سەنات دەپۋتاتى عۇمار دۇيسەمباەۆ اتىراۋ وبلىسىنىڭ يساتاي جانە قۇرمانعازى اۋداندارىنىڭ تۇرعىندارىمەن كەزدەستى. سەناتور اۋىل تۇرعىندارىنا پالاتا قىزمەتىنىڭ قورىتىندىلارى تۋرالى ايتىپ, وتكەن سەسسيا بارىسىندا قابىلدانعان زاڭدارداعى نەگىزگى جاڭالىقتار تۋرالى جان-جاقتى حاباردار ەتتى. ول سونداي-اق وسى ۋاقىت ىشىندە ۇكىمەت باسشىسىنىڭ اتىنا بىرنەشە دەپۋتاتتىق ساۋال جولداعانىن اتاپ ءوتتى. ولار اتىراۋ وبلىسىنىڭ تۇرعىندارى كوتەرگەن پروبلەمالىق ماسەلەلەرگە ارنالعان بولاتىن.
سەناتوردىڭ بيىلعى مامىر ايىندا وڭىرگە ساپارى بارىسىندا قىزىلۇي جانە جاسقايرات اۋىلدارىنىڭ تۇرعىندارى گاز قۇبىرىن تارتۋ ماسەلەلەرىن ايتقان ەدى. عۇمار دۇيسەمباەۆ وسى ماسەلەنى شەشۋگە اتسالىسقانىن اتاپ ءوتتى. سونىڭ ناتيجەسىندە قازىرگى كەزدە قاجەتتى قارجى ءبولىنىپ, ءتيىستى راسىمدەر وتكىزىلدى. جۇزدەسۋ كەزىندە مەملەكەتتىك مەنشىكتەگى نارىن سۋ ارناسىن كۇردەلى جوندەۋ ماسەلەسى دە تالقىلاندى. بۇل سۋ ارناسى 4 ەلدى مەكەن تۇرعىندارىنىڭ مالى جايىلاتىن جايىلىم القابىن سۋمەن قامتاماسىز ەتەدى.
قۇرمانعازى اۋدانىنىڭ اسان, ازعىر, بالقۇدىق جانە سۇيىندىك اۋىلدارىندا مەملەكەتتىك شەكارادان جەڭىلدەتىلگەن تارتىپپەن ءوتۋ شارتتارىن جاقسارتۋعا قاتىستى سۇراقتار سەناتورعا كوبىرەك قويىلدى. قازىر ءوڭىر تۇرعىندارى شەكارانى شەكتەۋلى ۋاقىتتا تەك جەكە اۆتوكولىكپەن جانە 30 كيلوگرامم جۇكپەن عانا كەسىپ وتە الادى. سەناتور بۇل ماسەلە قازاقستان مەن رەسەيدىڭ سىرتقى ىستەر مينيسترلىكتەرى دەڭگەيىندە عانا ەمەس, ەكى ەلدىڭ ۇكىمەت باسشىلارى تاراپىنان دا قارالىپ جاتقانىن اتاپ ءوتتى. عۇمار دۇيسەمباەۆ, سونداي-اق بۇل ماسەلە قازاقستان پارلامەنتى سەناتىنىڭ جانە رەسەي فەدەراتسياسى كەڭەسى فەدەرالدىق جينالىسىنىڭ توراعالارى مەن دەپۋتاتتارىنىڭ كەزدەسۋلەرى كەزىندە دە كوتەرىلگەنىن ەسكە سالدى.
اۋىل تۇرعىندارى كوتەرگەن تاعى ءبىر ماسەلە – جولداردىڭ ساپاسىنا قاتىستى بولدى. سەناتور ماسەلەنى جەرگىلىكتى جەردە زەردەلەۋ ءۇشىن جول ماماندارىمەن, مەردىگەر ۇيىمداردىڭ وكىلدەرىمەن بىرقاتار كەزدەسۋ وتكىزىپ, «اتىراۋ-استراحان» اۆتوموبيل جولىنىڭ قۇرىلىس بارىسىمەن تانىستى. دەپۋتات جۇرگىزىلىپ جاتقان جۇمىستاردىڭ ساپاسى جوعارى بولۋى ماڭىزدى ەكەنىنە مەردىگەر ۇيىمداردىڭ نازارىن اۋداردى.
سەناتور اۋىل تۇرعىندارىمەن, قوعامدىق ۇيىمداردىڭ وكىلدەرىمەن, سونداي-اق اۋداندار مەن وبلىس باسشىلىعىمەن بارلىق كەزدەسۋى بارىسىندا سەناتتاعى جانە ءتيىستى سالا ماماندارى اتقارعان جۇمىستار تۋرالى ەگجەي-تەگجەيلى حاباردار ەتتى.
