ايماقتار • 03 تامىز، 2021

Aulafit اۋرۋدان قورعايدى

399 رەت كورسەتىلدى

بىلتىردان بەرى بۇكىل الەم حالقىنىڭ كەڭ دۇنيەسىن تارىلتقان كوروناۆيرۋس ەپيدەمياسى اسىرەسە قاريالارعا قيىن ءتيدى. اۋرۋدان ەڭ كوپ زارداپ شەككەندەر دە اعا بۋىن – ارداگەرلەر ەدى. سوندىقتان باتىس قازاقستان وبلىسىندا aulafit جوباسى باستالدى.

«مەديتسينا سالاسىندا جۇرگەنىمە 50 جىل بولدى. ماماندىعىم – پروۆيزور. جاسىم 75-تە. قازىرگى ەپيدەميالىق احۋالدى ەسكەرە وتىرىپ، مەن دە ۆاكتسينا الدىم. ەكپەدەن ەشقانداي جاناما اسەر بولعان جوق. ەكپەگە قارسى پىكىر ايتاتىن ادامداردى تۇسىنبەيمىن. كەزىندە شەشەك، وبا، ءسىبىر جاراسى سەكىلدى جۇقپالى ىندەت ۆاكتسينا ارقىلى توقتاتىلعان. تۋبەركۋلەزگە قارسى ۆاكتسينا سابيگە پەرزەنتحانادان باستاپ سالىنادى. وسىنداي جۇمىستاردىڭ ناتيجەسىندە ەلىمىز تۋبەركۋلەز ىندەتىن جەڭدى دەپ ايتۋعا بولادى. قازىر الەۋمەتتىك جەلىدە ەكپەگە قارسى جەكە پىكىر ايتامىز دەپ حالىقتىڭ ويىن وزگەرتىپ جۇرگەن ادامدار كوپ. باسقا سالانى قايدام، بىراق مەديتسينا سالاسىنا قاتىسى جوق كەي تۇرعىندار ۆاكتسينا تۋراسىندا پىكىر ايتقىش بولىپ الدى. ياعني ءبىلىمى جوق بىلگىشتەر قاپتاپ كەتتى»، دەيدى مەديتسينا سالاسىنىڭ ارداگەرى ماقسوت بەرگەن.

ماقسوت قابىش ۇلى ەگدە تارتقان جاسىنا قاراماستان ءاردايىم قوعامدىق جۇمىستاردىڭ باسىندا جۇرەدى. ءوزى – باتىس قازاقستان وبلىستىق ارداگەرلەر كەڭەسىنىڭ توراعاسى. سوڭعى جىلدارى توقىراپ قالعان قوعامدىق ۇيىمنىڭ جۇمىسىن جانداندىرىپ، اعا ۇرپاقتىڭ تاجىريبەسى مەن اقىل-كەڭەسى قاجەتتىگىن دالەلدەۋدە. اسىرەسە بىلتىر پاندەميا باستالعالى بۇل ءتىلسىز جاۋدى تەك عىلىمي جول – ۆاكتسينامەن جانە سالاماتتى ءومىر سالتىمەن جەڭە الاتىنىمىزدى ايتىپ، اعامىزدىڭ جارعاق قۇلاعى جاستىققا تيمەي ءجۇر.

«قازاقستاندا 7 500-دەن اسا تىركەلگەن ءدارى-دارمەك ءتۇرى بار. ءار ءدارىنىڭ ءوزىنىڭ قارسى كورسەتىلىمى نەمەسە جاناما اسەرى بولادى. مىسالى، انتيبيوتيكتەردى الايىق. بىراق ولاردى قولدانباساق، تۇر­عىن­داردىڭ دەنساۋلىعى مەن ومىرىنە قاۋىپ تونەر ەدى. سول سەبەپتى كوروناۆيرۋس­كە قارسى ۆاكتسينانىڭ دا ماڭىزى زور. ءوز باسىم 18 جاستان اسقاندارعا ەكپە الۋعا كەڭەس بەرەر ەدىم. اقش حالقىنىڭ 70 پايىزى بۇگىندە ۆاكتسينا الىپ وتىر عوي»، دەيدى ارداگەر.

