قوعام • 27 شىلدە، 2021

دوسىن قۇتقارعان جاس ورەن

باتىس قازاقستان وبلىسى اقجايىق اۋدانىنا قاراستى قاراۋىلتوبە اۋىلىندا تۇراتىن اسىلان وراحاەۆ جايىق وزەنىنە سۋعا كەتىپ بارا جاتقان دوسى شىڭعىستى قۇتقارىپ قالدى. وقيعانى كەزدەيسوق كورىپ قالعان اۋىل تۇرعىنى بولماسا، ءجاسوسپىرىمنىڭ بۇل ەرلىگىن ەشكىم بىلمەس ەدى.

قازبەك قۇتتىمۇرات ۇلى

وقيعا 19 شىلدە كۇنى كەشكى ساعات 19.00 شاماسىندا بولعان.

«بالامنىڭ دوستارى شىڭعىس پەن جانتۋعان كەلىپ، اسىلاندى سۋعا شومىلۋعا ەرتىپ اكەتتى. ادەتتەگىدەي تەرەڭگە بارماۋىن ەسكەرتىپ، جىبەردىم. سول كۇنى كەشتە ۇيگە كەلگەندە بالام كوپ سويلەمەي، تۇيىق وتىردى. بىراق ەشتەڭە ايتقان جوق. بولعان جاعدايدى اتا-انالاردىڭ whatsapp توبىنداعى اۋديوجازبادان ەرتەڭىنە ءبىر-اق ءبىلدىم»، دەيدى اسىلاننىڭ اناسى بارشاگۇل.

جايىق وزەنىندەگى وقيعاعا سول ماڭدا سەرۋەندەپ جۇرگەن اۋىل تۇرعىنى دينارا شامۇراتقىزى كەزدەيسوق كۋا بولعان.

«قىزىم اقمارجان ەكەۋمىز جايىقتا شومىلىپ جۇرگەنبىز. اۋىل جاقتان ءۇش بالا كەلىپ، بىزدەن الىسىراق جەردە سۋعا تۇسە باستادى. اسىلان مەن جانتۋعان – توعىزىنشى سىنىپ بىتىرگەن، ال شىڭعىس – ءبىر سىنىپ تومەن وقيتىن بالا. ءبىر كەزدە ءبىر بالانىڭ كومەك سۇراعان داۋسى شىقتى. باسىندا بالالار ويناپ جۇرگەن شىعار دەپ ءمان بەرمەدىك. داۋىس تاعى شىققاندا قاراساق، شىڭعىس وزەننىڭ ورتاسىندا سۋعا باتىپ-شىعىپ ءجۇر ەكەن. سول كەزدە اسىلان ءجۇزىپ بارىپ، شىڭعىستى قۇتقارۋعا تالپىندى. ەكەۋى سۋ ورتاسىندا بىرەسە سۋعا باتىپ كەتەدى، بىرەسە سۋ بەتىنە شىعىپ، ارپالىسىپ جاتىر. بىرنەشە مينۋتتان كەيىن اسىلان شىڭعىستى ارەڭ دەگەندە سۋ جاعاسىنا الىپ شىقتى. سۋ جۇتىپ، السىرەپ قالعان شىڭعىس ءوز-وزىنە كەلگەن سوڭ ۇشەۋى اۋىلعا بەتتەدى. اسىلاننىڭ باتىرلىعىنا وسىلاي كۋا بولدىم»، دەيدى دينارا.

ءۇش دوس وقىس وقيعادان قاتتى شوشىپ قالسا كەرەك. وزەن جاعاسىنان اۋىلعا دەيىن ءۇنسىز كەلىپتى. «تەرەڭگە بارماڭدار!» دەگەن ۇلكەندەردىڭ ەسكەرتپەسىن بۇزعانىن ەشكىم بىلمەۋى ءۇشىن بولعان جايتتى قۇپيا قالدىرعان ەكەن. بىراق كەزدەيسوق كۋاگەر اسىلاننىڭ ەرلىگىن جاريا ەتتى.

«بالامدى اجالدان قۇتقارعان اسىلانعا، ونىڭ اتا-اناسىنا العىسىم شەكسىز. اسىلاننىڭ بولاشاقتا ەلىنە ادال قىزمەت ەتەتىن ازامات بولاتىنىنا سەنىمدىمىن!»، دەيدى شىڭعىس ماناربەك ۇلىنىڭ اناسى م.كومەشوۆا.

ء«بىز اسىلان وقيتىن مەكتەپتەن، اۋىلدىق وكرۋگ اكىمدىگىنەن ءتيىستى قاعازداردى سۇراتىپ جاتىرمىز. باتىر بوزبالا دەپارتامەنتتىڭ العىس حاتىمەن ماراپاتتالادى»، دەدى وبلىستىق توتەنشە جاعدايلار دەپارتامەنتىنىڭ قوعاممەن بايلانىس قىزمەتكەرى انەل مۇقانوۆا.

باتىس قازاقستان وبلىسىنىڭ سۋ ايدىندارىندا جىل باسىنان بەرى 22 ادام سۋعا كەتىپ قايتىس بولعان، ونىڭ 8-ءى – كامەلەتكە تولماعاندار.

باتىس قازاقستان وبلىسى