التىن جۇلدەگە – 250 مىڭ اقش دوللارى
بيىلعى سوچي وليمپياداسىندا قازاقستان سپورتشىلارى چەمپيون اتانىپ نەمەسە جۇلدەلى ورىنداردى يەلەنىپ جاتسا, قالىپتاسقان ءداستۇر بويىنشا مەملەكەت تاراپىنان قوماقتى سىياقىعا يە بولادى.
دۇنيە دوداسىنىڭ ءدۇبىرى
ءححىى قىسقى وليمپيادانىڭ باستالۋىنا 27 كۇن قالدى
التىن جۇلدەگە – 250 مىڭ اقش دوللارى
بيىلعى سوچي وليمپياداسىندا قازاقستان سپورتشىلارى چەمپيون اتانىپ نەمەسە جۇلدەلى ورىنداردى يەلەنىپ جاتسا, قالىپتاسقان ءداستۇر بويىنشا مەملەكەت تاراپىنان قوماقتى سىياقىعا يە بولادى.
بىلتىر وليمپيا ويىندارىنىڭ چەمپيوندارى مەن ءجۇلدەگەرلەرىنە جانە ولاردىڭ جاتتىقتىرۋشىلارىنا ءتولەنەتىن قارجى جاعى مينيسترلىكتەر مەن رەسپۋبليكالىق بيۋدجەتتىك كوميسسيانىڭ وتىرىستارىندا قارالىپ, جارىستىڭ جەڭىمپازى مەن جۇلدەگەرلەرىنە مىناداي كولەمدە سىياقى تاپسىرىلاتىنى بەلگىلى بولدى. ياعني, وتانداستارىمىز وليمپيادا چەمپيونى اتانىپ جاتسا, وعان 250 مىڭ اقش دوللارى تابىس ەتىلەدى. ەكىنشى ورىنعا – 150 مىڭ اقش دوللارى, ءۇشىنشى ورىنعا 75 مىڭ اقش دوللارى بەرىلسە, ءتورتىنشى, بەسىنشى جانە التىنشى ورىن العان سپورتشىلارعا دا سىياقى تاپسىرىلادى. وندا ءتورتىنشى ورىنعا – 30 مىڭ, بەسىنشى ورىنعا – 10 مىڭ, التىنشى ورىنعا 5 مىڭ اقش دوللارى بەرىلەدى.
ال باسقا ەلدەرگە كەلسەك, رەسەيدە وليمپيادا چەمپيونىنا 4 ملن. رۋبل نەمەسە 122 مىڭ اقش دوللارى بەرىلسە, بەلارۋستە ءبىرىنشى ورىنعا 150 مىڭ دوللار سىياقى تاپسىرىلاتىنى حابارلاندى. قىتايدا وليمپيادا چەمپيونىنا بەرىلەتىن سىياقى بۇدان ازداۋ. بۇل ەلدە ءبىرىنشى ورىنعا 50 مىڭ اقش دوللارى تاعايىندالسا, فرانتسيادا چەمپيون 50 مىڭ ەۋرو نەمەسە 68 مىڭ اقش دوللارىن الادى. گەرمانيا بولسا, ۇزدىك سپورتشىلارىنا 25 مىڭ ەۋرو نەمەسە 34 مىڭ اقش دوللارىن دايىنداپ وتىر. كانادادا 13 مىڭ ەۋرو نەمەسە 17,500 اقش دوللارى تاعايىندالعان. ءبىر قىزىعى, سپورتشىلارى وليمپيادا چەمپيونى اتانىپ جاتسا دا سىياقى بەرمەيتىن ەلدەر دە بار. مىسالى, جاڭا زەلانديا, سولتۇستىك كورەيا, نورۆەگيا مەن شۆەتسيادا وليمپيادا ۇزدىگىنە اقشالاي سىياقى بەرمەيدى. ءبىراق سپورتشىلارىن باسقا جاعىنان قامتاماسىز ەتەتىنى انىق. ال جۇلدەلى ورىنداردان ءۇمىتكەرلەرى كوپ ەلدەر بارىنە 250 مىڭ, 150 مىڭ جانە 75 مىڭ دوللاردان بەرسە, ءبىراز شىعىنعا باتاتىنى تاعى بار. وسىنى دا ەسكەرۋ كەرەك سەكىلدى.
داستان كەنجالين,
«ەگەمەن قازاقستان».
بولليۆۋد جۇلدىزدارى وليمپياداعا باراتىن
ءۇندى سپورتشىسىنا اقشا جيناپ جاتىر
سوچيدەگى وليمپيا ويىندارىنا باراتىن بىرنەشە دۇركىن ازيا چەمپيونى شيۆا كەشاۆانعا قارجىلاي كومەك كورسەتۋ ءۇشىن ءۇندىستان مەن وزگە دە مەملەكەتتەردەن «Ketto» ونلاين-پلاتفورماسى ارقىلى 15 مىڭ دوللارعا جۋىق قاراجات جينالدى.
تانىمال بولليۆۋد جۇلدىزى كۋنال كاپۋر جەتەكشىلىك ەتكەن كومپانيا اتالمىش قورعا 1 ملن. رۋپي اۋداردى. كەيىننەن سپورتشىعا قارجىلاي قولداۋ كورسەتۋگە تەننيسشى لەاندەر پاەس, سونداي-اق, ابحيشەك باچچان مەن فريدا پينتو اتتى اكتەرلەر دە اتسالىسقان. جينالعان قارجى نەگىزىنەن شيۆا كەشاۆانعا جاڭا شاڭعى ساتىپ الۋعا جۇمسالاتىن كورىنەدى.
شيۆا كەشاۆان 1998 جىلى جاپونيادا وتكەن وليمپيادادا ەڭ جاس شاڭعىشى رەتىندە ونەر كورسەتكەن بولاتىن. كەيىننەن ول 2002, 2006 جانە 2010 جىلدارى وتكەن وليمپيادالارعا قاتىسىپ, ازيادا شاڭعى سپورتىنان بىرنەشە رەت رەكورد جاساعان ەدى. «مەن گيمالايدىڭ بوكتەرىندە تۋىپ-ءوستىم. ول جەردە قىستا, كوشەلەردىڭ بارلىعى قارمەن جابىلعان كەزدە, جەرگىلىكتى بالالار قولدان جاسالعان شاڭعى مەن شانالارىن الىپ شىعىپ, سىرعاناپ وينايتىن. وسىلايشا, مەن قىسقى ويىن تۇرلەرىنە قاتتى اۋەستەنىپ, 1996 جىلدان باستاپ ءۇندىستاندا وتكىزىلگەن جارىستاردان قالمايتىن بولدىم, – دەيدى سپورتشى يتار-تاسس تىلشىسىنە بەرگەن سۇحباتىندا. – جارىستاردىڭ بىرىندە ماعان اۆستريالىق جاتتىقتىرۋشىنىڭ كوزى ءتۇستى. مەنىڭ سپورتشىلىق مانسابىم سول كەزدەن باستالدى».
الايدا, ون جىلدان استام ۋاقىتتان بەرى شيۆا كەشاۆاننىڭ ءوز شاڭعىسى بولماعان. سونداي-اق, وعان وسى كۇنگە دەيىن ۇكىمەت تاراپىنان ەشقانداي كومەك كورسەتىلمەگەن ەكەن.
ايدار ورىسباەۆ,
«ەگەمەن قازاقستان».
