بۇدان ءبىر جىل بۇرىن قاراعاندىداعى « بەسوبا» تۇرعىن ءۇي كەشەنىندە ورىن العان جايسىز جاعداي بۇگىندە ۇمىتىلۋعا اينالدى. وسىنداعى قۇلاپ قالعان بەس قاباتتى ءۇيدىڭ ورنىنا جاڭادان تۇرعىزىلعان مەكەنجاي بوي كوتەرىپ ۇلگەردى.
بۇدان ءبىر جىل بۇرىن قاراعاندىداعى « بەسوبا» تۇرعىن ءۇي كەشەنىندە ورىن العان جايسىز جاعداي بۇگىندە ۇمىتىلۋعا اينالدى. وسىنداعى قۇلاپ قالعان بەس قاباتتى ءۇيدىڭ ورنىنا جاڭادان تۇرعىزىلعان مەكەنجاي بوي كوتەرىپ ۇلگەردى. بۇرىنعىسىنان اپات الدىندا امالسىزدان ۋاقىتشا جاتاقحانالارعا قونىستاندىرىلعان تۇرعىنداردىڭ بىرقاتارى بۇل كۇندە قايتا ورالىپ, باسپانالى بولىپ جاتىر. العاش كەلىپ قونىس تەپكەن قالكەن ەرجانوۆتىڭ, اينۇر تاجىباەۆانىڭ وتباسىلارىنا بەرىلگەندەي 294 پاتەر دايىن تۇر.
اششى وقيعا ساباقسىز قالعان جوق. ءۇيدىڭ ساپالى سالىنۋىنا باسا كوڭىل ءبولىندى. تابانى مەن ىرگەتاسى بەرىك قالانىپ, مونوليتتىك كاركاستان قۇيىلدى. قۇرىلىس بارىسىندا جۇمىستىڭ بارلىق ەرەجەلەرى ساقتالۋى ۇدايى نازاردا ۇستالدى. ءۇيدى پايدالانۋعا الۋعا مەملەكەتتىك قابىلداۋ كوميسسياسى تاراپىنان دا تالاپ جوعارى بولدى.
قازىر «شاپاعات» اتالاتىن وسى شاعىن اۋداندا جاڭا تۇرعىن ءۇي كەشەنى كۇننەن-كۇنگە ساپ تۇزەي تۇسۋدە. قالانىڭ باس كوشەسى – رەسپۋبليكا داڭعىلى بويىنداعى قىراتتا قانات جايعان ۇيلەر تۇرعىندارىنا بارلىق الەۋمەتتىك-تۇرمىستىق جاعدايلار جاسالعان ول ءوز الدىنا بولەك قالاشىققا اينالعالى تۇر.
«مەيىرىم باردا مۇڭ جوق» دەيدى حالىق دانالىعى. وسى ءبىر ءسوز مانىنە قونىستانۋشىلار تىكەلەي كوز جەتكىزىپ, كوڭىلدەرىنە قۋانىش نۇرى قۇيىلۋدا.
ايقىن نەسىپباي,
«ەگەمەن قازاقستان».
قاراعاندى.
