اقش-تا ۆيزالىق الاياقتىق جاسادى دەپ ايىپتالعان ءۇندىستان سىرتقى ىستەر مينيسترلىگىنىڭ جوعارى لاۋازىمدى قىزمەتكەرى دەۆياني حوبراگادە نيۋ-يوركتەن دەليگە جەتكىزىلدى. ءۇندىستان سىرتقى ساياسات ۆەدومستۆوسى حابارلاعانداي, حوبراگادە ءۇندىستان سىرتقى ىستەر مينيسترلىگىندە جۇمىسىن جالعاستىرماق, ال ونىڭ بالالارى بولسا, بۇرىنعىشا اقش-تا تۇرىپ جاتىر.
شاراينا
داۋعا ىلىككەن ديپلومات ەلىنە قايتتى
اقش-تا ۆيزالىق الاياقتىق جاسادى دەپ ايىپتالعان ءۇندىستان سىرتقى ىستەر مينيسترلىگىنىڭ جوعارى لاۋازىمدى قىزمەتكەرى دەۆياني حوبراگادە نيۋ-يوركتەن دەليگە جەتكىزىلدى. ءۇندىستان سىرتقى ساياسات ۆەدومستۆوسى حابارلاعانداي, حوبراگادە ءۇندىستان سىرتقى ىستەر مينيسترلىگىندە جۇمىسىن جالعاستىرماق, ال ونىڭ بالالارى بولسا, بۇرىنعىشا اقش-تا تۇرىپ جاتىر.
2013 جىلدىڭ جەلتوقسانىندا ءمالىم بولعانىنداي, حوبراگادەنىڭ ءۇي كۇتۋشىسى 2013 جىلدىڭ جەلتوقسانىندا قۇقىق قورعاۋ ورگاندارىنا ديپلومات وعان اقش-تا بەلگىلەنگەن ەڭ تومەنگى دەڭگەيدەن تومەن جالاقى تولەيدى دەپ شاعىمدانعان بولاتىن. سونىڭ سالدارىنان حوبراگادە ۆيزالىق الاياقتىق جاسادى دەگەن كۇدىكپەن قاماۋعا الىنعان ەدى. جەرگىلىكتى باق-تا جازىلعانداي, ونىڭ ءۇي كۇتۋشىسى ءۇشىن الىنعان ۆيزالىق قۇجاتتاردا ونىڭ ەڭبەكاقىسى ناقتىلى تولەنگەننەن جوعارى بولىپ كورسەتىلگەن.
سودىرلار شابۋىلى ءساتسىز اياقتالدى
سيريا اۋماعىندا ارەكەت ەتىپ جۇرگەن سودىرلار ۋلاندىرعىش گاز ازىرلەۋ ءۇشىن پايدالانىلاتىن حيميالىق زاتتار قورى ساقتالعان قويماعا ەكى مارتە شابۋىل جاساپ, ولارى ءساتسىز اياقتالعان. بۇل تۋرالى بەيسەنبى كۇنى ليۆاندىق Daily Star گازەتى اتى اتالماعان باتىستىق ديپلوماتقا سىلتەمە جاساي وتىرىپ حابارلاعان كورىنەدى.
ونىڭ ايتۋىنشا, بۇل تۋرالى حيميالىق قارۋ-جاراققا تىيىم سالۋ جونىندەگى ۇيىم جانىنداعى سيريانىڭ وكىلى اتقارۋ كەڭەسىنىڭ جابىق وتىرىسىندا مالىمدەگەن. سيريا وكىلى وسى وتىرىستا شابۋىلدارعا تابىستى تۇردە تويتارىس بەرىلگەنىن اتاپ كورسەتكەن. ايتا كەتۋ كەرەك, سيريانىڭ حيميالىق ارسەنالى 2014 جىلدىڭ جازىنا تامان تولىق جويىلاتىن بولادى دەپ كۇتىلۋدە.
لە پەن ەۋرووداقتى قۇلاتۋعا شاقىردى
فرانتسۋزدىق «ۇلتتىق مايدان» وڭشىل پارتياسىنىڭ باسشىسى مارين لە پەن بەيسەنبى كۇنى ەۋرووداقتى قۇلاتۋ ءۇشىن قولىنان كەلگەننىڭ ءبارىن جاسايتىندىعىن ايتىپ, ۋادە بەردى.
ەۋرووداقتى جاقسارتۋ ءۇشىن نە ىستەۋگە بولادى؟ ول ءۇشىن ونى قۇلاتۋعا قول جەتكىزۋ كەرەك. مەن ءوزىم وسىناۋ ەۋروپالىق بىرلەستىكتەن ءبىر عانا نارسەنى – جارىلىستى كۇتەمىن, دەپ اتاپ كورسەتكەن ول فرانتسۋز جۋرناليستەرىنە. لە پەننىڭ پىكىرىنشە, ەۋرووداقتىڭ كۇيرەيتىن ءساتىن كۇتۋگە بولادى. مۇمكىندىگىنشە وعان جاعداي دا جاساۋ كەرەك. تەك سودان كەيىن عانا ەركىن ۇلتتار ەۋروپاسى قۇرىلىسىنا كىرىسۋگە بولادى.