سەنات دەپۋتاتى اقمارال ءالنازاروۆا قىزىلوردا وبلىسىنا ساپارى بارىسىندا قاتتى تۇرمىستىق قالدىقتاردى جيناۋ پوليگونىنىڭ جۇمىسىمەن جانە مودۋلدىك ينفەكتسيالىق ستاتسيونار قۇرىلىسىنىڭ سالىنۋ بارىسىمەن تانىستى.
بەلكول كەنتىندە بولعان كەزدە وسى ەلدى مەكەن اۋماعىندا ورنالاسقان ءارى اۋماعى 20 گەكتار بولاتىن پوليگوننىڭ قورشالماعانى جانە سانيتارلىق-ەكولوگيالىق تالاپتارعا سايكەس كەلمەيتىنى اتاپ ءوتىلدى. سونىمەن قاتار بۇل پوليگون قوقىس سۇرىپتاۋ كەشەنىمەن جابدىقتالماعان. قىزىلوردا اكىمىنىڭ ايتۋىنشا, پوليگوندى تولىق قالىپقا كەلتىرۋ ءۇشىن رەسپۋبليكالىق بيۋدجەتتەن قارجى ءبولۋ قاجەت. اقمارال ءالنازاروۆا قالا تۇرعىندارىنىڭ دەنساۋلىعىنا جانە ءوڭىردىڭ ەكولوگياسىنا زيان كەلتىرمەۋ ءۇشىن وسى باعىتتا بىرلەسكەن جۇمىسقا دايىن ەكەنىن اتاپ ءوتتى.
سەناتور سونداي-اق 200 ورىندىق ءمودۋلدى جۇقپالى اۋرۋلار اۋرۋحاناسىنىڭ سالىنۋ بارىسىمەن تانىستى. قازىرگى ۋاقىتتا قۇرىلىس جۇمىستارى اياقتالدى, بىراق نىسان ءالى پايدالانۋعا بەرىلمەگەن, سەبەبى مەملەكەتتىك ساراپتامادان ءوتۋ توقتاتىلعان. اقمارال ءالنازاروۆا ەپيدەميالىق احۋالدىڭ شيەلەنىسۋى جاعدايىندا بۇل جۇمىستى جەدەلدەتۋ قاجەتتىگىن اتاپ ءوتتى.
سەناتور بەكبولات ورىنبەكوۆ جامبىل وبلىسىنىڭ اۋداندارىنا جاساعان ساپارى بارىسىندا اۋىلدىق سايلاۋ ۋچاسكەلەرىندە بولدى. ول اۋىل اكىمدەرىن تىكەلەي سايلاۋ مەن جەرگىلىكتى ورگانداردىڭ دەربەستىگىن نىعايتۋعا باعىتتالعان جانە ەلىمىز پرەزيدەنتىنىڭ باستاماسىمەن ازىرلەنگەن سەنات قابىلداعان زاڭدار تۋرالى اۋىل تۇرعىندارىنا ەگجەي-تەگجەيلى ايتىپ بەردى. سەناتور وسىعان بايلانىستى سايلانعان اۋىل اكىمدەرىنە زور جاۋاپكەرشىلىك جۇكتەلەتىنىن اتاپ ءوتتى.
بەكبولات ورىنبەكوۆ سونداي-اق وبلىستىڭ بىرقاتار الەۋمەتتىك نىسانىن ارالادى. مەركى اۋدانىنداعى جاڭا سپورت كەشەنىنىڭ جۇمىسىمەن تانىسقان سەنات دەپۋتاتى مۇنداي نىساندار بۇقارالىق سپورتتى دامىتۋ ءۇشىن ماڭىزدى ەكەنىن اتاپ ءوتتى.
سەناتور مەركى جانە تالاس اۋداندارىنداعى مەكتەپتەردە بولىپ, پەداگوگتارمەن مەملەكەت باسشىسىنىڭ مەكتەپتەردى ءداستۇرلى وقىتۋ جۇيەسىنە قايتارۋ جونىندەگى تاپسىرمالارىنىڭ ورىندالۋ بارىسىن تالقىلادى. ءبىلىم ۇيىمدارىن قىسقى جىلىتۋ ماۋسىمىنا دايىنداۋ قاجەتتىگىنە نازار اۋداردى.
