«قازاقستاننىڭ مەملەكەتتىك-جەكەشەلىك ارىپتەستىك ورتالىعى» اق وكىلدەرى كاسىپكەرلەر پالاتاسى جانىنان قۇرىلعان ىسكەر ايەلدەر كەڭەسىنىڭ مۇشەلەرىمەن كەزدەستى. جيىنعا جەرگىلىكتى اتقارۋشى ورگان وكىلدەرى ونلاين فورماتتا قوسىلدى.
وبلىستىق كاسىپكەرلەر پالاتاسىنىڭ ءبولىم باسشىسى اسلان نۇرسەيىتوۆتىڭ ايتۋىنشا, وڭىردە مەملەكەتتىك-جەكەشەلىك ارىپتەستىك ەكونوميكانىڭ بارلىق سالاسىن قامتىعان.
«مەملەكەتتىك-جەكەشەلىك ارىپتەستىك تۋرالى زاڭ قابىلدانعاننان بەرى سقو-دا 42 كەلىسىم شارت جاسالدى. تارتىلعان ينۆەستيتسيا كولەمى – 10,4 ملرد تەڭگە. ونىڭ 9,3 ملرد تەڭگەسى قايتارىلۋى كەرەك بولسا, وسى كۇنگە دەيىن كاسىپكەرلەرگە 3,9 ملرد تەڭگەسى تولەندى. بيىل وسى مەحانيزم ارقىلى 7 جوبا جۇزەگە اسىرىلۋى جوسپارلانۋدا. ونىڭ ەكەۋى - ءبىلىم, بىرەۋى – دەنساۋلىق ساقتاۋ, ەكەۋى – تۇرعىن ءۇي-كوممۋنالدىق شارۋاشىلىق سالالارىن قامتىسا جانە بىرەۋ جولعا قاتىستى», دەيدى اسلان نۇرسەيىتوۆ.
«قازاقستاننىڭ مەملەكەتتىك-جەكەشەلىك ارىپتەستىك ورتالىعى» اق وكىلدەرىنىڭ پىكىرىنشە, پاندەميانىڭ سالدارىنان جوباعا قاتىسۋعا تىلەك بىلدىرۋشىلەر ازايعان.
«تاعى ءبىر سەبەبى – جوبا مەحانيزمىنىڭ كۇردەلىلىگى. مەملەكەتتىك-جەكەشەلىك ارىپتەستىك ەلىمىزدە 2016 جىلدان بەرى جۇزەگە اسىپ كەلەدى. بۇرىننان قاتىسقاندار ونىڭ مۇمكىندىكتەرىن كورىپ, ءبىلدى. بۇل جەردە تەز, ءارى وڭاي تابىسقا جەتۋ مۇمكىن ەمەس. مەملەكەتتىك-جەكەشەلىك ارىپتەستىك – ۇزاق ۋاقىتقا باعىتتالعان جوبا. سونداي-اق قازىر مەكتەپ قۇرىلىسىنا باسىمدىق بەرىپ جاتىرمىز. ويتكەنى ەلىمىزدە ءالى كۇنگە دەيىن ەكى-ءۇش اۋىسىمدا وقىتاتىن جانە ەسكى مەكتەپتەر بار. سقو-دا دا ءبىلىم وردالارىنا سۇرانىس جوعارى. مەملەكەتتىك-جەكەشەلىك ارىپتەستىك ارقىلى كاسىپكەرلەر بۇل جوبالارعا قاتىسا الادى», دەدى «قازاقستاننىڭ مەملەكەتتىك-جەكەشەلىك ارىپتەستىك ورتالىعى» اق فرونت-كەڭسە جوبالارىنىڭ باسقارۋشىسى ماحاببات يسابەكوۆا.
