قىرعىزستان بيلىگى تاجىكستانمەن شەكتەسەتىن بارلىق شەكارالىق وتكىزۋ بەكەتتەرى مەن كەدەن بەكەتتەرىن ۋاقىتشا جابۋ جونىندە شەشىم قابىلدادى. بۇل تۋرالى يتار-تاسس اگەنتتىگىنە سىلتەمە جاساعان Ras.kz حابارلادى.
«وتكىزۋ بەكەتتەرى قالىپتاسقان جاعداي دۇرىستالعانعا دەيىن جابىق تۇرادى, – دەپ ءتۇسىندىردى قىرعىزستان سىرتقى ىستەر مينيسترلىگىنىڭ ءباسپاسوز قىزمەتى . – ءبىزدىڭ تاراپىمىزدان اتالعان شارا ەتنوس ارالىق جانجالداردىڭ الدىن الۋ جانە شەكارالاس اۋداندارداعى تۇرعىنداردىڭ قاۋىپسىزدىگىن قامتاماسىز ەتۋ ماقساتىندا قابىلداندى».
سەنبى كۇنى قىرعىزستاننىڭ باتكەن وبلىسى اق-ساي ەلدى مەكەنىندە قىرعىز جانە تاجىك شەكاراشىلارى اراسىندا اتىس بولىپ, ونىڭ بارىسىندا مينومەتتەن وق اتىلدى. ناتيجەسىندە قىرعىز جاعىنان 6 اسكەري قىزمەتكەر جاراقات الدى, ولاردىڭ ەكەۋى قازىر اۋىر حالدە جاتىر. قىرعىزستان ۇكىمەتى وق اتۋدى تاجىك جاعى باستاعانىن ايتىپ وتىر. وسىعان بايلانىستى رەسپۋبليكا شەكارا قىزمەتىنىڭ باسشىلارى باتكەن وبلىسىنا جىبەرىلدى.
قىرعىزستان سىرتقى ىستەر مينيسترلىگىنىڭ مالىمدەۋىنشە, تاجىكستانعا بىشكەك قالىپتاسقان جاعدايعا جانە تاجىك اسكەري قىزمەتكەرلەرىنىڭ وتتى قارۋ قولدانعانىنا الاڭداۋشىلىق بىلدىرگەن تاعى ءبىر نوتا جولداعان. بۇدان بۇرىن قىرعىزستان ۇكىمەتى ورىن العان ينتسيدەنتتى تاجىك تاراپىمەن بىرگە تەكسەرۋگە دايىن ەكەنىن بىلدىرگەن بولاتىن.
ايدار ورىسباەۆ.
دەرەككوز: Ras.kz
فوتو: Lenta.ru