سەناتور تالاس اۋداندىق ورتالىق اۋرۋحاناسىندا دا بولدى. دارىگەرلەر مەديتسينالىق قىزمەتكەرلەر تۇگەلدەي ەكپە العانىن حابارلاپ, اۋدان تۇرعىندارىن ۆاكتسينالاۋ بارىسىمەن تانىستىردى.
سەناتور تۇرار رىسقۇلوۆ اۋدانىنا بارعان ساپارىندا قوناەۆ جانە ابىلقايىر اۋىلدارىنا گاز قۇبىرىن جەتكىزۋ جۇمىستارىنىڭ بارىسىن تەكسەردى. بەكبولات ورىنبەكوۆ مەردىگەر ۇيىم وكىلدەرىمەن كەزدەسۋدە اتالعان اۋىلداردىڭ بارلىق تۇرعىنىن قىسقى جىلىتۋ ماۋسىمى باستالعانعا دەيىن تابيعي گازبەن قامتاماسىز ەتۋدىڭ ماڭىزدىلىعىن اتاپ ءوتتى.
ءماجىلىس دەپۋتاتتارى ەرلىك تايجانوۆ پەن دميتري كولودا سولتۇستىك قازاقستان وبلىسىنداعى ەلەكتر-تەحنيكالىق جابدىقتاردى ءوندىرۋ زاۋىتىنا بارىپ, كاسىپورىن باسشىلىعىمەن پروبلەمالىق ماسەلەلەردى تالقىلادى.
بۇگىندە پەتروپاۆل ەلەكتر-تەحنيكالىق جابدىق زاۋىتى ءوز اينالىمىن ارتتىرۋدا. بۇعان دەيىن وسى بۇرىنعى شاعىن ليتراجدى قوزعالتقىشتار زاۋىتىنىڭ عيماراتتارى بوس تۇرعان. ال قازىر مەملەكەتتىڭ قولداۋىنىڭ جانە ينۆەستور قاراجاتتارىنىڭ ارقاسىندا تسەحتار جۇمىسىن قايتا باستايدى. قۇرىلىس جۇمىستارى اياقتالۋعا جاقىن, كاسىپورىن كەلەسى جىلدىڭ باسىندا تولىق قۋاتىنا شىعادى. وبەكتىدەگى رەكونسترۋكتسيالاۋ وندىرىسپەن قاتار جۇرگىزىلۋدە.
بۇل جوبا Nur Otan پارتياسىنىڭ سايلاۋالدى باعدارلاماسىندا بەلگىلەنگەن بولاتىن. ترانسفورماتورلار مەن وزگە دە ەلەكتر تەحنيكاسىن وندىرۋگە ينۆەستيتسيا رەتىندە 12 ملرد تەڭگەگە جۋىق قاراجات ءبولىندى. ونىڭ 8-ءىن قازاقستاندىق Alageum Electric كومپانياسى سالدى. شامامەن 4 ملرد تەڭگەنى مەملەكەتتىك ينۆەستيتسيالار قۇرادى. قاراجاتتىڭ كوپ بولىگى يگەرىلگەن. كاسىپورىن جابدىقتار ساتىپ الىپ, 2020 جىلدىڭ مامىر ايىندا باستالعان وندىرىستىك ءۇي-جايلاردى قايتا جوندەۋدەن وتكىزدى. وسى جىلدىڭ سوڭىنا قاراي زاۋىتتا 3 مىڭعا دەيىن ترانسفورماتور شىعارۋ جوسپارلانۋدا.
قازىر نىساندا 140 ادام جۇمىس ىستەيدى. وسى جىلدىڭ سوڭىنا دەيىن مۇندا 310 جۇمىس ورنىن اشۋ جوسپارلانۋدا. كاسىپورىن ديرەكتورى ماقسات ۇسەنباەۆتىڭ ايتۋىنشا, كوروناۆيرۋس ىندەتىنە بايلانىستى قۇرىلىس كەزىندە كادرلاردىڭ جەتىسپەۋشىلىگى باستى پروبلەماعا اينالعان. وسى ماسەلە زاۋىت تولىق ىسكە قوسىلعان كەزدە دە تۋىنداۋى مۇمكىن. كادرلاردىڭ جەتىسپەۋشىلىگى وندىرىسكە اسەر ەتپەۋى ءۇشىن قازىر جۇمىسپەن قامتۋ ورتالىعىمەن ءوزارا ءىس-قيمىل جولعا قويىلعان.
ەرلىك تايجانوۆ پەن دميتري كولودا كاسىپورىن باسشىلىعىنا اتالعان ماسەلەنى كادرلاردى قايتا دايارلاۋ ەسەبىنەن شەشۋگە بولاتىنىن ايتتى.
