«كومپانيا وكىلدەرىنە تۇتىنۋشىلاردان ونىمدەر ساپاسىز بولدى دەگەن شاعىم تۇسە باستادى. سول كەزدەن باستاپ كومپانيا جالعان تسەحتىڭ ىزىنە ءتۇستى. ءبىر اپتادا بۇل تسەحتا 5-6 ميلليون تەڭگەگە قۇرعاق ءسۇت ءوندىرىلىپ, ءبىر ايدا 10 ميلليون تەڭگەگە جۋىق ءونىم ءوندىرىلدى», دەپ جازادى وtyrar.kz.
ونىمدەرگە ارنالعان قاپتامالار جاقىن شەت ەلدەردەن ساتىپ الىنعان. دايىنداعان ونىمدەردى كورشىلەس مەملەكەتتەرگە جىبەرىپ وتىرعان. شىمكەنتتەن شىققان جالعان قوپسىتقىش تەك جەرگىلىكتى بازارلاردان عانا ەمەس, كورشىلەس قىرعىزستاننان دا تابىلدى.
«ىشىندە نەگىزىنەن سودا, ناتري ءحلوريدى جانە ليمون قىشقىلى بار. ولار جالعان. بۇنداي ونىمدەردى جاساۋ ءۇشىن قاجەتتى زاتتار بازاردا قول جەتىمدى. قاپتاما ماتەريالدارى تمد ەلدەرىنەن, وزبەكستاننان, تاشكەنتتەن اكەلىنگەن. وسى ونىمدەردى جاساعان قاسكۇنەم ۇستالدى, قازىر تەرگەۋ امالدارى ءجۇرىپ جاتىر», دەدى «CYKORIA» كومپانياسىنىڭ ەكونوميكالىق قاۋىپسىزدىك قىزمەتكەرى احمەت امانباەۆ.
تسەح پەن قويماعا ارنالعان بولمە جالعا الىندى. قۇرعاق ءسۇت پەن قوپسىتقىش ۇنتاق لاس ەدەندە جاتقان. كومپانيا وكىلدەرىنىڭ ايتۋىنشا, كۇدىكتىلەر تاۋارلاردى اكبار, جىبەك جولى جانە ت.ب. بازارلارىندا ساتقان. جالعان وراما بولسا, ءىس جۇزىندە تۇپنۇسقادان ەرەكشەلەنبەدى.
تەرگەۋ امالدارى كورسەتكەندەي, زاڭسىز ءوندىرىس وشاعىندا كامەلەتكە تولماعان بالالار جۇمىس ىستەگەن. ولاردىڭ جۇمىسى كۇنىنە ءۇش مىڭ تەڭگەگە باعالانعان. جاسوسپىرىمدەر سول تسەحتىڭ ىشىندە تۇردى. جاسىرىن زاۋىتتىڭ يەلەرى بالالار ءۇشىن جاتاقحانا ۇيىمداستىرعان.
«مەن 14 جاستامىن, اپكەم وسىندا جۇمىس ىستەۋگە شاقىردى. ول دا وسىندا جۇمىس ىستەيدى. كۇنىنە 3-4 مىڭ الامىز. انام مەن اكەم مەنىڭ وسىندا جۇمىس ىستەيتىنىمدى بىلەدى», دەدى كامەلەتكە تولماعان بالا.
قازىر كامەلەتكە تولماعاندارمەن يۋۆەنالدى پوليتسيا جۇمىس ىستەۋدە. جالعان زاۋىت ۇيىمداستىرۋشىلارىن ايىپپۇل نەمەسە تۇرمە مەرزىمى كۇتەدى.
