پرەزيدەنت • 27 شىلدە، 2021

قاسىم-جومارت توقاەۆ اقمولا وبلىسىنىڭ ينۆەستيتسيالىق جوبالارىمەن تانىستى

1182 رەت كورسەتىلدى

اقمولا وبلىسىنا جاساعان جۇمىس ساپارى بارىسىندا قاسىم-جومارت توقاەۆقا ايماق اكىمى ەرمەك مارجىقپاەۆ وڭىردەگى جۇزەگە اسىرىلىپ جاتقان ينۆەستيتسيالىق جوبالار مەن كوكشەتاۋ قالاسىنىڭ دامۋ پەرسپەكتيۆالارى تۋرالى ەسەپ بەردى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

پرەزيدەنتكە ايماقتىڭ نەگىزگى الەۋمەتتىك-ەكونوميكالىق كورسەتكىشتەرى، اگروونەركاسىپ، تۋريزم، تاۋ-كەن مەتاللۋرگيالىق كەشەنى، ماشينا جاساۋ، قۇرىلىس يندۋسترياسى، ەنەرگەتيكا جانە باسقا دا سالالارداعى ينۆەستيتسيالىق جوبالار تانىستىرىلدى.

وبلىس اكىمىنىڭ ەسەبىن تىڭداعان مەملەكەت باسشىسى ءوڭىردى دامىتۋدىڭ باسىم باعىتتارىن بەلگىلەپ بەردى.

«وبلىستىڭ الدىندا بىرقاتار مىندەت تۇر. سونىڭ ىشىندە استىق جيناۋ ناۋقانى. ارينە، بۇل ناۋقاننىڭ ءساتتى اياقتالۋى تابيعاتقا تىكەلەي بايلانىستى ەكەنىن تۇسىنەمىز. دەگەنمەن، تابيعي جاعدايلاردىڭ كەرى اسەرىن مەيلىنشە ازايتىپ، استىقتى بارىنشا مول جيناۋ كەرەك. بۇل – ءبىر. ەكىنشىدەن، بيىلعى جاز نە كورسەتتى؟! مال شارۋاشىلىعىمەن اينالىساتىن قوجالىقتار مال ساتىپ الىپ، وزدەرىن فەرمەرمىز دەپ اتايدى. بىراق جەم-ءشوپ قورىن ازىرلەۋدى ۇمىت قالدىرادى. ءسىزدىڭ بايانداماڭىزدا بۇل ماسەلەنىڭ قامتىلعانى دۇرىس بولدى. قازىر وسى تۇيتكىلدى شەشۋمەن اينالىسۋ كەرەك»، دەدى قاسىم-جومارت توقاەۆ.

مەملەكەت باسشىسى قوسشى اۋىلىنا وبلىستىق ماڭىزى بار قالا مارتەبەسىن بەرۋ تۋرالى شەشىمىن ءتۇسىندىردى.

«جارلىققا قول قويىلدى. اتالعان قۇجاتقا قول قويىلۋىن جانە وبلىستىق ماڭىزى بار قالا مارتەبەسىنىڭ بەرىلۋىن كوپشىلىك كەڭىنەن قولداپ جاتىر. بىراق، وسى شەشىمنىڭ ءمانى مەن ماڭىزىن تەك وبلىس كولەمىندە عانا ەمەس، جالپى ەلىمىز بويىنشا حالىققا قوسىمشا ءتۇسىندىرۋ كەرەك. بۇل شەشىم، ەڭ الدىمەن، قوسشى تۇرعىندارىنىڭ ءومىرىن جەڭىلدەتۋ ماقساتىندا قابىلداندى. وندا قاعاز بويىنشا 40 مىڭعا جۋىق تۇرعىن ءومىر سۇرەدى. شىن مانىندە، ول جەردە 80 مىڭ ادام تۇرادى. ولار تۇرمىستىق ماسەلەلەرىمەن وبلىس ورتالىعى كوكشەتاۋعا بارۋعا ءماجبۇر بولادى. وعان كوپ ۋاقىت، كۇش جۇمسايدى. ارينە، بۇل تۇرعىنداردىڭ جۇيكەسىن جۇقارتادى. سوندىقتان قالانىڭ اكىمشىلىك مارتەبەسىن وزگەرتەتىن وسىنداي شەشىم قابىلداندى. مەن مۇنى دۇرىس شەشىم دەپ ەسەپتەيمىن»، دەدى پرەزيدەنت.

،

قاسىم-جومارت توقاەۆ كوكشەتاۋ قالاسىنىڭ تۇرعىندارىنا بەرگەن ۋادەسىنىڭ ورىندالۋى جانە جىلۋ ەلەكتر ورتالىعىنىڭ قۇرىلىسىنا كىرىسۋ قاجەت ەكەنىن دە ايتتى.

