كوروناۆيرۋس ينفەكتسياسىن جۇقتىرۋ فاكتىلەرىنىڭ كوبەيۋىنە بايلانىستى الماتى قالاسىنداعى قورعانىس مينيسترلىگىنىڭ اسكەري كلينيكالىق گوسپيتالى ينفەكتسيالىق ستاتسيونارعا اينالدى.
ستاتسيونار 150 ناۋقاسقا ارنالعان, بۇل رەتتە مەديتسينالىق مەكەمەدە سوماتيكالىق پاتولوگياسى بار اسكەري قىزمەتشىلەردى, سونداي-اق اسكەري-دارىگەرلىك جانە دارىگەرلىك-ۇشقىشتار ساراپتاماسىن جۇرگىزۋ ءۇشىن 100 ورىن ساقتالادى. اسكەري دارىگەرلەر ازاماتتاردى گوسپيتالعا جاتقىزۋ جانە بىلىكتى مەديتسينالىق كومەك كورسەتۋ ءۇشىن قولدا بار رەسۋرستاردى جۇمىلدىردى.
ء«بىزدىڭ اسكەري گوسپيتال ەكىنشى ەشەلونعا جاتادى. سوندىقتان ينفەكتسيالىق ستاتسيونارعا ورتاشا اۋىر جانە اۋىر ناۋقاستار جاتقىزىلاتىن بولادى. بۇل جاعدايعا ءبىزدىڭ جەكە قۇرام دايىن. ءبىزدىڭ مەديتسينالىق پەرسونالدىڭ كوروناۆيرۋستىق ينفەكتسيامەن اۋىراتىن ناۋقاستاردى ەمدەۋ ىسىندە تاجىريبەسى بار. ول ءۇشىن بىزدە ءوجج جانە گەمودياليز اپپاراتتارىمەن جابدىقتالعان رەانيماتسيا بولىمشەسى, سونداي-اق قاجەتتى ءدارى-دارمەك قورى بار», دەپ ءتۇسىندىردى الماتى قالاسىنداعى اسكەري كلينيكالىق گوسپيتال باستىعىنىڭ مىندەتىن ۋاقىتشا اتقارۋشى مەديتسينا قىزمەتىنىڭ پودپولكوۆنيگى ابدۋۆالي پالتۋشەۆ.
2020 جىلدىڭ ساۋىرىنەن باستاپ تۇرعىندارعا كومەك كورسەتۋ ءۇشىن اسكەري گوسپيتال دارىگەرلەرى ەكى رەت تارتىلعان بولاتىن. ناتيجەسىندە 1 430 ادام, ونىڭ شامامەن 30%-ءى اۋىر جانە اسقىنعان دەڭگەيدەگى ناۋقاس دەرتتەن ايىعىپ شىقتى.
شىلدەدەن باستاپ ەلورداداعى باس اسكەري كلينيكالىق گوسپيتال كوروناۆيرۋسقا شالدىققانداردى ەمدەۋ ءۇشىن قايتا جۇمىلدىرىلعان.
سونداي-اق, الماتى, تالدىقورعان جانە ءۇشارال قالالارىنداعى اسكەري-ەمدەۋ مەكەمەسى ازاماتتىق تۇرعىنداردى قابىلداۋعا دايىن. اياگوز, تالدىقورعان, سارىوزەك جانە سەمەي اسكەري گوسپيتالدارىندا قوسىمشا ءتورت ينفەكتسيالىق وقشاۋلاعىش جۇمىس ىستەيدى.
پتر-تەستىلەۋ ءۇشىن نۇر-سۇلتاندا جانە الماتىدا ەكى ستاتسيونارلىق زەرتحانا, اقتاۋ جانە سەمەي قالالارىندا ءموبيلدى زەرتحانالىق كەشەندەر جۇمىس ىستەيدى.