بەس وكرۋگتە توتەنشە جاعداي
ەكل وزەنىنە حيميكاتتاردىڭ ءتۇسىپ كەتۋىنە بايلانىستى اقش-تىڭ باتىس ۆيردجينيا شتاتىنىڭ گۋبەرناتورى شتاتتىڭ بەس وكرۋگىندە توتەنشە جاعداي جاريالادى.
امەريكالىق باق-تىڭ حابارلاۋىنشا, وكرۋگتەر بيلىگى قۇبىر ارقىلى كەلەتىن سۋدى ىشۋگە جانە اس ازىرلەۋگە پايدالانۋعا تىيىم سالعان. ونى تەك تەحنيكالىق ماقساتتا عانا پايدالانۋعا بولادى. مۇنداي تىيىم ءجۇز مىڭعا تارتا جەرگىلىكتى تۇرعىنداردى قامتىپ وتىر. مامانداردىڭ مالىمەتىنە قاراعاندا, سۋعا ءتىپتى ايتارلىقتاي ءىرى كولەمدە بولعاننىڭ وزىندە ادام ءومىرى ءۇشىن قاۋىپ تۋدىرمايتىن مەتيلتسيكلوگەكسان زاتى ءتۇسىپ كەتكەن كورىنەدى.
كاسترو كوپشىلىك الدىندا كورىندى
كۋبانىڭ بۇرىنعى كوسەمى فيدەل كاسترو سوڭعى 9 ايدا العاش رەت كوپشىلىك الدىنا شىقتى. بۇل تۋرالى كۋبالىق بۇقارالىق اقپارات قۇرالدارىنا سىلتەمە جاساي وتىرىپ ءباسپاسوز اگەنتتىگى حابارلادى.
ۇكىمەتتىك Granma گازەتىنىڭ مالىمەتىنە قاراعاندا, 87 جاستاعى كۋبانىڭ ەكس-ليدەرى جاقىندا كۋبالىق سۋرەتشى الەكسيس لەيۆانىڭ گاۆاناداعى ارت-ستۋدياسىنىڭ اشىلۋىنا قاتىسقان. ول ءوزىنىڭ جۇرت الدىنا شىققانىن زور قوشەمەتپەن قارسى العان سۋرەتشىلەر مەن تۇرعىندارعا قىزۋ سالەم جولدادى دەپ اتاپ كورسەتكەن اتالمىش باسىلىم. سول سياقتى ۇكىمەتتىك سايتتا كاسترونىڭ لەيۆامەن سويلەسىپ تۇرعان فوتوسۋرەتى دە جاريالانعان كورىنەدى.
كۇننىڭ ىسۋى رەكوردتىق دەڭگەيگە جەتتى
اۆستراليا اۋماعىنىڭ 34 جەرىندە 50 گرادۋسقا جەتكەن رەكوردتىق ىستىق تىركەلىپ وتىر. بۇل جىلدىڭ قازىرگى مەزگىلى ءۇشىن شامادان تىس ىستىق بولىپ ەسەپتەلەدى.
اۆستراليا مەتەورولوگيالىق بيۋروسىنىڭ مامانى كارلي براگانزانىڭ پىكىرىنشە, مۇنداي ىستىققا جاھاندىق جىلىنۋ مەن اۋا رايىنا سالقىنداتۋشى اسەر ەتەتىن مۋسسوننىڭ اۆسترالياعا ۋاقىتىندا كەلمەۋى سەبەپكەر بولىپ وتىر. ونىڭ ايتۋىنا قاراعاندا, مۇنداي شەكتەن تىس ىستىقتىڭ الداعى اپتادا دا جالعاسۋى مۇمكىن.
اسكەري نىسانداعى جارىلىس
يراكتىڭ استاناسى باعدادتاعى اسكەري نىساندا بولعان قۋاتتى جارىلىس سالدارىنان جيىرما ءبىر قىزمەتشى قازا تاۋىپ, 35 ادام ءتۇرلى دەنە جاراقاتتارىن العان. بۇعان دەيىن ەل استاناسىندا بولعان جارىلىستان 13 ادامنىڭ قازا تاۋىپ, 30 ادامنىڭ جاراقات الۋى تۋرالى حابارلانعان بولاتىن.
جارىلىس يراك ارمياسىنا جاڭادان شاقىرىلعان جاۋىنگەرلەر تۇراتىن ورتالىق ورنالاسقان «ءال-مۋتاننا» اۋەجايىندا ورىن العان. بۇقارالىق اقپارات قۇرالدارىنىڭ حابارلاۋىنشا, بومبىنى جانكەشتى تەررورشى ىسكە قوسقان كورىنەدى. ازىرگە تەررورلىق اكتىگە بايلانىستى جاۋاپكەرشىلىكتى ەشكىم ءوز موينىنا العان جوق.
ينتەرنەت ماتەريالدارى نەگىزىندە ازىرلەندى.