«كوكشەتاۋ قالاسى ءوز جىلۋ ەلەكتر ورتالىعى جوق، تەك جىلۋ قازاندىقتارى عانا بار جالعىز وبلىس ورتالىعى بولىپ وتىر. بۇل جوبانىڭ قۇنى بىرنەشە ەسە ءوسىپ، 240 ميلليارد تەڭگە بولدى. ءبىز بۇدان ازداۋ قارجىعا جوسپارلادىق، بىراق جۋىردا ءتيىستى شەشىم قابىلدانادى. بۇل وبلىس ورتالىعىندا تۇراتىن حالىقتىڭ تۇرمىسىن جەڭىلدەتەدى. سوندىقتان مۇنى جۇزەگە اسىرۋ كەرەك. ۇكىمەت اتالعان شەشىمدى اياعىنا دەيىن جەتكىزەدى دەپ ويلايمىن»، دەدى مەملەكەت باسشىسى.

پرەزيدەنت اۋىل شارۋاشىلىعى ماشينالارىن جاساۋ ءىسىن دامىتۋ ماسەلەسىنە نازار اۋدارىپ، كوكشەتاۋ قالاسى وسى سالاداعى باستى تىرەك ورتالىقتاردىڭ ءبىرى ەكەنىن اتاپ ءوتتى.

«بۇل – ەل ەكونوميكاسىنىڭ اسا ماڭىزدى ءارى پەرسپەكتيۆتى باعىتى. بۇگىن مەن قازاقستاننىڭ اۋىل شارۋاشىلىعى دەرجاۆاسىنا اينالۋى ءتيىس دەپ ايتتىم. بۇل – ءورشىل، بىراق قول جەتكىزۋگە بولاتىن ماقسات. وسى رەتتە وبلىستىڭ ءرولىن اسىرا باعالاۋ قيىن. بۇل باعىتتا ءبىز مەملەكەتىمىزدىڭ اۋىل شارۋاشىلىعى الەۋەتىن كۇشەيتۋگە باعىتتالعان اقمولا وبلىسىنىڭ كۇش-جىگەرىن قولدايمىز»، دەدى قاسىم-جومارت توقاەۆ.

0

مەملەكەت باسشىسى اكىمدىكتىڭ تۇرعىن ءۇي قۇرىلىسى جونىندەگى جوسپارىن قولدادى. ونىڭ پىكىرىنشە، الەۋمەتتىك تۇرعىن ءۇي ءبولۋ ماسەلەسىن رەتتەۋ قاجەت.

«تۇرعىن ءۇي قۇرىلىسىنا بايلانىستى ماسەلەلەردى نەعۇرلىم كوپ شەشسەك، سوعۇرلىم مۇنداي پاتەر العىسى كەلەتىن ادامدار كوبەيە تۇسەدى. اتالعان ماسەلەنى رەتتەۋ قاجەت. ەشقانداي نەگىزسىز الەۋمەتتىك تۇرعىن ءۇي كەزەگىنە تۇرعان ادامدار تيىسىنشە ەلەكتەن وتكىزىلۋى كەرەك. بىراق، مەملەكەتتىڭ نەگىزگى قىزمەتى ازاماتتاردىڭ الدىنداعى ءوز مىندەتتەمەلەرىن ورىنداۋ ەمەس پە؟ ولاردى اۋرە-سارساڭعا سالۋعا مۇلدە بولمايدى»، دەدى پرەزيدەنت.

قاسىم-جومارت توقاەۆ اۋىل اكىمدەرىنىڭ تىكەلەي سايلاۋىن وتكىزۋ تۋرالى شەشىمنىڭ دۇرىستىعىنا تاعى ءبىر مارتە توقتالدى. پرەزيدەنتتىڭ ايتۋىنشا، سايلاۋ اشىق ءارى ءادىل ءوتتى. تۇرعىندار تاراپىنان ەشقانداي شاعىم تۇسكەن جوق. اۋىلداعى اعايىن وزدەرىنىڭ ەلدى مەكەندەرىن باسقارۋعا قولايلى كورگەن ادامدارىن سايلادى.

«ەندى، جەرگىلىكتى اكىمدەر وزدەرىن سايلاعان ازاماتتاردىڭ الدىندا تىكەلەي جاۋاپ بەرەدى. ولاردىڭ ءوز باعدارلامالارى بولدى. سول باعدارلامالاردى جۇزەگە اسىرۋى قاجەت. سونىمەن قاتار وبلىس اكىمدەرى سايلانعان ازاماتتارعا كومەكتەسۋى كەرەك. وسى رەتتە مەن مىنا ماسەلەگە ەرەكشە ءمان بەرگىم كەلەدى. سايلانعان اكىمدەر وزدەرىنىڭ كەزدەيسوق سايلانباعانىن ىسپەن دالەلدەۋى قاجەت. ولار ءوز باعدارلامالارىن سوزبەن ەمەس، ىسپەن ورىنداۋعا ءتيىس. وكىنىشكە قاراي، ءبىز كوپ سويلەپ، از ءىس اتقارامىز. ال ءبىز بۇل جاعدايدى 180 گرادۋسقا وزگەرتكەنىمىز ءجون. ياعني، كوپ ىستەپ، از سويلەۋىمىز قاجەت»، دەپ قورىتىندىلادى مەملەكەت باسشىسى.

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار