وبلىستىڭ بۇرىنعى اكىمى الاشتىڭ ارداقتىسى جۇسىپبەك ايماۋىتوۆقا ەسكەرتكىش ورناتپاق بولىپ, قارجى قاراستىرعان ەكەن.
وبلىستىڭ بۇرىنعى اكىمى الاشتىڭ ارداقتىسى جۇسىپبەك ايماۋىتوۆقا ەسكەرتكىش ورناتپاق بولىپ, قارجى قاراستىرعان ەكەن.
قۇپ دەلىك. قۋانىشتى جاعداي. جۇرتشىلىق, قازاق قاۋىمى كۇتىپ ءجۇر. لايىقتى تۇلعا.
قازاق ادەبيەتىنىڭ نەگىزىن قالاۋشىلاردىڭ ءبىرى, جازۋشى, دراماتۋرگ اعامىز كەزىندە «حالىق جاۋى» اتانىپ, اتىلدى. ەلىمىزدىڭ باس گازەتى «ەگەمەن قازاقستان» شەجىرەسىندە 1919-1938 جىلدارى گازەت «ۇشقىن», «ەڭبەك تۋى», «ەڭبەكشىل قازاق», «ەڭبەكشى قازاق», «سوتسيالدى قازاقستان», «سوتسياليستىك قازاقستان» اتالعان شاقتاردا سماعۇل سادۋاقاسوۆ, مۇحتار اۋەزوۆ, بەيىمبەت مايلين, ساكەن سەيفۋللين سياقتى ءجۇسىپبەك ايماۋىتوۆ تا باسشىلىق جاساعانى ايتىلادى. 1918-19 جىلدارى سەمەيدە مۇحتار اۋەزوۆپەن بىرلەسىپ «اباي» جۋرنالىن شىعاردى. ەسكەرتكىش جۇسىپبەك ايماۋىتوۆ اتىنداعى وبلىستاعى مۋزىكالىق-دراما تەاترىنىڭ الدىنان ورىن الۋى ءتيىس-ءتى.
الايدا, جۋىردا وتكەن وبلىستىق ءماسليحاتتىڭ سەسسياسى جەكەلەگەن الەۋمەتتىك ماسەلەلەردىڭ باسىمدىلىعى مەن ءبىرىنشى كەزەكتىلىك سيپاتىن ەسكەرە وتىرىپ, باسىمدىلىعى جوق شىعىنداردى, ولاردىڭ قاتارىندا قۇنى 60 ميلليون تەڭگەگە باعالانعان ايماۋىتوۆتىڭ ەسكەرتكىشى دە بار, قىسقارتۋعا شەشىم قابىلدادى.
«قارا حالىقتىڭ مادەنيەتتى بولۋىنان مادەنيەتتى كىسىنىڭ قازاق بولۋى قيىن, قازاققا زور كەۋدە اقسۇيەكتىڭ, اقشا جەگىش جالتىراۋىق شەنەۋنىكتىڭ, سۇلۋ ءسوزدى, قۇرعاق بەكتىڭ كەرەگى جوق...» دەپ جازعان ەدى ايماۋىتوۆتىڭ ءوزى. اقشا ۋىس-ۋىس شاشىلىپ جاتپاسا, وسى جولى ۇندەمەي-اق قالار ەدىك.
ولاي بولسا, ايماۋىتوۆقا كەلگەندە بيلىك باسىنداعىلاردىڭ ۇنەمشىل بولا قالعانى قالاي؟!
ايماۋىتوۆتىڭ جازىعى نە؟ ايماۋىتوۆ قازاق ءۇشىن قىمبات. وبلىستىق ءماسليحاتتاعىلار وسىنى ويلادى ما ەكەن؟!
فاريدا بىقاي,
«ەگەمەن قازاقستان».
پاۆلودار.
