇسەتىن جوبالاردىڭ جەلىسى ۇزىلمەيتىنى داۋسىز. بولاشاقتا يننوۆاتسيالىق جوبالاردى كەڭىنەن ەنگىزە وتىرىپ, سەرۆيستىك قىزمەت كورسەتۋ اياسىن كەڭەيتپەك. جاڭا بيزنەس-جوبالاردى جۇزەگە اسىرۋ ماقساتىمەن سەرىكتەستەر اراسىنداعى بايلانىستى دامىتۋدىڭ جوسپارى دا بار.
– ءبىز ەلىمىزدىڭ باسەكەگە قابىلەتتىلىگىن وتاندىق وندىرىسكە جاڭا يننوۆاتسيالىق تەحنولوگيالاردى كوپتەپ ەنگىزۋ ارقىلى ارتتىرا الامىز, – دەيدى قازاقستاننىڭ قۋاتتى مەملەكەت رەتىندە الەمگە كەڭىنەن تانىلعانىن قالايتىن ىقىلاس قاليەۆ. – وسى ورايدا, اسىرەسە, شەتەلدىك ماماندارمەن باسەكەلەس بولۋعا وتاندىق جاس مامانداردىڭ قابىلەتى دە, كاسىبي بىلىكتىلىگى دە جەتەدى. سول سەبەپتەن تەك ءوز ماماندارىمىزدى تۇراقتى جۇمىسپەن قامتىپ, الەۋمەتتىك تۇرعىدان قولداۋدى كوزدەپ وتىرمىز. ءار ماماننىڭ اتقاراتىن جۇمىسىنا, كاسىبي تاجىريبەسىنە قۇرمەتپەن قارايمىز. وزىمىزدە جۇمىس جاسايتىن وتانداستارىمىزدىڭ تۇرمىسى جاقسارعانىن, ولاردىڭ بالالارىنىڭ جوعارى ءبىلىم العاننان سوڭ جۇمىسسىز قالماعانىن قالايمىز.
بۇگىنگى نارىقتىق باسەكەنىڭ داۋىرىندە بيزنەستىڭ الەۋمەتتىك جاۋاپكەرشىلىگىن شىنايى سەزىنەتىندەردىڭ, ادال ەڭبەكتى قادىرلەي بىلەتىندەردىڭ عانا ابىرويى بيىكتەيدى. تولاعاي تابىسقا كەنەلەدى. وسى تۇرعىدان ايتقاندا, ىقىلاس قاليەۆتەي وتانشىل, ىزدەنىمپاز, ىسكەر كاسىپكەر باسقاراتىن «كوسمي كازاحستان» جشس-ءنىڭ وزىندىك قالىپتاسقان جولى, الەۋمەت الدىنداعى جاۋاپكەرشىلىكتەن شەت قالمايتىن وزىندىك باعىتى, ەڭ باستىسى, وزگەلەر ءۇشىن وزىندىك ۇيرەنەر ءۇردىسى بار. دەمەك, بۇل كومپانيانىڭ تاۋەلسىز قازاقستاننىڭ ۇلتتىق ەكونوميكاسىن وركەندەتۋگە قوسقان ۇلەسىنىڭ مولايا تۇسەرى ءوز الدىنا, سونىمەن بىرگە, كەلەشەگىنىڭ كەمەل بولارىنا سەنىم مول.
سۋرەتتەردە:
*ۇيىمشىل ۇجىمنىڭ سپورتتا دا ءباسى بيىك.
*«پارىز» كونكۋرسىنىڭ التىن جۇلدەسى.
*ىسكەر كاسىپكەر ىقىلاس قاليەۆ.
*وندىرىستەگى جۇمىس ءساتى.
*«ناۋرىز» مەرەكەسىندە ۇلتتىق ناقىشقا باسا كوڭىل بولىنەدى.
*جۇمىسشىلار كاسىبي بىلىكتىلىگىن ۇدايى ارتتىرادى.
جولداسبەك شوپەعۇل,
«ەگەمەن قازاقستان».
