بيىل 71 نىساندا كۇردەلى جوندەۋ جۇمىستارى اتقارىلىپ, مەجەلەنگەن جۇمىستاردىڭ 80 پايىزى ورىندالعان. ورتاشا جوندەۋ جۇمىستارى جالپى ۇزىندىعى 200 شاقىرىمنان اساتىن 160 كوشەنى قامتيدى. ءبىرىنشى جارتىجىلدىقتا جوندەۋ جۇمىستارى 66 كوشەدە اياقتالدى.
جولداردىڭ احۋالىن تالداعان قالا اكىمى مۇرات ايتەنوۆ, جول سالۋ بارىسىندا ينجەنەرلىك جەلىلەر قۇدىقتارى جول بەتىمەن ءبىر دەڭگەيدە بولۋى كەرەكتىگىنە نازار اۋداردى. جولداردى كۇردەلى جوندەۋدەن وتكىزۋگە كەتەتىن شىعىن جاڭا جولدار سالۋعا جۇمسالاتىن قارجىمەن بىردەي بولاتىنىن اتاپ, كۇردەلى جوندەۋدەن وتكىزىلگەن جولداردىڭ ساناتى ارتاتىنىن, ولاردىڭ جۇك كوتەرۋ قابىلەتى جاقسارا تۇسەتىنىن ايتىپ ءوتتى. قۇرىلىستىڭ تەحنيكالىق ەرەكشەلىكتەرى جونىندە تۇرعىندارعا اقپارات بەرۋدە جۇيەلى جۇمىستار اتقارۋدى تاپسىردى.
قالا باسشىسى رەسپۋبليكا داڭعىلى قالانىڭ نەگىزگى كولىك ماگيسترالىنىڭ ءبىرى ەكەندىگىن اتاپ ءوتتى. قازىرگى تاڭدا تراسسا بويىمەن جۇرگىزىلگەن ينجەنەرلىك جەلىلەر قۇدىقتارىن جول بەتىمەن بىردەي دەڭگەيگە كوتەرۋ جۇمىستارى اتقارىلعان. جول تاڭبالارىن سىزۋدا قالانىڭ اۋا رايىنا شىداي بەرەتىن سۋىق پلاستيك تەحنولوگياسى قولدانىلماق. داڭعىل بويىنداعى اياقجولدارعا برۋسچاتكا توسەۋدە بىرىڭعاي ءتارتىپتى ۇستانۋ تاپسىرىلىپ, قالانىڭ باستى ترانسپورتتىق كۇرەتامىرى سانالاتىن اۆتوجولدى تەز ارادا ءبىتىرۋ جونىندە ناقتى مىندەت قويىلدى.
بيىل 157 شاقىرىم بولاتىن جولدارعا شاعال تاس توسەۋ جۇمىستارى جوسپارلانعان. وعان قوسىمشا ينجەنەرلىك ينفراقۇرىلىم تارتىلعان اۋماقتاردىڭ دا كوشەلەرى قوسىلىپ وتىر.
مۇنداي جۇمىس ءادىسى دۇرىس ەمەس ەكەندىگىن نازارعا العان مۇرات ايتەنوۆ, قالا اكىمدىگىنىڭ سالالىق باسقارمالارىنا جەر قازۋ جۇمىستارىن اتقارعان مەردىگەر ۇيىمدار, وزدەرى بۇزعان جولداردى قالپىنا كەلتىرۋى ءتيىس دەگەن تالاپتى قۇجات جۇزىندە بەكىتۋدى تاپسىردى. جول جابىندىلارىنىڭ نورماتيۆتەرگە ساي نىعىزدالۋىن قاداعالاۋدى جۇكتەپ, قاجەت بولعان جاعدايدا جولدىڭ نىعىزدىلىق دەڭگەيىنە زەرتحانالىق ادىسپەن باقىلاۋ ۇيىمداستىرۋدى تاپسىردى. ەڭ باستىسى, تۇرعىندار لاي كەشىپ, زارداپ شەكپەۋى ءتيىس ەكەنىن قاتاڭ تۇردە ەسكەرتتى.
