سانيتارلىق-ەپيدەميالىق باقىلاۋ دەپارتامەنتىنىڭ باسشىسى نۇرسۇلۋ بەركىمباەۆانىڭ حابارلاۋىنشا, قالاداعى تويحانالار مەن مەيرامحانالاردا جاسىرىنىپ توي وتكىزىپ, اس بەرۋ توقتار ەمەس. وتكەن اپتادا مونيتورينگتىك توپتار 55 نىساندى جوسپارسىز تەكسەرىپ, كارانتين ءتارتىبىن بۇزعان كاسىپكەرلەرگە 8 ملن تەڭگەدەن اسا ايىپپۇل سالدى. جالپى جىل باسىنان بەرى كارانتين ەرەجەسىن بۇزعان كاسىپكەرلەرگە 60 ملن تەڭگەدەن اسا ايىپپۇل سالىنعان ەدى.
اقتوبە قالاسىندا كۆي ناۋقاستارىن وبلىستىق فتيزيوپۋلمونولوگيالىق ورتالىق, تەمىرجول اۋرۋحاناسى مەن اقتوبە مەديتسينا ورتالىعى قابىلدايدى. ءدال بۇگىندە وسى ءۇش ەمدەۋ مەكەمەسىندەگى كەرەۋەتتەر جۇكتەمەسى 80 پايىزدان اسسا, رەانيماتسيالىق كەرەۋەتتەر جۇكتەمەسى 47 پايىزعا جەتتى. اۋرۋحاناعا جاتقىزىلعان 960 ناۋقاستىڭ 91-ءى رەانيماتسيادا, 12-ءى وكپەنى جاساندى جەلدەتۋ اپپاراتىنا قوسىلعان.
مۋتاتسياعا ۇشىراعان «دەلتا» شتامىنىڭ تارالۋىمەن جۇكتى ايەلدەر مەن بالالار اراسىندا دا اۋرۋ كوبەيىپ تۇر. كۆي-گە شالدىققان 260 بالا, 128 جۇكتى ايەل دارىگەرلەر باقىلاۋىندا تۇرسا, 47 جۇكتى ايەل, 19 بالا اۋرۋحاناعا جاتقىزىلدى. ونىڭ ىشىندە 5 ايەلدىڭ جاعدايى اۋىر. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ اۋىرعاندار سانى كۇرت كوبەيەر بولسا, ناۋقاستاردى جاتقىزاتىن جەر دە بولماي قالۋى مۇمكىن ەكەنىن ايتادى.
وبلىسقا جىل باسىنان بەرى 422 مىڭ دوزا ۆاكتسينا جەتكىزىلسە, ونىڭ ءبىرىنشى كومپونەنتىن 227 681 ادام (49 پايىز), ەكىنشى كومپونەنتىن 145 912 (31 پايىز) ادام سالدىردى. وسىلايشا ءوڭىر تۇرعىندارىنىڭ 35 پايىزى كوروناۆيرۋس ينفەكتسياسى بويىنشا تولىق يممۋنداۋدان وتكەن.
2 تامىزدان باستاپ اقتوبە قالاسىنداعى بارلىق ەمحانالاردا شۇعىل جاعدايداعى ناۋقاستار بولماسا بارلىق امبۋلاتوريالىق ەمدەۋ, سكرينينگتەر, جوسپارلى مەديتسينالىق تەكسەرىستەر ۋاقىتشا توقتاتىلدى. ەندى ۋچاسكەلىك دارىگەرلەر ناۋقاستاردى الدىن الا جازىلىم بويىنشا قابىلدايدى.
بيىل جىل باسىنان بەرى وڭىردە 260 ادام كوروناۆيرۋستان قايتىس بولدى. شىلدەدە وسى ىندەتتەن مارقۇم بولعانداردىڭ سانى 43-كە جەتتى. «دەلتا» شتامىنىڭ ادامدار اراسىندا جەدەل تارالۋىنا بايلانىستى دارىگەرلەر تۇرعىنداردان بارىنشا ساقتىق شارالارىن ساقتاۋدى ءوتىنىپ وتىر. پاندەميا باستالعاننان بەرى اقتوبە وبلىسىنىڭ 17 017 تۇرعىنى كوروناۆيرۋس ينفەكتسياسىنا شالدىعىپ, 12 861 ناۋقاس جازىلىپ شىققانىن ايتا كەتكەن ءجون.
اقتوبە وبلىسى