ماقسوت بەرگەن وسى پاندەميادان ەڭ الدىمەن الدىڭعى بۋىن – اعالار زارداپ شەككەنىن ايتادى. ۆيرۋستىڭ كارى اعزاعا تيگىزەر اسەرى ءوز الدىنا. مۇنىڭ تاعى ءبىر سەبەبى بار: ەل ىشىندە كورشى-كولەم، اعايىن-تۋىس، اۋىل تۇرعىندارىنىڭ باسىن قوسىپ، قايتىس بولعانداردىڭ ءۇشى، جەتىسى، قىرقى مەن 100 كۇندىگىن بەرەتىن ءراسىم بار. بۇل ءوز كەزەگىندە ىندەتتىڭ ورشۋىنە اكەلىپ سوعۋدا. ونىڭ ۇستىنە مۇنداي جەردە كوبىنە قاريالار جۇرەدى. «سوندىقتان مۇنداي راسىمدەردى تۇرعىنداردىڭ باسىن قوسپاي-اق، وتباسى مۇشەلەرىمەن اتاپ وتكەن ءجون. ال قاريالار ءوز دەنساۋلىعىنا كوڭىل ءبولىپ، تازا اۋادا كوبىرەك ءجۇرىپ، تىنىس جاتتىعۋلارىن جاساۋ كەرەك»، دەيدى ارداگەر.

بۇل ۇسىنىس جاقىندا قالا، ءوڭىر باسشىلارى مەن قوعامدىق ۇيىمدار تاراپىنان دا قولداۋ تاپتى. ورال قالاسىندا «دەنساۋلىق الاڭدارى» كوبەيدى. ال جاقىندا عانا قولعا الىنعان aulafit اتالعان تىڭ جوبانىڭ دا قولداۋشىلارى كوپ بولاتىن ءتۇرى بار. ياعني قالانىڭ ساياباقتارىندا، دەمالىس الاڭدارىندا – اشىق اسپان استىندا جينالعان تۇرعىندار اسەم اۋەن ىرعاعىمەن بي بيلەپ، ءتۇرلى جاتتىعۋلار جاسايدى.

وسىنداي جيىننىڭ ءبىرى جاقىندا زاشاعان كەنتىندە ۇيىمداستىرىلدى. ورال قالالىق №1 ەمحاناعا قاراستى ساۋىقتىرۋ ءبولىمىنىڭ نۇسقاۋشىسى ساۋلە شوكەەۆانىڭ نۇسقاۋىمەن تىنىس الۋ جۇيەسى قىزمەتىن نىعايتىپ، وكپەنى كۇشەيتەتىن، جالپى دەنساۋلىقتى كۇشەيتۋگە ارنالعان جاتتىعۋلار كەشەنى جاسالدى. جاتتىعۋعا وبلىستىق ارداگەرلەر كەڭەسىنىڭ توراعاسى ماقسوت بەرگەن، ورال قالاسى اكىمىنىڭ ورىنباسارى ەرلان عاليەۆ، ورال قالالىق ارداگەرلەر كەڭەسىنىڭ توراعاسى مىناتاۋبيىك انەسوۆ، باتىس قازاقستان وبلىستىق ءماسليحاتىنىڭ دەپۋتاتى شاتتىق وتەباليەۆا، زاشاعان كەنتىنىڭ اكىمى اققالي اۋبەكەروۆ، قالالىق دەنە شىنىقتىرۋ جانە سپورت ءبولىمىنىڭ باسشىسى ارتۋر شەرعاليەۆ، سپورت جانە مادەنيەت قىزمەتكەرلەرى، ارداگەرلەر، ەرىكتىلەر، كەنتتىڭ قاراپايىم تۇرعىندارى قاتىستى.

 

باتىس قازاقستان وبلىسى

 

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:16

ۇقساس جاڭالىقتار